A manpha pen Moken
Agelh ~ Khoi Lam Thang
Mopawi khat om leh “A moken bang ahia?” cih kidong thei hamtang hi. A hau nu le pate in mo a khak uh ciangin moken manpha tampipi kengsak thei uh hi. I neih leh i neih bangin a man phapha mokensak ding thupi mahmah hi. Tua in nu le pate’ lunggulh pi ahi hi.
A hi zongin, moken a manphatna pen sumlepai, kham-lengunte tawh teh masa kei ni. Tuate bei thei hi. Kisia thei hi. Mang thei hi. Kitotlawh thei lai hi.
A manpha penpen moken in: nungak na hihna siangtho tak le manpha takin na tuam koih sinsenna ahi hi. Na pasal (masangte) tungah a manpha penpen na puak theih in “NUNGAK SIANGTHO” na hihna ahi hi. Tua sanga a manphazaw om lo hi. Khangluite in mo zon pen khaici zong hi hang ci uh hi. Hi takpi hi. Lung in a neek baangsa, nget in a peh baangsa khat khaici ding na teel masa diam?
Nungak khat adingin a tenpih a pasal pen a masa penpen a lupkhoppih pasal hi hen la, tangval in zong a zi pen a masa pen a lupkhoppih numei hi leh deihhuai pen hi. Tua in nupa kal kilunggulhna bukim sak hi. Nulepa kikal a lametnate uh amau nupa kikal bekah kinga ahih manin, ki-itna khang semsem hi.
Vai-ten mopawi a bawl uh ciangin, nupa thakte a lupkhop masak nading uh lupna delhphah dingin puan kang dildel phahsak uh a, zingsang ciang tua puankang a nit leh (sisan a ban leh) a tekte angtang mahmah uh hi. Sisan a ban kei leh kitelkhialhna tampi piang thei hi, kici hi.
Nungak siangtho tangval siangthote in nupa a suah uh ciangin, a dang bangmah ciamkhol se lo uh ahih manin, amau ki-it zahin midang a ki-it lo dingin ngaihsun uh hi. A zi tungah lungkim mahmah hi. A pasal tungah lungkim hi. Ama zi mah a hoih pen a ma pasal mah a muanhuai penin ngaihsun hi. Lungleng sese lo uh hi.
Ahih hangin zulhzauna le cihtak lohna a thuah ngeite in amau a’ lo peuh a limzaw dingin ngaihsun uh hi. A muh thak peuhpeuh cizet nei lo-in sawk nuam, ciam nuam uh hi. Lungkim thei lo uh hi. A sawt-loin nupa kikhenna dong piang thei hi.
Nungak aw, na moken ding na angtan pih hiam. A limci, a siangtho, a bit sinsen in na kem hiam?
Nungak siangtho na hihna,
na moken manpha pen dingin khensat in. Tangval te zong ee:
--oo—
Source:
Sihna in hong khen mateng (Laibu)
Laibu Saal / Zomi eLibrary
