ZINGSANG TUNG HIH DING PAWL KHAT
Agelh ~ David Thangkhek
Mihing khat’ nuntakna sungah zuih ding leh ci’n ding thupi tampitak na om hi. Tuate sungah nikhat sung nuamtak in ih zattheihna dingin zingsang ih kipatzia na thupi mahmah hi. Tuate pawlkhat ensuk ni.
1. Zingsang Thobaih Ding
Zingsang thawhbaih ding hanciam in. A thohak den mikhat a dingin haksa kha ding himah leh kisin leng a kizongsang thei zongsatna hoih khat ahi hi. Zingsang thawhbaihna in hun kicingsak, lungsim navaksak, cidamsak hi. Misang a khangto zawte thobaih den uh hi.
2. Phone En Masa Ken
Zing thawhlim a phone etna in vaitampi kipelhsak hi. Tua ban ah social media te panin thuthak hoihlote in lungsim nawng kaisak thei hi. Sun tawntung lungsim siangtho takin na kantan theihna ding phone en masa kei in.
3. Kimawlna Bawl In
Zingsang na thawh tungin kimawlna (innpua ah tai, diang, siksakol tuang, khutlehkhe tangsak) a tawmpen minit 15 peuhmah bawl hamtang ding hoih hi. Tua in na lungsim hong navak sak, sisan paizia maan sak bekthamloh in khua-ul teng a tolhkhak ciang sisan siangtho sak in pumpi cidamsak hi. Nanglehnang zong kimuanna hong khangsak thei hi. Sumtawh kilei zolo cidamna hong ngahsak ding hi.
4. Thungetna Nei In
Zingsang tung pen na lungsim zong a siantho pen hun ahih manin Pasian tawh holimna bawl ding a hoihpen hun zong ahi hi. Tua bek hilo nikhat I kipatna ahih manin lungdam ko a, masuan khempeuh zong Pasian mah ap masa hilecin na mavang in na daupai ding hi. Na dang khempeuh sang Pasian masakzaw in.
5. Sunsung Nasep Ding Geelkholhna Bawl In
Sunsung bangteng sep ding om, bangteng sem leng kilawm ding cih geelkhol inla, laidal ah gelhkhia in. Tua hileh mangngilh thimthumna, sepkhialhna cihte pan kipelh in mavang ding hiteh. Hihpen mikhuasuak ding khat in sep ding a phamawh thupi khat zong ahi hi.
6. Tui Tampi Dawn In
Tui dawnna in pumpi tung a tui hoihlo teng khekkhia in pumpi sung siangtho sak hi. Bekthamlo in cilehsa zong nosuak sak hi. Tuidawnna in cidamna ding akisam mahmah nasep ahi hi. Zatui hoih a zangh na hihlam kiphawk gige in.
Hih bangin zingsang hun zangh den lecin cidam in na khansau ding hi. Na nuntak sung minuai ah na om kei ding hi. Haksalo a hih manin kisin in zatpah ding kong deihsak hi.
