Zomite Om Dan Khawl Dan Gamtat Luhek Dan
US ah Ka Muh Khak Pawl Khat (Azom)
Agelh ~ Awn Za Pau
Ei Zomite pen numei pasal om dan khawl dan ih siam naii mahmah kei hi. Ke’n khialhna bawl kei ngawn peuh leng ci in midangte hong muh dan ding hong ngaihsut dan ding tawh ih saikak thei hetkei hi. Gentehna in, pasal ahih kei leh numei tuaktuak na hih kei uh leh mawtaw tungah nih guak na tuan uh ciangin, a hawlpa’/nu na sanggam, na pa/nu, na pasal/zi ahih kei ngal leh amai ah tu khawm lianluan kei zaw in. Anung passenger seat ah tu khinkhian in.
Tua mah bangin na pasal/zi om loh kal in zankim zan khang in hita leh sumkamh laitakin, pasal/numei lengla khat peuh tawh tu ni loh kei in. Midangte in a ngaihutna tuam tawh hong mu thei ding uhhi. Tua bangin kinaii tak a ih om luat ciangin, ih gitneih het lohpi mawhna zong hong piang thei zanzan hi. Hih lamah zong Zomi sungah kituaktuak ta hi. Kawlten’ a paunak ah “um leh beel koih khop kibi thei (kitam thei) leh “khau leh khau koih khawm kikai awk thei” na ci uhhi. Tua ahih manin numei khankhinsa omna ah pasal khankhinsa ahawh ding ciangin, ahi zongin, numei khankhinsa khat pasal khankhinsa kiangah ahi zongin kihawh kilengnat pen kidophuai hi. Mi muhna pan a tuamtuam in sansat thei zanzan ding hi. Bangbang hi leh kihawh kilengnat nop ciangin phone tawh kihopih masa leng hoih pen ding hi. Numei kia om laitak pasal khat hawh a sawm leh zong, ka pa uh a om ciangin hong hawh zaw aw, tua mah bangin numei khat pasal khat kia om laitak hawh a sawm leh ka innkuanpihnu a om ciangin hong hawh zaw aw cih ding ahihi.
Na kimaingap tateu uh zongin na pasal/zi kihel lopi in na veengte zi/pasal tawh sumbuk pai ahi a, zingsang tungg lamsiau/walking , ahi zongin kinakkholh lua se kei in. Ken khialhna bawl kei na ngawn ing cih tawh na gamtatna ahih hangin, midangte muhna ah kilawm hethet lo hi. Midangte in a tuamtuam in hong ngaihsun ciat ding uhhi.
Kawlte a kipan a khangto gamte ah a diakdiak in numeite bang a lawmngaih leh a pasal bekmah a omna a khawlna a vahna a ciahna ah pom pah vinven uhhi. Ko a nupa hi ung, ko lawm kingaisa zuthawl kipiasa hi ung cih, gengen a kullo nawnlo zah dongin kilangh sak pah tangtang uhhi. Tua mah bangin group photo khawng kilaak ciangin nupi/papi pawl khat kithukhualsak akidiksak cih bang danin a pasal/azi kiang lam zuan lo in, tuam om thei lai mawk uh a, a gei akiang a om khat peuh na kawi ahih kei leh akhut khawng na len lenglang thei hi. Pasal neisa, zi neisate tungah a pasal/azi ahi lo midang khat in tua bang a, gamtatnate etlawm taktak khollo hi.
Zo numei/pasal pawl khatte in khat peuh tawh thu a gen ciangin, a kihopih nu/pa khut ahih kei leh mun khat peuh sawk ahih kei leh lawng kawm thei uhhi. Tua zong numei hoih lote leh pasal zualzangte gamtatna tawh kibang a zat hethet loh ding ahihi.
Kawlgamah pasal leh pasal numei leh numei kikawisa in zong thu ih gen tangtang thei hi. Hih lamah pasal/numei tuaktuak khat leh khat kinaii tak a kikholh pen “langnih hiam” (gay or lesbian) din kingaihsun pah a, tua bang dan a midangte hong theihkhialh theih zah dong ding a ih om loh ding thupi mahmah hi.
Bangbang ahi zong gam nihna pan hong tungcilte hi ta leh, gamke dang khat pan mundang gamke na lal ciangin ahi zongin, a khuasung thu theihhuai a tuamtuamte hong gen thei ding, a na tual telsa na lawm na gual dong cian masak ding kisam mahmah hi. Bangmah thei cian tum ngeii lo kipil sak in nang ma thu tawh gamtang phangphang dingin kong awi kei hi. A theisa a pilsa a suak kuamah om lo hi. Maizum ngaihsut ding hi peuhmah lo hi. Khat leh khat ngaihsutna kidotna leh ngaihsutna kipiakna pen haina vaii hi lo zaw in, mipil mi picingte zat mahmah thu khat na hi gige zaw hi.
