A Pha Lungkimna
Agelh ~ En Khat Thang
Kumpi Inn sung thudot pupi le Kumpipa tapa ni khat khual hong zin khawm uh hi. Lui tui luang sialsial khat hong tuak uh a, lui gei ah suangpi tung khat a kikoih puanak kiphop lipliap khat le puanten lui sim khat mu uh ahih manin mi zawng genthei tui buala kisil khat om hi cih thei pah uh hi.
Kumpipa tapa in, thudot pu kiang ah "Sia aw, hih puante mun khatah selsak ni in, ei hih sawlbawk pang khatah bu in, en sim leng kisil mipa lui nawl hong pai ciang a puante hong zong keii dinga, en tua gal et sim le hang nuih zak huai mahmah khat hi ding hi" ci-in kuppih hi. Thudot pupi in zong, "Kumpi' tapa aw, mi khat dahna, sinkhamna tuaka, a om en in nuih zak huai sa a, lungkimna pen mi pil, mi thupite gamtat zia hi lo hi. Na lungkim nop takpi leh hi bangin hih in ci-in;" Thudot pu in, a ip sung pan kham dangka tang nih la in, kumpipa tapa kiangah "hih kham dangka tangte tui bualpa puan ip vei le tak sungah tang khat tuak va koih sim in" ci-in sawl hi. Kumpipa tapa in zong a siapa thu mangin dangka tangte va koih sim hi. Tua khit ciangin a nih un sawlbawk pang panin en sim khinkhian uh hi.
A sawt lo-in, mi zawng kisilpa lui sung panin hong pai khia in a puanten hong teng hi. A puan hong silh leh, a gik pian lillel bang khat om sa ahih manin, a puan ip sung hong sawk leh kham dangka tang hong mu petpet hi. Mi zawng pa zong lamdang sa lua, um zo lo phial ahih manin, dangka tang en phapha, zut zel, a ha tawh bang pet mai phial in, lungdam lua-in hong kipei keii hi.
A puan angkilhte hong kilh kawmkawmin, a ip lang khat hong sawk leuleu leh kham dangka tang khat na om leuleu hi. Mi zawngpa zong lungdamna khitui tawh tua mun ah hong khukdin in, "Aw kei hong it a hong huh, hong siam Pasiante aw, Ka Inn ah cidam lo, lupmun ngaka om ka Nu nong kepsakna uh ahi hi. An nek ding neih lo ka hih manun tha zawm a om ka sanggamnu zong tu in hong gupkhiat sak na hi uh hi" ci-in biakpiakna khat a neih khitteh lungdam takin Inn lam a zuan hi.
Hi bang thu piangteng a en sim khinkhian kumpipa tapa ahih leh a khitui hong tak keuhkeuh ta hi. Thudot pupi ahih leh lungdam maitai in hong om hi. Kumpipa tapa in "Sia aw, tuni-in ka khantawn ka mangngilh ngei loh ding thu manpha mahmah nong hilh hi" ci-in lungdam a ko hi.
Thudot pupi in zong "Kumpipa tapa aw, mite lungkhamna, buaina khat peuh guan se a, tua tungtawna kingah lungkimna sangin, mite lungdamna ding gel sak, hawm sakna pan a hong piang lungkimna pen thumaan thutak lungdam, lungtaina hipan hi. Hi thu ciamteh tawntungin" ci-in a khualzinna uh a zom uh hi.
Hih tangthu in eite bang thu hong hilh cih laisim mimal khat ciat in ngaihsutna anei kim dingin lamen hi hang. Kumpipa tapa bangin kheltat nopna lungsim gina lo i nei kha hiam? Thudot pupi bangin kumpipa tapa deihnana pum zuih lo-in thumaan thutak tawh i khangnote thu i hilh hiam? Mizawngpa bangin thupha i santé ka Nu, ka Pa a ding, ka sanggamte a ding, ka minampihte a ding i ci thei diam? Kumpipa tapa bangin thumaan ciamteh nuamin, a lungdam thei i hi hiam? Laisim mimal ciat ei le ei kidong tek ni.
Laibu Saal / Zomi eLibrary
