A MAH A PASAL IN IT MAHMAH HIVEN
Agelh ~ Khoi Lam Thang
Singapore a Sansan’ pi (Pi Man Lam Cing) le a pasal Pu Major Khup Chin Pau (tu-in Rev Khup Chin Pau) te innkuan tawh Yangon-Insein ah BD ka sin lai (1990-1993) ka kithei kha uh hi. Kum 10 phial kimuh nawh loh khit uh, 2002 kum-in Singapore ah ka kimu kik uh hi. Tuma kum 10 lai a mel le a tha na kikhel vet lo, na teeksuah tuan lo uh ahih manun,
“Sansan pi! Teek ning ci peuhmah lo-a, tuma kum 10 lai na mel tawh na hi ci tha tun lai ta zen … thusim khat om ngelngel in teh. Hong gen dih ve…”
ka cih leh Sansan’ pi in nuihmai kawmin hong en phei a, ama hong dawn ma-in Sansan’ pu in,
“A mah moisuah kinken lel mah lo dia, a pasal in it mahmah hi ven” ci-in hong dawng hi.
Etteh huai nupakopte’ tung pan nuntakpih cing, a khiatna nei kammal hi, ci-in ka ciamteh pah hi.
A mau April 29, 2004 ni in nupa kop a suahzawh uh kum 40 cingta a, “Pasian in cidam hong pia a, kum 50 (Golden Jubilee) ka muak khop zawh nang uh thu hong ngetsak un” ci veuveu lai uh hi. Tu in, a cing dedek ding hi ta hi.
A tanu a tapate uh leitung pilna siamna kician sinsak zo uh hi. Pasian um-in, zahtak mahmah uh hi. Pasian nasemte zong thupisim uh hi. Lei thupha, van thupha a kop-in sang khawm uh hi. I minam sungah hih banga thupha sang, nupa kop dam khawm, tha le lungsim hatkhawm tampi om lo ding hi. Tua bang nupate’ thusim khat in, “A mah a pasal in it mahmah hi ven” cih ahi hi.
Ki-itna in leitung-ah van gam hong ciamsak hi. Ihmut nuamsak hi. Lung damsak hi. Lung muangsak hi. An limsak hi. Meh limsak hi. Tha hatsak hi. No suaksak hi. Mel hoihsak hi. Mawh maisak hi. Inn nuamsak hi. Leitung zaisak hi. Leitung nuamsak hi.
Innkuan sung ki-it leeng
Hun khempeuh nuam mahmah a, Innkuan ki-it leng.
--oo--
Source:
Sihna in hong khen mateng
