A KILAWM HUN-A KAMPAUNA. Agelh ~ GSPau

A KILAWM HUN-A KAMPAUNA

Agelh ~ GSPau

A kilawm hun-a kammal khat paukhiatna in ngunpeek tung a khamtang khat a kisuang tawh kibang hi.​​ 

(Pau.​​ 25:11).

Mipil taktakte in thu a gen uh ciangin a hun leh a mun en kawm sa-in, pilvang takin gen se uh hi. Saupi zong gen detdat se lo uh a, tomkim takin gen uh hi. Tua hang mahin paukhialh cih bang nei ngeilo pah uh a, a thugen un zong mite' lungsim su kha deuhin, muibun deuhse hi.

US gamah tualgal​​ (Civil war)​​ a om lai-in gal hangin mite dipkua, patau-in a om hun laitakin Fanny J.Crosby (1820-1915) in​​ “Safe in the arm of Jesus" (Jesu’ ang muan'huai ​​ sungah)​​ cih la ngaih mahmah khat hong phuak a, gal kidona sungah tua la hong kisak kawikawi ciangin mite in Jesu sungah lungmuan'na thak hong ngah uh hi.​​ 

Winston Churchil (1874-1965) a neu lai-in lai pillo lua ahih manin sang pan kihawlkhia hi. Amah England Prime Minister a suah ciangin tua sangte' Diamond Jubilee ah thu gen dingin kisam hi. Amah zong pulpit tung kahto a,​​ "Never give-up" (Lungkia ngei kei in)​​ cih kammal thum vei gen ziau hi. Hih kammal pen tom mahmah napi, minthang hi.​​ 

Galpi nihna lai-in Germany Nazite in Norway gam la khin uh cih thu England makaite in a zak uh ciangin patau mahmah uh hi. Tua hun laitakin Winston Churchill (1874-1965) in,​​ "Mual ah i kituah leh mual ah do-in, guam ah i kituah leh zong guam ah i do ding a, amaute i zo thal gawp ding hi,”​​ ci-in a mite hanthawn a, lai tawh zong hawmkhia hi. Tua kammal in a patau makaite leh galkapte hangsan sak tuam a, Germany Nazite zawhna-in hong neihlawh uh hi.

Galpi nihna lai-in Philippines tuikulh ah US galkap mangpa Gen. Douglas Mac Arthur (1880-1964) a om sungin Japante in tua tuikulh hong sim uh hi. Amah US ah a ciah nading thu tung lian a, a ciah ding ciangin tua tuikulh tung-a mite kiangah,​​ “Kei hong pai kik ding hi ing,”​​ ci-in vaikhak hi. Tua kammal pen Japante kihta-in a om tua tuikulh tung-a teeng mite’ adingin thaza hoih khat hong suak a, hangsan sak tuam hi. Thangah takin Japante a sim uh teh hong zo pah lian uh hi.

US gam New York ah Teen Challenge Ministry phuanpa David Wilkerson (1932-2011) in Road devil bupa Nicky Cruz kiangah Jesu’ hong itna thu va gen hi. Nicky in temkun tawh thah dingin a vau ciangin David Wilkerson in a awm dawh a,​​ “Nicky aw, hong that in la, ka sate at nen in. Tua hi leh ka sa themno khat nangawn in ‘Nicky aw, hong it ing’ hong ci lai ding hi,”​​ ci-in gen hi. Itna a lunggulh Nicky Cruz in tua kammal a zak ciangin a lungtang lawng a, hong pian'thak lawh hi.  ​​ 

1977 February kha sungin Lt.Col.Zam Khan Thang (Rtd) Yangon ah Party khawmpi a kah kimlai hong si dihdih a, a luang Tedim ah hong kipua hi. Amah pen milian khat ahih manin Zomi bup kilinglawng zo phial hi. Nitak khat Rev.​​ Hau Lian Kham in misi inn-ah​​ "Sihna tungah gualzawhna"​​ thulu gen a,​​ "Hih bang hunin Honpa i kisam"​​ cih solo zong sa hi. Siapa pen Topa' mizat khat ahih banah, mite' lungsim a neu hun laitak ahih manin a thugen leh a lasakte in mi' lungsim sukha mahmah a, milian pawlkhat bang in pian'thak lawh lian uh hi. Siapa in a hun leh a mun enin thugenin, lasa ahih manin lawhcing ahi hi.

2008 kum US President kiteel lai-in Barack Obama in a mee zon'na ah​​ "Change"​​ (Kikheelna)​​ cih bulphuh hi. Tua pen a lui a cimtaak, a thak pongpong a lamnaih khangnote in diksa uh ahih manin mee pia pah ngeingai uh a, tua tawh Obama in US President hong ngah hi. 2012 kum kiteel ciangin​​ "Move forward" (Mai lam nawt)​​ cih hong bulphuh leuleu a, tua tawh President hong ngah leuleu hi. A hun tawh kizui-in thubulphuh nei thei ahih manin tua tawh mite' lungsim zo mahmah hi.

2008 kum May kha sungin Irrawaddy Division sung tengah Nargis huihpi hangin a si, a mang tampi om ahih manin mi khempeuh dipkua, patau-in om khin uh hi. Tua pen Pasian' naseem pawlkhat in hun hoihin zatsiam uh a, Lungdamna thu a gen uh leh lawhcing mahmah uh hi. Hih pen tuhun pau-in khapilna khat hi gige hi.​​ 

Ni dangin Co-oprative zum-a seem, Phaileeng khuami Pa Zen Khan Cin in Party Regional Committee Chairman Pu E.K.Kim Ngin kiangah Matupi pan Tedim ah a piaung​​ (transfer)​​ sak nading va ngen hi. Pa Cin in,​​ "Pu aw, nang pen Zogam kumpi na hih manin nang, hi hen, na cihte ahi, hi pah lel hi. Nang, Pasian simloh kua dong nawn ding na hiam,"​​ ci hi. Tua kammal in Pu E.K.Kim Ngin lungkim sak mahmah ahih manin tua ni mahin Tedim transfer theih nading vaihawm sak pah hi. Pa Cin pen a hai tawh a kibat hang, a taktakin a pil khat na hi gige hi.

Pasian' naseem pilvangte in inn thunget a pai uh ciangin innteekte' thu pulakna limtakin ngai uh a, tua tungtawnin hanthotna pia se uh hi. Tua pen a hun tawh kizui ahih manin muibun deuh a, tha zong kingah deuh se hi. A pilvang lote in bel innteekte in bang teng pulak uh cih​​ khawng ngai se lo uh a, inn pan amau' kigin'sa khat peuh gen ziau thei uh hi. Tua dan pen tha kingah lo zaw den hi.

Mihingte pen i vaang a bei kuan, i hun a bei kuan teh kipau khial nuam deuh, ci-in kigen hi. Kawlgam kumpi U Ne Win pen kampau siamin a kigen khat hi napi, July 23, 1988 ni-in Party khawmpi ah,​​ "Party khat tawh khangto lo ihih leh party tuamtuam (Multi Party) tawh kalsuan ding i ut hiam?"​​ hong ci kha laizang hi. Tua ama' kammal tungtawnin Kawlgam hong kilumlet a, ama' hun a bei hong hi ziau hi.

Laibu Saal / Zomi eLibrary