A LUNGKIA THEILO MEIGONGNU
LUKE 18
Agelh ~ Rev. Dr. John Thang Hum & Dim Lun Zam
Luka 18 sungah Topa Jesu in nungzuite thunget a hahkat nading, lungkiat loh ding meigongnu khat tangthu tawh na gen hi. Hih tangthu pen thupiang taktak thu ahi hi. Meigongte pen ki simmawh nuam phadeuh ahih manin Pasian in meigongte tawh kisai bawl zia ding thukham pia hi.
Thuhilhkikna 10:17-18 ah hi bangin gen hi. “Banghanghiam cih leh Topa na Pasian uh a lian, a vanglian, a kihtak huai Pasian, angvan neilo in, sumgolh a lalo, pasian-te' Pasian, topa te' Topa ahi hi. Amah in pa neilo te leh meigong numei te-a' dingin thutang semin, peemta te it in an-leh-puan a pia hi. Tua ahih ciangin peemta te it un; banghanghiam cih leh note zong Egypt gamah peemta na hi uh hi. Israel mite tungah, Topa in thu pia a, a panpih ding a omlo, pa neilo, tagahte, meigongte leh levi mite huh ding” cih ahi hi (Thukik 24:17). Meigongte ahihleh, anlak hun hong tun ciangin lo ah akia ansangte tawm kik lo in, meigong leh mizawng te top dingin nusiat ding gen hi (Thuhilhkikna 24:20:21).
Kamciamna gam sung atun ciangin paisan pawi bawl ding uh a, tua hun ciangin, pa neilo te, meigong te leh pemta, amau azui te zong nusia loin pawi ah a paipih ding uh gen hi. A khua ciat uh ah kum thum simin an a kaihkhop uh ciangin, Levi leh siampite tawh ki bangin, pemtate leh meigongte zong a kibang a, tanh apiak ding uh gen hi (Thuhilhkikna 26:12-13).
Meigong te thusim lohna, simmawh bawlna pen a piangsak Pasian simmawhna ci-in gen hi. Tua bang mite ki hamsiat hen ci ngiat hi (Thuhilhkikna 27:19). Pasian in a ki phasak mite inn balzan a, meigong te neihsa kem bit hi (Pau 15:26).
Israel te tangthu sungah, meigongte leh mizawngte ki simmawhna tampi ki mu hi. Hih lai ah I sim meigong nu zong, mite simmawhna, zawhthawh bawlna tuak hi kha ngelngel ding hi. Athu zong thukhenzum ah atun hangin ki et sak loin, ki koihcip hi kha ding hi. Ahi zongin hih meigongnu in athu azo a, alel zongin, athu asian mateng om khong dingin ngaihsun theilo hi. Thukhen mangpa kiang ah, pai thithe in, va phu kikkik hi.
Thukhen mangpa in atawpna ah ngaihsutna khat lut hi. Hih nu thu ka khensak kei leh hong pai thithe dinga, ka suahtakna hong nawngkai sak ding (hong ih mu sak theilo ding) cih thei hi. A tawpna ah meigongnu thu khen sak veve hi.
Pasian kiangah, Pasian tungah I kisapnate huhna ngen in, tawplo in, I pai thithe ding ahihna hih meigong nu tangthu tawh Topa mahmah in eite tha hong pia hi. Thungetna pen khatvei nget tawh kipia pahpah lo hi. Tua ci leh mite a upna uh khahsuah baih mahmah dinga, Pasian zong simmawh ding uh hi.
Thu ngetna I ngah pah loh ciangin, Pasian in I nuntakna kisit ding, lungsim puakzia manlo te I ki khel ding hong deihna hi thei hi.
Tua thamlo in ih upna hong ki ze-et zong hi thei hi. Bang tanvei thuakzo hiam, a lungduai mah hiam? A upna bangzah ciang khauh hiam? ci-a hong sin sak zong hi thei hi.
Thugentehna khat om hi. Khatveilai in, Pasian in vantung mi Michael kiangah, parcel thoh khat pia a, hih mipa in thu hong nget a sawm veina ciangin hih na pia in ci-in vai khak hi. Mipa’n zong thu ngengen a, kua veina dong anget khit teh lungkia in tawp hi. Vantung mi in tuapa thunget zah na simsim hih tuak hi. Tua parcel thoh a va puak ding zong lawp mahmah hih tuak hi. Ahi zongin tua pa a thunget a kua veina ah khawl cip ahih manin ki pia thei mahmah lo hi. Khatvei ngen lai leh a kipia ding hi ta hi.
Khat veivei I thungetna te lungkia pah lo in, khatvei bek ngetbeh lai hi leng hong ki pia ding zong hi thei ding hi. Tua ahih manin hih meigongnu bangin lungkiat het lo phot ding kisam hi. Paunak khat ah, “A lung kia baih mite in bangmah ngah lo a, thupha ngah mite lungkia ngeilo hi,” ci hi.
Thukhupna:
Hih tangthu ah a thupi thu nih I mu hi. Khatna ah, a thu kikhen sak ding a phu teitei, a lungkia theilo meigongnu leh, hehpihna nei khollo thukhenpa ahi hi. Hih thukhenpa pen leitung mihing hihna hong telsak hi. Hih thukhenpa leh I Pasian ki lamdanna pen, I pa Pasian in thuman thukhenpa leh mihing bangle, hong lainat Pa ahihna hong musak hi.
Dotna:
Mei gong te bang hang ki sim mawh hiam? Tuhun in hi bang dan omlai hiam?
Israel mite tungah meigongte tawh kisai Pasian in bang ci vai khak hiam?
Thungetna bang ci namte hong kisang cih na mu hiam?
Na thungetna na lungkiat hun a om hiam? Bang hang hiam?
