A Kitamzan thei Lungtang
Agelh ~ En Khat Thang
Khatvei, Thomas Edison in a naseppihte tawh sun le zan tawlnga lo-in mei bulb hong bawl khit ciang, a bawl mei bulb mipi lakah tangko sak dingin media nasem hon khat kai khawm hi. Thu le la kan tamsim hong pai ngeingai uh a, tua teng mai ah, a mei bulb bawl lak nuam ahih manin, a nasempa khat mei bulb va la sak hi.
Nasempa zong lawp lualiang hiam, mei bulb tawi-in hong tai kawm leh a khe palkha in tuk citciat ahih manin mei bulb zong hong kitam lian mawk hi. Hun tampitak la-a, a nasep sateng a mawkna hong bang phial hi. Ahi zongin Edison in nasempa bang mah cih lo-in, Media lengla teng tungah, “mei bulb ka na bawl phakik dinga, ka zawh teh khatvei kong samkik zel ding hi” ci-in thum hi. Nasempa ahih leh kisuang lua peuhmahin om hi.
Thomas Edison zong a naseppih teng tawh a mei bulb bawl hong kipankik a, sun le zan thapai nai 24 val bangmah hong buaipih zel hi. Hong zawh ciang' Media teng kaikhawm zel in, a mei bulb lak dingin hong kithawi hi. Thu le la kan lengla teng mai ah nunga nasempa mah sawl in mei bulb va la sak citciat hi. Nasem tangvalno pa zong nuam mahmahin kidawm takin mei bulb hong tun pih hi.
Vai khempeuh lemtang takin hong zawh khitteh, dotna dawnna hun sungah thukan khat in “Mr. Edison aw, bang dingin nunga mei bulb kitam sak naupang nasempa mah tutung zong mei bulb la dingin sawlkik lai mawk na hi hiam? Nasem dang tampi nei napi cin, hih tangvalno pa in hong kitam sakkik leh na mei bulb bawlna in hun tampi sumkik zel ding cih dah se lo na hiam?” cih dong citciat hi.
Edison dawnkikna thupi ciapteh huai;
"Hih tangvalnopa mah thei gigu a ka sawl aive! Mei bulb kitam lel bel ken bawlkik thei hiveng, a mah sawl nawnkei mawk leng tangval pa a lungsim kitam ding hi ven ee" ci-in dawng hi.
Leitung mi khempeuh pen i vun puak a vom, a kang, a sanin kilamdang kha mah ding hi hang, ahi zongin i lungtang kibanga, dah theihna, khasiat theihna, lungdam theihna, heh theihna i neikim ciat hi.
Mihingte lungsim kitamin kisia sak kha leng i bawlkik theih ding pen hun ki ciangtan thei lo hi. Tua ahih manin nang hangin kuamah lungtang kitam sak kei in. Kua ma lungsim kisia sak kha het kei in! Mihingte pen a kikhial thei ngeina hi a, khat vei khialhna tawh kitawng, kitai gawp pah lo-in, mawh maisakna tawh kipattah ding, kimakaih ding thupi mahmah hi.
Source:
James Newton, Uncommon Friends: Life with Thomas Edison, Henry Ford, Harvey Firestone, Alexis Carrel and Charles Lindbergh, 1989, p.22.
Hih Thute Manpha Sa Lua Ni Teh (Laibu)
Laibu Saal / Zomi eLibrary
