A THEU THEILO GUAH
Agelh ~ Khoi Lam Thang
Phun bekbek a thei zi pen theu hun mel a thei lo
guahciin tawh kibang hi (Paunak 27:15)
A minthang galkap mang Napoleon’ zi pen a phun hat mahmah khat in kigen hi. A pasal pen nungak dangte tawh muangmawh den hi. Amah le amah kiphatin, a pasal gensia den hi. Napoleon a khan sungin tam veipi a zi’ phunphun thuak zo loin, inn pan a paikhia zel kici liang hi. Gal kap ding kihta lo a, zi phunphun thuak zo lo hi.
Rusia gammi lai-gelh minthang Tolstoy, zi zong a phun in minthang hi. Kum 82 a phak, a teek khit nangawn in a zi’ phunhun thuakhaksa lai hi. A kiten zawh kum 48 a cin khit 1910 kum in, “Nuntak vangik nikhat khit ni khat a lel semsem hi tang” ci-in, a inn nuam nusia-in gamsung khuadam lakah taimang hi. “Hi bang zi tawh cikmah ciangin hong kimusak kik nawn kei ta in” ci-in, a lupna tungah lai khat nusia hi. Nov 10, 1910 ni-in si hi.
America President a sem ngei Abraham Lincoln (1861-1865) zong zituak lo a, minthang khat ahi hi. Midangte zum pan a ciah ciangin a zi a tate’ dawn ding kal ngaklah mahmah napi, Lincoln in zumtuak a inn a tun ding kihta mahmah hi. A zi’ phunphun a zak sangin a mah kia om leh nuamsa zaw ahih manin hotel khawng-ah kha gukguk bang om thei zel hi. Gam lianpi khat a makaih zo pa in, zi phunhat khat tawh a tenkhop ding haksa sa mahmah hi.
I gensa mi minthangte nuntakna-ah zi gilo in ki-itna peengsak a, a thupi mahmah minleza, a nuam mahmah innlelo, neihlelamte nangawn iplah loin, paisan ngam uh hi. Ui in zong saguh a duh mahmah hangin saguh tawh vel lehang na sa-in tai hi.
Ki-itna tawh nupa suahna-ah, kiniamkhiatna, kimaisakna, kithupisimna a om kei leh lunggimna, nop lohna, thanemna a tuamtuam hong lut-a, kikhenna tawh kizom den hi.
Pasal kician lo a nei kha zi kician khat in, a pasal thupi simin phatphat, puahpuah a, a nung ciangin Pasal gina suak sak thei hi.
Zi kician lo a nei pasal pen a vangkiam-in maineu a, leitung nuntak tomkal sung nopsakna bucing takin zang kha lo hi.
Phun bek a thei zi tawh inn sungah tenkhop sangin
innkhumzang kiu khat-ah tang ten hoihzaw tham hi.
(Paunak 25:24)
--oo—
Source:
Sihna in hong khen mateng (Laibu)
Laibu Saal / Zomi eLibrary
