Gymnasium Kici Tha Laakna Mun
US ah Ka Muh Khak Thu Pawl Khat (Azom)
Agelh ~ Awn Za Pau
A taktak thalaakna mun cih ciangin tha leh ngal tawh nasep ahi lo zum sung vive a nasemte a’dingin, ci leh sa damna dingin kisam mahmah phadiak hi. Pawl khatte a’dingin cidamna ding ciang bek hi lo in, pasal numei duangsuah hoihna ding, a thauluate a gawn kik theihtheihna ding ahi zongin, pawl khat leuleute a’dingin khut le baan, phei leh tan cihna tengah akilawm zah ciang sagaap akilawmzah ciang neih theihna ding cih akipan ei deih dandanin kisin theihna ding a tuamtuam na bawl uhhi.
US kumpi in kum 65 ka phaak zawh ciangin Medicare hong ngahsak a, tua tungtawn in Tulsa khuasungah a minthang leh ahoih penpen ‘Life Time’ kici gymnasium ah akhong hithetin lut theihna (free admission) ka ngah thei hi. Tua lai ah
Thalaak(exercise)theihna a tuamtuam, a namnamin om hi. Tuate ih man khit zawh ciangin,
Spa (Sanus Per Aquam – health by or through water) kici Latin pau hi a, tuisa tawh kidiahna pan damna cihna hi,
Tuikhu lum 105F vive tawh kidim inn khan,
Khua-ulsa suahsuah theihna ding 105F bang a sa inn khan,
Indoor and outdoor swimming pool cih bang kicing takin om pikpek hi.
Tuate khempeuh nang utna sansan pan na man zawh ciangin kisilna ding zong kicing takin om hi. Na ha na nawtnop leh haza leh hanawtna inn pan na ken kul a, tua lo mukmul kiatna, kam khuahna leh kisil ciang a kinulna ding dialgol(towel)te zong kicingtakin kikoih dildel hi.
Ih kimawl sungin ih van puakte Locker Room acihna puankhekna munah kikoih thei hi. A pai khempeuh in locker sungah avan uh koih gai sam lo uh a, zong kisil gai lo uhhi. Tua bang hi kei leh khat veivei awng lo thei maii takpi ding hi. Ahi zong a pai khempeuh kisil hi lo aa, a tam pen 30% khawng hi bek ding hi. Pasal leh numei khan a tuam in a omsak banah numei naupang tawh kithuahte adingin Family Room ci’n numei leh pasalte zattheih dingin mun khat tuakin khen beh lai uhhi. Zum nasem pawlkhatte bang zingsang nai 5-6 in tungin aman khit uh ciangin kisilin a zum puan uh tawh kilaih in a paisuak dildel zong tam uhhi.
Kisilna sungah mikangte aguaktang vive in pai emem lel uhhi. Pasal duang kikhai atha hoih mahmah dingdiangte bang etlawm lua mahmah kasa mai a, mit hemin ka ensim khakha thei zanzan hi. Mivom om sunsunte leuleu ciangin amau zakloh kalin kihhuai kasa mai hi. Mikangte leuleu ciangin duang kikhai ngiingeii bek hi lo in a meel uh hoih lai, ngo lai, a pasal van uh bang peuhmah amau pumpi mah tawh kituakin etlawm bek tham loh in ei a’bangin vom neiinaii lo in kang heuhau lai mawk hi. Numei hi lo pasal tektek ih hih hangin pasalte in numei duang hoih mahmahte guaktang a ih muh bangmahin, numeite ding bang khat a, ih ki-ngaihsut ciangin iplah huai mahmah phial mawk hi. Mikangte mul pen a san siuseu a om mah bangin ei a mah bang aciik vom mahmah zong om kawikawi hi. Pawl khatten meettol siang kiuhkeuh ta lailai uh hi.
