JESU NAUSEN LAI TANGTHU (INFANCY NARRATIVE)
Agelh ~ Lian Muan Kham Suante
THUPATNA
Jesu neulai tangthu tawh kisai-in kan ding thu tampi om hi. Gentehna-in, (a) ‘Kha Siangtho in Mary a gaisakna thu (virgin birth) pen a om thei takpi mah ding hiam?(b) Jesu suah hun lai a kumpi pen Kaisar Augustus ahi takpi mah hiam?, etc.’ cih bang dotna te om thei hi. Ahi zongin, tutungin tua bang thute kikan loin, Jesu neulai tangthu (a diakin a suahna tawh kisai thu) panin ciaptehhuai thu pawlkhat a om te kigenzaw ding hi.
Lungdamna Thu bute i sim ciangin, Synoptic Gospels-te lakah zong Matthai leh Luka bekin Jesu suahna thu pen ciamtehna nei-in, Marka sungah muh ding omlo hi. Tua ahih manin, hih laibu sungah zong Matthai leh Luka in Jesu suahna tangthu a ciamtehnate etkakna kinei-in, a deihna pawlkhatte zong ki-en ding hi.
MATTHAI LEH LUKA ETKAKNA
(a) A Kibatna Pawlkhatte: Jesu suahna tawh kisai-in, Matthai leh Luka-te ciamtehna panin a kibatna pawlkhatte ciamtehhuai hi.
Jesu nu le pa pen Mary leh Josef ahi uh hi. Mary leh Josef-te zuthawl kipia khin hi napi-in, Mary a gai dongin amaute lumkhawm lo uh hi (Mt. 1:18=Lk. 1:27, 34).
Josef pen kumpi David Suan hi-in, vantungmi-in Jesu pian ding thu pen tangko hi (Mt. 1:20 = Lk. 1:27, 32).
Mary pen Kha Siangtho’ gaisak hi-in, a pasal tawh a lupkhopna hanga gai hi lo hi (Mt. 1:18-25=Lk. 1:34-35).
Vantungmi-in a suak ding naungek min pen Jesu hi ding hi, ci-in gen hi (Mt. 21=Lk. 1:31). Amah pen Pasian Tapa (Mt. 2:15=Lk. 1:35), gumpa-le-honpa (Mt. 1:21=Lk. 2:11) ahihna thu zong gen hi.
Jesu pen Bethlehem khua ah suakin (Mt. 1:21=Lk. 2:11), ahi zongin Nazareth khua panin khangkhia hi (Mt. 2:22-23 = Lk. 2:39, 51).
Jesu suah hun lai-in a vanglian mahmah Herod-in Judah gam uk hi (Mt. 2:23 = Lk. 2:39).
(b) A Kibatlohna Pawlkhatte
Matthai sungah Elizabeth, Zechariah leh tuiphum Johan suahna thute kikhum lo hi (cf. Lk. 1:5-45).
Matthai sungah Jesu suah ding thu pen Josef kiangah kitangko in (Mt. 1:20), ahi zongin Luka sungah Mary kiangah kitangko hi (Lk. 1:31ff.). Tua banah, Matthai-in Josef nuntakna pen uang genzaw in, Luka in Mary tangthu tam genzaw hi (cf. Lk. 1-2).
Matthai-in Jesu pa Josef pen kumpi David Suan ahihna thu genin, Josef tungtawnin Mary pen a kitheitawm pan ahihna thu zong kimu hi. Ahi zongin Luka sungah Mary pen Josef tungtawn a kithei hi loin, Pasian in Mary kiang tektek-ah “maipha ngahnu” ahihna pulak hi (Lk. 1:30).
Matthai sungah, Mary pen a pasal Josef lakah a kiniamkhiat mahmah leh kamkhat bek zong a pau loin kigen hi. Ahi zongin Luka sungah Mary hoihna leh dikna pen kilimgen mahmah hi. Tua mah bangin Mary’ Phatna La (The Magnificat, cf. Lk. 1:46-56) pen Matthai sungah kimu lo hi.
Luka sung a kimu lo, ahi zongin Matthai sungah aksi kilatna, mipilte hawhna, naungek a kithahna leh Izipt gam taina thute kimu hi (Mt. 2:1-17).
Matthai-in Jesu pen, David Suan ahihna thu a lahnop ahih laitakin (Mt. 1:1ff.), Luka sungah tua bang thu bangmah kigen lo hi. Gentehna-in, David Suan ahihna pen Matthai-in Jesu khangthu (genealogy) a sutna sungah kimu in, ahi zongin Luka sungah Jesu khangthu sutna thu bangmah kikhum lo hi.
2. JESU NAUSEN LAI TANGTHU IN A LAHNOP THUTE
Evangelist-te in thu pen mawk gelh loin, deihna kiciantak nei kawma a gelh uh ahih manin (tua pen a tunga kigensa redaction criticism tungtawnin kithei thei hi), Matthai leh Luka sunga Jesu suahna tangthu a kigelhna in zong deihna pawlkhat nei-in, tuate a nuaiah i gen ding hi.
(a) Matthai Gelhna Panin
Matthai-in Jesu suahna pen Thuciam Lui sung a kamsangte genkholhna a tangtunna hi, ci-in lak hi. A diakin, hih thu pen Matthai-in Thuciam Lui sung a kamsangte kamsan’na a gensawnna (quotations) panin kithei thei hi. Gentehna-in, Matthai 1:22 sungah “Topa in kamsangpa (Isaiah) tung tawnin a gensa thu a tun’ theihna dingin hih thute a piang ahi hi” ci-in kigen hi. Tua mah bangin Matthai 1:23 pen Isaiah 7:14 pan a kilasawn hi-in, Matthai 2: 5-6 pen Mikah 5:2 sung panin a kilasawn ahi hi. Kamsangte genkholhna bang a Jesu pen hong suak ahihna thu Matthai lah nop ahi hi.
Matthai-in Jesu pen David Suan ahihna zong lak hi. Amah in Jesu khangthu pen Abraham panin kan suksuk in (Mt. 1:1), David Suan ahihna pen teltakin lak hi. Bang hang hiam cih leh, Judahte in Messiah pen David Suan hi dingin tuatna nei uh ahih manin, Jesu pen Messiah ahihna a kilah theihna dingin David Suan ahihna pen Matthai-in kician takin gen hi.
Matthai-in Luka bangin numeite pahtakna thu tam a gelh kholloh hangin, numei pawlkhat min muh ding om hi. Gentehna-in, Jesu khangthu sutna sungah Matthai-in (Gentile) numei min pawlkhat – Tamar, Rahab, Ruth, (Bathsheba) – cihte gelh hi (Mt. 1:3-6). Hih thu hangin misiam pawlkhatin (e.g. David Bosch), Gentile mite adingin zong (Judah mite bek hilo) hun hoih hong kihei hun om lai ding hi, cih pen Matthai-in zong muhkholhna nei hi dingin tuat hi. Tua mah bangin, Matthai 15:28 sungah Jesu in Kanaan numei upna a pahtakna thu kimu pahin, Lungdamna Thu pen mi khempeuh ading ahihna thu zong Matthai 28:19 sungah kimu hi.
(b) Luka Gelhna Panin
Luka in tuiphum Johan tangthu a gelhna panin, Johan pen kamsang thupitak ahihna thu gen hi. Kamsang dangte khempeuh sangin thupizaw hi napi-in (cf. Mt. 11:9-11), Johan pen ‘a hong pai ding Messiah hi lo hi’ cih Luka in lak nuam hi. Amah (Johan) pen Messiah paina ding lampi a bawlkhol dingpa hizaw hi, ci-in teltakin gen hi.
Luka in Jesu neulai tangthu a gelhna sungah numeite pahtakna ciang nei hi. Gentehna-in, Mary, Elizabeth leh tuucingte tangthu a gelhna panin Luka in mizawngte leh a kisimmawh mite lamto nuam hi, cih kithei thei hi. Pasian in mi khempeuh deidan a neihlohna (numeite hi-in, mizawngte hita leh) pen Synoptic Gospels dangte sungah kitam muh lo hi. Matthai sung bangah Mary pen pahtak ding sangin, a kampauna thu zong a kimulo phial ahi hi. Tua ahih manin, Lungdamna Thu pen mihaute ading bek hi loin, mizawngte adingin zong kicing hi, cih Luka in hong lak nuam hi.
Biakbuk poimawhna pen Luka in Jesu suahna tangthu a genna panin kimu thei hi. Gentehna-in, biakna hahkat mahmah Simeon leh kamsang numei Anna-te in a hong pai ding Jesu pen biakinn panin na ngak uh hi. Tua ahih manin, amaute in Pasian biakbuk lawilo uh hi (Lk. 2: 22-38). Hih thu in biakna hahkat ding ahihna thu hong lak hi.
Luka 2:32-34 panin Jesu pen Gentail mite in khuavak a muhna ding leh Israelte minthanna ding ahihna thu kimu hi. A diakin, Lungdamna Thu pen Judah mite ading bek hi loin (Jewish exclusivism), mi khempeuh ading (universalism of the Gospel) ahihna thu Luka in hong theisak hi.
THUKHUPNA
Lai Siangtho gelhte in deihna kiciantak nei kawmin lai gelh uh ahihna pen a tunga thute panin kimu thei hi. Luka pen Gentail mite sim dinga kigelh hizaw deuh ahih manin, Matthai gelh sangin mipi huamkimzaw leh kilawm hi. Bang hang hiam cih leh, amah in mizawngte leh numeite banah, mi khempeuh ading a kicing Lungdamna Thu ahihna limgen mahmah hi. Matthai-in ahih leh, Judah mite sim dingin gelhzaw ahih manin numeite pen niamkoihzaw deuh in, tua banah Jesu suahna zong Judah mite Lai Siangtho ahi Thuciam Lui leh kamsangte genkholhna tawh kituaka hong pai ahihna thu lim genzaw hi.
