A KIUKHAT PANA NGAIHSUTNA
Agelh~T.Sawm Lian
Kalunggulh nam thum, Zomite ading kisam hi a ka theih, i khantoh theih nang, i kipumkhat theih nang leh i pankhop siam nanga kisam thu tawm gen nuam ing. Tuate: pau khat zat ding, thu leh la lamah i khantoh theihna dingin laigelh dan kibang ding leh Zomi ihihna ah lungkim a, i pankhop ding te ahi hi.
Leitung nuntakna i et ciang pau a kisapzia leh pau in mihingte lungsimah na a sep ziate i theithei hi. Pau in mi tawh hong kithutuak sak in hong kimeltheih sak a, hong ki-it sakin hong kithutuak sak hi. Pau manphatna tawmkhat in gen pak lehang. Abeisa kum 4,500 kimin leitung mihingte in Sinar zangguam ah Babel innsang na lam uh hi. A hanciamna te uh a kham theih ding dan baih pen apau uh Pasian in kilamdang sak hi. Pau kitheituah nawnlo ahih manun, na sem khawm thei nawnlo in amau utna tekah paimang uh hi. Pau in mi a kikhentheihzia hih thu in kilangsak hi. I unau Mizote en lehang paukhat a neihna hang uh a akithutuak ziate uh i muh ciang enhuai mahmah hi. Zomite minam picing khat ihi a, i pau nam tuamtuamte pan pau khat zang thei lehang deih huai hi. Zomite in pau namkhat i neih ciang, i minam hong khangto in zong thupi zaw ding in ka um hi.
Minam a khantoh nadingin lailam ah i khantoh ding kisam masa hi. Tua dingin laigelh zia khat i neih ding kisam hi. English te pen hizahta a minam lian, mite etteh leh mite zahtak ahihna hang uh, thu le la a neih hoih man ahi hi. Mikang ten India gam a uk lai in English papi bangzah hiam thu kikum uh a, “India gam hausakna leh Shakespeare koi manpha zaw hiam?” ci uh hi. Tua a thukhupna ah, Shakespeare manpha na sa zaw uh hi. A hangin Shakespeare thu leh la in gam tampi tak a uk banah, India gam hausaknate nangawn nei thei ahih lam uh na kitel mahmah uh hi. Zomite mun tuamtuamah i ten bangin A, B, C, a zang pawl ki omin, A, Aw, B, a zang pawl ki om hi. Zomi mipil - misiam ten laigelh dan khat i neih theihna ding leh grammar kician tak i neih theih nading vai hong hawm leh uthuai mahmah hi.
I khantoh semsem nadingin Zomi i hihna ah lungkim in, mun tuam ah i teng zong Zomi mah hi cih kithei a, i pankhop siam ding kisam hi. Nam tuam a kikhen nate paihmang hun ta hi. Singkang (twig) khat sangin singkang thum le li koihciak/kuaihtan a hak zawk mah bangin, pangkhawm leng mi in hong simmawhin hong niam-et nawnlo ding hi.
A beisa kum tulsawmkhat lai-in hih leitungah pau nam 10, 000 - 15, 000 kim omin misiamte in tuat hi. Himahleh hun hong pai toto in, nam tuamtuam omkhopna, tenkhopna, zi leh pasal a kiten thuahna leh, nam lianzaw ten a neuzawte a nencipna hangin pau nam tampi tak maimang ta hi. Tulai takin leitung ah pau nam 6, 000 val khawng bek om in tuat uh hi. Pau lam siamten a tuatna ah kum zalom khat i zatkik khit teh, pau nam 300 bang bei dingin tuat uh hi. I pau le ham te in koilam manawh hiam, manthanna lam maw, khantohna lam? cih i ngaihsut ding kisam hi.
Zomite khantoh lam manawh toto, thu le la leh pau le hamte puah kipan ta. Tua ding a malakna khat ahi Zomi bupin a zat theih ding, Khristian Labu bawlsawm cih khawng i zak ciangin, Pawlpi makaite in minam a veina, pau leh lai khantohna dinga ma a lakna te thupi in pahtakhuai mahmah hi.
Minam khat i hih na, tunsungkhat pan piang, laigui kizom, Zomi Phualva banga itna lungtang a neite i hih manin pan i lak mengmeng ding kisam hi. Pasianin minam khat in hong bawl a, pau leh ham hoihtakte hong pia in, tuabang dinga hong bawlpa Pasian i mangngilh loh ding ahi hi. Late sungah Pasian neilo gam leh minam pen a mangthang ding ahihna thu Kumpi David in nagen hi. Tua ahih manin vaihawmna, kalsuanna khat peuhpeuh ah, Pasian muang leh zahtak kawmin na sem le’ng, i biak Pasian in i minam leh i gam hong khangto sak ding a; Zomite, minam lian leh mite zahtak, ama nasem muanhuai hong suaksak ding hi. (Laitai July, 2008)
Source:
Daihna Cabin ~T. Sawm Lian
