A Zungkha Thei Zongsatna Hoih Lo
Agelh ~ En Khat Thang
Khat vei, Naupangte kikepna a minthang SangInn khatah naupang numeino khat laikhak khat tawi kawmin Siapipa kiangah hong pai hi. A lai sungah, "Siapipa aw, ka tanu in a hoih lo zongsatna pawl khat nei hi. Ka tanu mahmah in a hoih loh lam thei gigu hi napi, kikhel zo lo mawk hi. Bangmah kigen thei lo ahih manin hong huh in Sia aw" cih laikhak ahi hi.
Siapa in zong lai a sim khitteh balkek in paii hi. Kum 12 khawng a pha ding tua numeino nu samin Innnung paak huan sungah paipih hi. Siapa in a masa penin lopa kung khat kawkin numeino nu bot sak hi. Naupangno nu zong bangmah gen hetlo-in a khutme nih tawh manin zung bot ziau hi.
Tua khitteh paak kungno khat kawk leuleuin bot sak a, numeino nu in zong a khut lang khat tawh manin hong bot ziau hi. Siapa in, a mai lamah tawmvei paipihin, sawl bawk khat bot dingin sawl leuleu hi. Numei nonu zong sawlbawk a khut nih tawh manin a tha neih zatin hong dok hi, thum vei khawng deihtak thasanin hong hanciam leh bot zo petpet sam hi.
Siapa in paak huan kiu khata om, singkungpi khat kiang paipih leuleuin "hih singkung bot dih ou tun?" ci-in sawl hi. Numeino in zong a lu pei kawmin, "Sia aw, hi thei peuhmah lo ding hi, bot zo kei ning" ci hi.
Siapa in "Ium! Ngeina hoih lo, zongsatna hoihlo kicite zong lopa, sawlbawk le singkungte bang mah ahi hi. A suk luatma, a neu lai-in kibot khia zo, kipuahpha zo bek ding hi. Tua ahih manin, na gamtat hoih lo zongsatna, na ngeina hoihlo lungsim puakte na theih phetin na bot khiat pahpah ding kisam hi. Tua hikei leh, singkungpi a golsa na bot zawh nawn loh mah bangin, na nuntakna kikhel zolo ding hi teh" ci-in thu gen pih hi.
Naupangnu zong lungsim sungah thumaan thutak hong mankhia thei in, a Nu kiangah hong ciah vingveng hi. Nipi kal nih sung khawng khitteh, Siapa kiangah laikhak khat hong tungin, laikhak sungah naupang khutlam tawh kigelh laigual khat ki-at hi. "Siapipa aw ken lopa kungno a zung panin bot khia zo khin ta ing" cih ahi hi. Siapa in kua laikhak hiding cih thei ahih manin lungdamna tawh nuih mai hiuhiau-in hong om hi.
Laisim ulenaute, kei a kipan, i nuntakna sungah ngeina hoih lo, zongsatna hoih lo, lungsim puak hoih lo a tawm, a tam kinei ciat mawk hi. Neulai a kibot khia khalo zongsatna hoih lote tawh kidim pawl khat zong i om kha ding hi. Tua teng hangin, tu ni i minam sung puahhak, zuunhak lua peuhmah dinmun i hizen hi. Eite tha tawh i khel zawh loh hoih loh nate Pasian tungah ap in, a thahat Pasian in hong zunglot khiat sak ding bek mah i ngak kul ta hi. Naupangnu bot zawh loh singkungpi a bot zo ding pen set (engine) zaitha om lai sam ding hi. Ei le ei kipuah zawh loh, kilaih zawh loh hong puah hong zuunkik ding Pasian tha bek mah i muang hi.
I minam khangnote sungah tua bang zongsatna ginalo te upa te in i vawh khak loh ding, i ta, i naute sungah tua bang a om khak leh i theih phet mahin i khel sak zawh ding hanciam leng a sawt het lo khang khat sung bangin i minam kipuah, kizuankik zo dingin upna le lametna ka nei hi.
A nungta Pasian in i minam, i khua le tui, Innkuan sung le mimal khat ciat a thakin, a ma hoihna te tawh hong puahphat ding i lunggulh hi. A kikhel zo ding zongsatna hoih lote khel zawh sawmin, eite tha-a khel zawh loh ding zongsatna hoih lote Pasian ap in, a kipuah pha zo ciat dingin Pasian in thupha hong pia ciat ta hen.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
