A KILIAM TAWMSAK MIHAIPA
Agelh ~ Rev. Tuan Suan Dal
Zeisu le a nungzuite gunkuang tawh Galilee tuili kantanin Gezata gamah pai uh hi. Tuipi tungah huihpi tuak uh a, ahih hangin tua huihpi pen sih nading le sup nading hi loin Zeisu vangliatna a kilat nading huihpi ahi hi. Zeisu thoin "Dai in" ci-in thu a piak ciangin huihpi nung tawpin dai pah hi. (Mk.4:39) Mi khempeuh in Zeisu lamdangsa uh hi. Tua khit a sawt loin Gezata lam tung uh hi. Zeisu le a nungzuite gunkuang tung pan a tuah
Tua pa in inn le lo, nu le pa le u le nau sanggam nei napi-in a omna pen han lak ahi hi. Banghang cih leh dawinin lut ahih manin a nu a paten puan pia taleh balkek hi. A paikhiat loh nadingin kol bulh taleh peksatin hanlak le mual tung tengah pum ot den hi. Zumhuaina zong a kiseelsak thei lo, om loh nading teng ah om a, thumal kician om lo a kikokote, tua pa bang hi kha ding hi. I sanggamte omna, i pianthakpihte kikhopna, Gospel paite lak, thungente lakah i kihel ding ahi hi. Zi neipa le mothaknu puan hoihpen tawh a kizep bangin i Pasian in hotkhiatna puan hong silhsak (Isa.61:10) pen suahkhia lo, balkek lo, ninsak kha het lo a i silh linlian den ding ahi hi.
Tua mihaipa a hai tungtuanna khat om lai hi. A dam sinsen a pumpi pen singzum, suangzum tawh kui-in amah le amah kiliamsaktawm hi. Tua pa a pil hi-in midang khat in a va liamsak kha hi leh heh mahmah in thukhen zum khawngah tun kha ding hi. Tu'n amah mi' liamsak hi loin amah le amah kiliam sak hi. Ute naute, ei dingin kibulh dih ni. Mi khat in suangzum khat tawh na awm hong kuih sisan sak leh bang na cih tam? Sagil tah loin niangtui tawh hong lut lohin kimaisak zo lo kha ding hi. Banghang cih leh sisan luanna thu pen thupi hi. Tu'n mihaipa amah le amah kiliamtawmsak! bangzah a hai mihaipa hi mawk hiam?
Tua banah mi khat in kongzingah nang hong manin hong lenin suangzum khat hong piak khit teh "Tu'n na pumpi kui in" hong ci leh na mang zo diam? Nat theih sih theihna gutui hai khat hong pia in "Dawn in" hong ci leh "Aw leh" na ci diam?
I gen mihaipa pen khanin in manin a pumpi susia dingin amahmah zang hi. Dawite sawlna bangin amah a kikuitawm, a kiliamsaktawm ahi hi.
Ute naute, hih mihaipa hai i sak mahmah sam hangin ei zong amah tawh i kibatna tampi om hi. Pasian in hong siangthosakin hong damsak kilkel khit ciangin A Kha Siangtho teenna biakinn a hong zat i pumpi pen kha gi-lote' thu i manna hangin lampi tuamtuam tawh i susia hi. Nang le nang in zakang na lei a, kuamah sawl lohin kisunin ne-in na tep hi. Zatep, tuibuk, khaini, zute lei-in nang le nang na kibak, na kitulh hi. Tua bang a gamtate pen hanlak a mihaipa tawh kibang hi.
Zatep' gu in cidam kimlai na sak hi. US leh UK gam a zato siamten cancer vei a site pen zatep' gu hang a cancer ngah ahihna mukhia uh hi. Adang hang a kingah cancer pen zatui tawh a dam tawmtawm om a, zatep'gu pan a kingah cancer pen zatote'n bawl thei lo hi. Zatep' gu pan lungtang natna zong kingah thei hi. Hih a lipkhaphuai mahmah cancer natna le lungtang natnate mi hong bawl hi lo, eima kibawl a kingah natna hi tazen hi.
Tua thute a tel gam le kumpiten a gam sungah zatep khaam uh hi. A tepte manin liausak uh a, thongah khum uh hi. Gam pawlkhatah zatepten a tep nop uh teh a kianga omte tungah phalna ngen uh a, a phal uh leh tepin a phal kei uh leh tep lo uh hi.
Kawlgamah meileng le motor tawh khual i zin ciangin khualzinte lakah zatep om thei kiukiu a, mipiten kien dimdiamin kihua mahmah hi. Ei Zogam pen kisuakta mahmah a, a kim a pam a te awlmawh se loin kikhah zihziah hi. Mi nuaiah i omna a kilatna khat hi.
Zu a nek zawh a sawtte a mel hong vom a, a ci liingin a sawt loin si hi, i theihsa tampi om hi. Zu tawh kisai Japante' paunak khatah "A masa-in mi in zu ne hi, a nihna ah zu in zu ne a, a thumna ah zu in mi ne hi" ci hi. Ka tan 6 kumin ka ni kiangah ka om leh a zuhuan kam khat hong ciamsak hi. Alang valhin a lang siakhia hi'ng. Banghang cih leh thak sauhsauhin kha pian lai hi. Zu a necil peuhmah in limsa pah het lo ding hi. Kiphatsakna tawh hanciambawl a, a kivalhsuk gawp dan hi.
Ahi zongin gil sungah zu hong tam pian teh a dangtakin zu in zu hong duhsak ahih manin zu kham khinten "kham keng" ci uh hi. Zu le zu hong kine hi. A tawpna ah zu in mi hong ne ta a, a mel hong vom gawpin a ci hong liing a, a sawt loin si hi. Zakang siatdan pen gen nuam vet khang. Tua ahih man i pumpi hong susia thei, cih thei gegu napi a zang teiteite pen "A kiliamsaktawm mihaipa" ahi hi.
Thu um tapidawten hih vante zang gen loh ciin loh zuak loh ding ahi hi. Ei pumpi ading a hoih lo na khat midang va pia, a va zuakte pen mibum ahi hi. I pumpi i it bang midangte i it ding ahi hi. Zanah ka ciin loh manin ci-al ka ngolh leh a ngawl hi ning, za hoih lo ka zuak loh man ka sumbuk a bei leh a bei hi hen, ci a Danzila bang a khensat ding Topa deihna hi (Dan.1:8). Danzila in zu le sa nek ding sang Pasian deih bang a nuntak ding a teelzawk pen sumh lo hi. Pasian' thu mang le'ng Ama'n daupaina, matutna, hauhna minthannate hong pia thei hi (Pau.8:18).
Han lak a mihai, dawi nin tampi a lutpa Zeisu tawh hong kimu hi. Zeisu in tua pa itin hehpih ahih manin dawite thu pia-in hawlkhia hi. A sung pan dawite a paikhiat teh tua pa a dam hi pah hi. Innah a nu a pa, a u a naute tawh om hi, puan silh hi. Khanin' vanzatin om nawn lo a, a damna teci pang hi.
A tunga i gen na hoihlote zatna, zuakna pan a a suakta zo nai lo dawi nin matte Zeisu tawh a kimuh ding kisam hi kha ding hi. Zeisu tawh a kimute'n thupha ngah lo in om lo hi. Amah samin na nuntakna ah na sem sak in. Na tungah na lamdang hongpiangin Pasian vangliatna hong kilang ding a, mihai dampa bangin teci panna na ngah ding hi.
Laibu Saal /Zomi eLibrary
Source:
Khanlawhna Hun
Jun.-Jul. 2012
