A Kikhel Ngeilo Minam Min
Agelh ~ LTTuang
Ciimnuai hun lai Ciimnuai mah khua lianpen ahih manin Ciimnuai gam, Ciimnuai mi, Ciimnuai tate ci-in la na kiphuak hi. Ciimnuai mah tawh kitheipen ahih manin Ciimnuai mi mah na kici ziauziau hi. - Ciimnuai khuami, khuasuak, khualal pan aa suanlekhakte pen Ciimnuai tate kici diak hi.
Tua Ciimnuai tate mah Pu Kam Hau hun ciang Pu Kam Hau mah kitheipen ahih manin, Kam Hau mi, Kam Hau gam na kici bek thamlo, Kam Hau upadi nangawn na ci liang uhhi. - Kam Hau mah kitheipen le tua ukna gam sung aa om hihna tawh Kam Hau mi na kici diak leuleu uhhi.
Tua Kam Hau mi a kicite mah in Tedim pen khua lianpen hong hih ciang, Tedim mah a kithei pen ahihna tawh Tedim mi, Tedim pau, Tedim gam ci aa kigen hun hong tung leuleu hi. - Tedim khua pan aa te bek thamlo, a kiim a paam aa khuatate baanah, Tonzang khua pan aa te nangawn le tuate ii suanlekhak ahi mundang gamdang pan aa te nagawn in namdangte tawh kihona ah Tedim Chin mah na kici uhhi. - Township zui aa kigenna kilim zat mahma ahih manin, Tedim maw Falam te maw Khalkha pau maw cih bangin Township khuamin zui aa kilo hi. Pauleham ngeina le minam kibatna tawh Tonzang township lam pan aa te nangawn pen Tedim Chin ci aa kigen lai uhhi.
Chin state pen Myanmar gambup ah a kithei state min khat hi aa, tua pan aa minamte pen mundang namdangte tungah Chin mah kici-in na kipulaaksuk ziauziau uhhi.
Hong kitheihpih diak ding khat tawh kipulaakna kizangh thei hi. A kitheipen khat tawh kigenna kinei ziauziau kha thei hi.
Myanmar gam omma in Ciimnuai le Tedim cih khuate bek thamlo, i pu i pate in khua tampitak na sat khin uhhi.
Tua pupa satsa khuate, i pu i pate phutsa gam pen British gamkeekte in hong laakna pan Chin Hills, Chin People pen hong kizangh hi.
British gamkeekte khut sung pan minam dangte tawh suahtakna lakhawm aa Myanmar gam i phutkhop ciang, Chin Hills pen Chin Special Division in kiciamteh hi. Tua khitciang Chin State in kikhelto hi.
British gamkeekte khut sung pan suahtakna laak khitciang, Kawlte ukna nuai kitung hi.
Kawlte ukna nuai ah Kawlte bawl pilsinna sang kikah kha hi. Tua sang a kah manlo, i pu i pate le Kawlte ukna nuai ah a omlo, Kawlte pilsinsak ahilo India gam lam aa i sanggamte in amau le amau Chin na kici ngeingeilo uhhi. Tua ahih manin zongh Chin min tawh na buailo pah uhhi.
- Kawl galkapte sinsak sanglai thei a kisate diak in Chin min pen poi salo deuh uhhi. Chin min pen politics (Gamvai) sep nadingin ngaihsutna a nei zong ki-om hi. Chin min pen gamvai bek thamlo Minamvai ah zong zat ding phamawh a salo ki-om hi.
Ciimnuai than lai Ciimnuai mi kici, Tedim than ciang Tedim mi kici, Kam Hau than ciang Kam Hau mi kici-in a kithei bangbang tawh kisapna kilawhna kigenna kipulaakna kinei suksuk aa Chin zongh zadah hetloin Chin kicih hun na om ngeilua hi. Khamtung gam ah ateeng hihna tawh Khamtung mi kicih hun zongh na om lai hi. - Hihte pen official min ahi aa ahikei zongin, akhang akhang zui aa hong kitheihna, i kigen, i pulaakna min tuamtuamte ahi hi.
Tuhun ciang, pilna khuamuhna le thu ngaihsutnate hong khang, hong zai semsem ta ahih manin ei kua, ko kua cih kipulaak phat nopna hong khauh tektek ta hi. Tua ahih manin hong kitheihpih nailo, ni dang pan aa a kizangh munlua ahi hetlo Zomi cih pen minam min dingin hong kilim gen saansaan hi. - Hong kitheihna sa min tawh gamvai a sem ziau nuam, minamvai ah a gamtang nuam lel zongh om hi. Alang khat ah hong kitheihpihsa min, hong kiciaptehna sa min a deihlo i hihna taktak mah pulaak ding phungvuh ding ci-in a kigen nuam zongh hong om hi.
Hun kikhelsim phialin kipulaakna, kigenna, hong kitheihna min a kikhelkhel kawmkal pan khel vetlo aa minam min dik, limtakin a na kem suak, a na zangh suak zongh na om veve hi. Pu Kam Hau hun lai-in Kam Hau mi a na kici nuam hetlo beh (tuhun hi leh namke) pawlkhat na om veve hi. Kam Hau gam a ci nuamlo teltal mah na om uhhi. Tua hang mahin zongh, Kam Hau gam pan taikhia aa, tuhun India gam, Manipur gamke lam a na zuan tampi na om uhhi.
- Tua ahih manin, minam min omsa khat khel ngeiloin a na zangh suak, citak takin a na kem suksuk, a na pom suakte ii minam min pen Chin kicihma, Tedim mi, Kam Hau mi, Ciimnuai mi kicihma pekin i neih, i hihna dik, i minam min taktak hi ding hi. Ciimnuai hun ciang Ciimnuai, Tedim hun ciang Tedim, Kam Hau hun ciang Kam Hau, ZBC hun ciang Zomi cih bangin a na kikhel themthumlo pen "Zo" cih min bek ahi hi.
- Tua ahih manin, Zomi/Tedim mi a kici sung pan Zo cih pen namke min daan khat ciang bek hilo limlim ding hi. Minam mindik hoihtakin a na kem suak, Zo a na kicisuakte ii neihtuam min zongh hi hetlo ding hi. Zo kicih ding pen Zo a kici suakte ii minam min zatpihna hilo aa, min a khel kawikawi ngei Zo minamte mah in a kikhel ngeilo minam min a kineisa pen mah a zangkik hizaw ding hi.
- Pau le ham tawh minam kikhen theilo hi. Zopau a zangh le Zoham a zangh kibanglo bek hi. Pau kitheihloh, kibat gaihlohna pen minam dang hihna hilo hi. Zopau theilo khangthak tampite zongh minam dang hilo aa Zosuan mah hi veve uhhi.
British te hong ciaptehna, Kawlte hong lawhna, minam dangte hong sapna min i deihkei hi. I pu i pa te hun lai aa, a hun zui-in a kikhel suksuk min tuamtuamte zongh i zangh nuam nawnkei hi. Tua ahih manin a na khel themthumlo, kiptakin a na kikem suksuk, tangtakin a na kizangh suaksuak min mah i minam min dikpen/maanpen hi kha ding hi.
> I ngeina pauleham kammalte aa kipan i Zolate dongah a ki mangngilhbawl theilo, a kinelhsiah theilo, theilo kipan ding a kingah vetlo kammal zongh "Zo" cih kammal mah ahi hi.
> Tangthu le ngeinate bek thamlo, pilna khantoh hunah zongh, Zolai pen gelhzia(grammar) diktak tawh gelhna ah Zo mah bulphuh lehang grammar diktak/maantak tawh kigelh theipen hi. Tua hikei leh, a khiatna kithuap gawpmang thei hi. Gtn. Zomi Nam Ni = Zomi National Day = Zomi Minam Ni (mi cih kammal kibang khat kithuap ta hi.)
> Lai gelhzia(grammar) bek thamlo, lai letzia(translation) ah zongh Zolai pan Kawllai/Manglai OR Kawllai/Manglai pan Zolai ah let di lehang, Zo mah bulphuh lehang lempen hi. Tua hikei leh, a khiatna kitukalh gawppaat thei hi. Gtn. Zovok = Zomi Pig = Zomi vok (mi lah ci vok lah ci, kitukalh ta hi.) Zolai = Zomi Literature = Zomi Lai (mi lah ci lai lah ci, lai lehletkikna ah kitukalh hi.)
- Lai gelhzia le kam pauzia tawh Zomite buai danin Mizote zongh a buai khakloh nading Mizo mi masate in na mu khol uh, na ngaihsun khol thei uh ahi kha diam cih nop huai phial hi. Mizote in Zo bulphuh aa laibawlna, kampauna cihte ah a lem dingin Zomi pen lakam bang khatin Mizo a na ci uh ahi kha diam?
> Ciimnuai, Kam Hau, Tedim, Chin a kici suksukte bek thamlo, sanggam Zosuan dangte zongh, a minam min uh a na kikhel suk veve pawlkhat na om kha ding hi. Tuate zongh a minam min uh bul kanto lai lehang Zo mah ah tukik lai veve kha ding hi. Israel minamte zongh Jacob/Israel ii suan teng hi aa, tua a pu uh ii min pen a minam min, a gam min uh zongh hipah hi. Tua dan dingin Pasian’ phuahsak, a piaksa min ahi hi.
Note: "Gamvai le Minam Min" cih article pan tawm kong hopsawn hi.
Ldam LTTuang
