St Francis Hospital Va Tung Vat (August 17, 2023)
US ah Ka Muh Khak Pawl Khat (Azom)
Agelh ~ Awn Za Pau
August 17, 2023 ni in zingsang ka thawh ciangin awng ka pai leh ka lu hong vaii vat in ka vei ka tak ah ka puk dekdek hi. Ka khut tawh kawmpeekte dom kawm hi kei leng kei leh kei a khuangkhoh zo nawn lo dan ka hihi. Hoih takin awng ka hawh thei bilbel a ka lupna zong ka zuan kik thei bilbel hi. Tua ni pen ka tute gel sang kah kipat ni hi a, kei mahmah in sangah khak ding cia ka lawp mahmah ni ahihi. Ahi zongin ka lu vaihna pan lum hithiat leng bangmah ci lo napi neukha thoto in tu din kithawi leng ka lu hong vaii nuam pah lian hi. Dingto leng suuk semsem hi. Ka lungnuam lo in bp ka teh leh 190/100 phial na hi mawk hi. Kei zong ka zatui neek ngeite ne pah cingtengin ka si khang om nawn lo cia, kha nih sung bang ka neek nawn loh lisinopril 30mg ka ne pah samsam hi. Ahvan nu’n (Dr Huai Lun) in thanpaya tui hong suuk sak pah a, tuateng ka dawn khit zawh ciangin muihza tutphah (couch) tungah thallup ditdiatsa in ka tawlnga hi.
Bangbang ahi zongin tua ni peuhmah zato ah kilak hamtang dingin ka khensat ta uh a, ka tanu Lun tawh St Francis Hospital Emergecy Room (ER) sun nai 2:00PM in ka kilak uhhi. Ka tun phet uh a sawt lo in Registration hong bawl pah uh a, ka admission ngahna tawh FALL RISK ci’n ka khut ngawngah anihtakin hong bulhsak pah hi. Tu ni a St Francis Zatopi ka tunna uh a nih veina hi a, July 03 to 05, 2016 in zong ka tung ngei hi. Tua lai in zong lungtang tawh kisai a lak ka hi a, bangmah poina om lo hi hong cihsa ahihi.
Ka tun zawh a sawt lo in, Blood Pressure, Height, Weight leh Blood test bawl nang si hong laaksak pah hi. Tua zawh ciangin ECG – Electrocardiography hong la pah uhhi. Tawlpi khat khit ciangin CT – Computed tomography hong la leuleu hi. Tua sung mah ah X ray tawh awm sung teng zong hong la leuleu hi. Hih teng khempeuh ka man khit uh ciangin ER ah ka ngak niloh uhhi. Tua lai ah kei sang a, a uham zaw ding nih leh thum bang ka mu a, amau zong gim mahmah kisa in atut dan uh kikhelkhel hi. Kawlgam bang danin a phunphun kua mah om se lo in tu ngiungeu geuh uhhi.
Nitak nai 2 a kakipat uh nai 10 sung vilvel ka ngak khit zawh uh zan 12.00 Mid-Night a sat ngawngaw ciangin, Siavuan tawh kimu dingin hong sam petpet uhhi. Siavuan tawh ka kimuh uh ciangin keima cidamna tawh kisai a sia lawmlawm om lo in ahoih gai ding mahin hong gen hi. Ka Siavuan uh pen mivom numei khat na hi a, bangbang ahi zongin etthuahnopna om lai ahih teh zato na lup phot uh kul ding hi ci’n ka lupna khan ding uh Room # 3319 ah hong tuah pah dildel uhhi. ER a ka om lam ahong theih ciangin ka nuphalpa Pa Thangno (Pa Mang Lian Thangte nupa) leh a tapa u pen Khup (Tg Zam Za Khup)te in nitak nai 5 khawngin hong delh uh a, zan 12 dong mah hong tutpih niloh hi. Zato hong lupsak ding ka theihsak zawh uh ciangin amau zong zato pan a ciah pan ahihi.
Ahih hangin tua lupna khan pen, akisam van leh computer te khempeuh bangmah ki set-up nai lo(zat theih pah dingin kibawl nai lo) ahih manin nurse tavuan nei nu’n a kisam teng a bawlbawl phitphet nateng tawh zingsang nai 2 mah hong sat hi. Ko zong ka tapa Sya Kap tawh ka lum pah uh a, zingsang nai 3:10 ciangin MRI – Magnetic Resonance Imaging la ding ci in hong phong biangbuang leuleu hi.
MRI ka kizaih khit dikdek zawh ciangin zingsang nai 4 bang hongsatta a ka lum kik pah uhhi. Zingsang nai 8 satin ka tho leuleu uh a, ka thawh lim mahin ka om dan hong nuamin ka dinkhiat ciangin zong ka lu vaii nawnlo hi. Awngah zong kuama let kul nawnlo in kei kia ka pai thei viauviau ta hi. Hih bang hi mawk leh a damta hi mawk lo ka hiam ci’n ka lung anuam peuhmah hi.
Zingsang nai 10 ciangin ka nuphalpa Sya Lianno in vaimiim cim huan a lim mahmah leh tangkha kan hong puak phei hi. Thu hong ngetsak khit ciangin amah zong vaii a tuamtuam nei ahih manin hong ciahsan pah hi. Tua zawh ciangin Kamnute Lunte nuta, ka nuphal Thangnote innkuan leh Biak Sungnu Hau Lunte nuta(Honnu tawh) zong hong tung leuleu uh a, ka khan sung teng mah a dim phitphet ka hi uhhi.
Sun nai 2 hun khawng ciangin Lawrence Lee kici siavuan khat hong pai leuleu a, zatui na neek laitakte banah kong piak thuah ding bangmah om tuan lo hi. Ahi zongin hoih tak phatak a na ihmut theihna dingin zingsang, sun, nitak na lup ding ciang a na neek ding tawh ni khat thumveita na neek ding Meclizine 25mg zatui hong pia ning hong ci hi. Dot nop na nei hiam hong ci a, kei zong kong dot ding thei nawn tuan keng ka cih ciangin, thu hong ngetsak in, zato pan ciah theihna ding phalna zong hong pia pah hi.
Kei zato lup vai tawh kisai, ER a va kilak kim lai midang cina zong na tam peuhmah ahih manin, nai 10 sung bang ngak cih pen cina gim mahmah khat hi leng a baih zeeng ding hi lo hi. Tua ahih manin ka mipih Zomite aw, tuhun ciangin US na-ngawn ah cina en ding kicing zo taktak lo veve ahih manin cina gim mahmah a, zato zuat na sawm leh 911 mah sam tangtang zaw in. Tua hi leh cina pua mawtawte tawh hong pai in hongpi pah ding ahih manin, zato na tun limtakin a manlang theithei in hong don hong bawl masa pah zaw ding uhhi.
