A Semkhia Upna (James 2:26)
Agelh ~ Kap Za Khai
Thuciam Thak Lai Siangtho sungah sepna a bulphuh pen Lai Siangtho in James hi a, Khristian gamtat nuntakzia hong hilh pen thubu cileng zong kikhial lo ding hi. James 2:26 sungah, Tua ahih manin hu a diik lo, hu a sang lo pumpi pen a si ahih mah bangin sepna tawh a kizom lo upna zong a si ahi hi, a cih mah bangin Khristian nuntakna cih pen sepna leh upna a kithuah khawmden ding nuntakna ahi hi. Hih sungah “Sepna” leh “Upna” ci-in kammal thupi mahmah nih na om a, adiakdiak in “Sepna” cih kammal tunga lai gelhpa James’ ngaihsutzia leh a laimal deihna encian ding hihang.
James in a semkhia upna thu a lak nadingin minihte’ nuntakna tawh na genteh hi. Abraham leh Rahab hi. Hih sungah Abraham’ nuntakna bulphuh in gen ding hihang. Pasian in Abraham kiangah a tapa neihsun ahi Isaac tawh amah a biakpiak nadingin sawl a, Abraham in mangin sem pah hi (Pian. 22:1-12). Hih in Pasian tungah Abraham in a upna leh a itna a lahcianna ahi hi. Abraham in tua bangin a lak lo hileh zong Pasian in Abraham’ upna thei veve ding hi lel a, ahi zongin Abraham in tua banga a lakkhiatna hangin Pasian leh amah kikal-ah a bucing lungsim kizopna piangsak hi. Abraham’ thumanna in Pasian lungdamsak in a kizopna uh kipsak bek tham loin amah zong Pasian lawm hong suak hi. Tua ahih manin James in mi khat peuh in a upna bek tawh hi lo in, a sepna tawh a kizuih ciangin Pasian tawh kipawl theihna ngah pan ahihna thu na thei uh hi (2:24), na ci hi.
Hih munah i muh theih thu in Abraham’ upna in ‘sepna’ ahi Pasian thu manna, zuihna leh Pasian’ deihna bangin gamtatna cihte piangsak cih thu ahi hi. Tua pen (Piancil 22:1- 12) sunga thu pen James in la-in ama laikhak (James 2:20-26) sungah a zang kik hi a, ama Pasian thu ngaihsutna (theological concept) bang hi leh sepna cih pen Pasian thumanna, zuihna leh ama deihna bangin gamtat nuntakna ahi hi.
Upna thu gen ding hileng, upna pen gupna ngah nadingin a kisam khat hi a, tua upna in ama cihtak thumanna pen sepkhiatna tawh amah leh amah hong kilaangkhia hi. Upna pen a piangkhia masa thu hi a, sepkhiatna pen i up man a, a gahkhia a gah ahi hi. Hih upna sungah lungmuanna, zahtakna, thumanna, cihtakna leh itna cihte kihel hi. Abraham’ nuntakna zong tua bangmah hi. Issac tawh Pasian a biakna in ama upna leh a thumanna hi (Pian.15:6; 22). Hih in Pasian itna sungah zuihna leh nuntakpihna om lo pi-in upna om thei lo ahihna hong lak hi. I upna bangin gamtat lohna peuhpeuh mawhna ahi hi (Rom 14:23b).
James sungah Sepna i gen ciangin gupna ngah nadingin sem ding cihna hi lo a, Pasian i up leh Pasian thu mang ding, ama deihna zui ding, kiniamkhiatna leh itna tawh upna gah, gahsak ding cih nopna hizaw hi. Upna leh sepna, gamtatna, zuihna leh thu manna cihte pen kikhen thei lo hi. Gupkhiatna hong ngahsak thei upna in itna sungah zuihna leh gamtat sepkhiatna nei den hi (James 1:27; 2:8; 1Kor.13; John 14:15). Hih in James hong laknop ahi “sepna leh upna” kizopna thu laigil ahi hi.
Thu khupna in enleng, a semkhia upna cih thu sungah upna piang masa zaw den dinga, sepna ahih leh upna’ gah ahi hi. Kuamah in mihing sepna tawh gupna kingah thei lo hi. Pasian maipha kingah zo lo, thupha kingah zo lo hi. Ahi zongin upna kician i neih leh tua upna tungtawnin Pasian thu manna, ama deihna bangin nuntak gamtat sepna cihte hong luangkhia hamtang ding hi. Tua ahih manin ei thu-um mite in zong “Sep Khiatna le Upna” ci-in thulu tawh i kalsuanna sungah James hong hilhna bangin upna sungah zungthuk kha masa ding hanga, tuakhit ciangin upna gah ahi kiniamkhiatna leh itna bulphuh kawmin Pasian thu manna, zuihna, gamtatna leh sepkhiatna tawh mainawt khawm ciat ni. Tua hi leh agah limci in hong khum mahmah ding hi.
References: Charles R. Erdman, James: The General Epistles on Exposition. Philadelphia: The Westminster Press, 1925. Robert Johnstone, Lectures on the Epistle of James. Manneapolis: Klock & Klock Christian Publishers, 1978. Hilhcianna Kithuah Lai Siangtho, Myanmar-Tiddim Chin 1977 Edition, eds. Donald C. Stamps, J. Wesley Adams. Springfield: Life Publishers International, 2007. The Effects of Giving Tithe, Myanmar translation.
