SAWLTAKPI DANGTE IN KHA NASEPNA TAWH
MISSION NA A SEPNA
Agelh ~ Lian Muan Kham Suante
1. THU MASA
Hih sunga kigen ding pen sawltakpite in Kha tha tawh a nasepna thu ahih laitak in, “Sawltakpite in kua teng huam kha ding hiam?” cih dotna om thei hi. Tua ahih manin, hih sungah sawltakpite cih kammal a kizat ciangin nungzui 12 te genna hi a, tua mah bangin hih laigelhna sungah zong “nungzuite” cih tawh a kammal pen kizang khawmkhawm ding hi.[1] A tomin gen lehang, sawltakpite pen Jesuh in a nasepna huh dinga a sapte ahi uh hi. Ahi zongin, amaute nasepna khat khat in en ni cileng, i hun leh laidal in hong cinlo kha ding ahih manin, a huampi danin et kisam ding hi. Khatveivei bel mimal min genkhak a kul hun zong om kha thei veve ding a, ahi zongin tua pen hih lai gelh in a sawm masak hilo hi.
Hih laigelhna sungah mission thu kigen ding ahih manin, a masa in “‘Mission’ in bang cihna hiam?” cih tomno in et masak ding kisam a, tua zawh ciangin Kha tha tawh mission na a sem Jesu nuntakna leh nungzuite in Jesu’ mah banga Kha tha tawh mission na a sepna thu ettoh kik ding kisam hi. Ahi zongin, sawltakpite in Kha tha tawh mission na a sepna pen Luka laigelhte leh lungdamna thu Johan siksan penin kinei ding hi. Bang hang hiam cih leh, Kha tha tawh nasepna pen Lungdamna thu dangte (e.g. Matthai leh Marka) leh laigelh dangte in na lim gen khollo hi.[2]
2. MISSION HONG PIAN ZIA: TOM LAAK
A tomin gen leng, mission cih pen “Pasian na” (Missio Dei- mission of God) cihna hi a, a neipa pen Pasian ahi hi. A hong kipat cilna pen Thuciam Lui hun pek panin kimu thei hi. Piancil 1:26-8 sungah Pasian in mihingte Ama lim le meel sun in a bawlna thu kimu hi. Pasian in hih mihingte pen leitung ah ukna a nei ding leh leitung a kem dingin deih hi (Pian. 2:15). Ahi zongin mihingte in Pasian’ deihna leh thukhamte palsatin, Amah lehdo hong kipan uh hi (Pian. 3). Amaute in Pasian hih nopna lungsim nangawn hong nei uh a, tua thu hangin Pasian tawh a kikal uh kisia semsem hi (cf. Pian. 11:1-9). Ahi zongin Pasian dikin neem hithiat ahih manin, a bawlsa mihingte nusia mai loin, a kizopkik theih nading lampi geel citciat se hi. Tua geelna a tangtun theih nadingin Pasian in Abraham samin, Abraham tungtawnin Israel minam hong dinkhia a, Israelte’ tungtawnin Amahin minamte thupha piak ding geelna nei hi.[3] Ahi zongin, Israelte’n Pasian’ deihna leh thukhamte palsat leuleu in, milim peuh bia uh ahih manin Pasian in lampi dang khat a zon hong kisam ta hi. Teel ding leh sawl ding dang om nawnlo ahih manin, Pasianin Kha tawh a kidimsa A nasem (servant) ‘Messiah’ hong sawl hi. Messiah in a sep ding ahih leh a sawlpa thu man ding leh a kisawlna bangbanga a sep ding ahi hi. Tua ahih manin, Messiah in a nasep khat peuhpeuh pen Pa’ kiang panin a ngah hi a, a thu uh kituaklo cih bang om ngeilo hi. Hih zahta a a kituakna uh pen Pasian’ sathau nilh ahihna kilatna ahi hi.[4]
A tunga kigen thu panin mission hong kipatna kimu thei hi. A bulpi penah Pasian om hi. Tua ahih manin, mission nasep pen mihingte leh Pawlpite a’ hilo in, Pasian’ mission (Missio Dei) ahi hi. Pasian pen a sawlkhia Pasian kici thei ding hi. Mission hong pianna pen Trinity thukhun panin zong kitel thei hi: Pa’ Pasian in a Tapa mimawhte tan dingin leitungah hong sawl a, Amah in A Tapa tawh kipawlin huhpa Kha Siangtho hong sawl leuleu hi. Tua mah bangin, Pa leh Tapa leh Kha Siangtho (triune God) in Pawlpi (Church) pen leitungah mission a sem dingin sawl leuleu hi.[5] Tua ahih manin, “mihingte suahtak nading pen Pawlpi nasep hilo zaw in, Pawlpi pen hih suahtakna nasepna ah Pasian’ vanzat khat hilel zaw hi.”[6] Tua ahih ciangin, Pawlpi a kiphuhna hangin Mission a om hilo in, Pasian’ nasep ding (mission) a om zawk hangin Pawlpi kiphut hizaw hi. Tua mission in, Pasian’ itna leh gupna thu mun khempeuha tangko ding ahi hi (Jn. 20:21).[7] Atomin gen ding cilehang, Pasian in a bawlsa mihingte itlua mahmah ahih manin Amahin A Tapa hong sawl in, tu in a Pawlpite tua nasep a sem dingin sawl leuleu hi.[8] Pawlpi in mission a sepna hang pen, Pasian in mission a sep hang ahi hi.
3. KHA THA TAWH MISSION NA A KISEPNA: JESU TUNG PANIN
“Bang hangin Jesu in Kha tha tawh mission a sep dan etkul hiam?” cih leh, nungzuipite in Kha tha tawh na a sepna pen Jesu nasepna panin kitel thei hi. Tua ahih ciangin, Jesu in mission na a sepzia tomno in et ding kisam masa hi.
3.1 JESU LEH MISSION
Pasian in a nasempa Messiah tungtawna sep ding a ciam pen, deidan a neilo leh a huamkim nasep (holistic mission) ahi hi. Tua mah bangin, Israelte’ a teelna hang zong minam tuamtuamte in thupha a ngah theih nading deihna hi a, Israelte’ aituam ading bek hilo hi (Pai. 19:5-6). Israelte pen mite in thupha a ngah theih nading a, Pasian vanzat hilel zaw hi. Tua ahih ciangin, Amah pen Israelte’ Pasian bek hilo in, minam khempeuh leh leitung mite khempeuh Pasian zong ahi hi. Tua banga a huamkim nasepna pen Thuciam Thak (NT) deihna zong ahi hi. Tua na sem dingin Pasian in a nasem ‘Messiah’ leitungah hong sawl a, a hong sawlna tungtawnin Pasian in mi khempeuh leh leitung khempeuh suahtak nading, a bawlsa nate’ lakah kipumkhatna (unity) leh kilemna (shalom) a om nading geel hi (cf. Kol. 1:16-21). Tua nasep pen Messiah in a hong paina tungtawnin kicing sak a (2Kor. 5:19; cf. Is. 11, Pian. 14:18-20), Amah mah zangin leitung leh vantunga a om nate khempeuh pen Ama (Khrih) khut nuaiah gawm ding geel hi (Efe. 1:10; cf. Fil. 3:21). Tua ahih manin, OT (thuciam lui) mah bangin NT (thuciam thak) ah zong Pasian geelna pen mi khempeuh leh leitung khempeuh suahtak nading thu ahi hi.[9] Kha tha tawh Jesu mission a sepdan tomno in en ni.
3.2 JESU’ NASEPNA TOM LAAK: SYNOPTIC GOSPELS[10] LEH JOHAN
3.2.1 SYNOPTIC GOSPELS SUNGAH
A tomin gen ding ci lehang, Synoptic Gospels sunga Jesu nasep pen Pasian’ gam (Kingdom of God) pulak ding ahi hi (Lk. 9:2). Pasian’ gam a hong tunna pen na lamdang a bawl nate panin kimu thei hi (cf. Mk. 1:15). Amah in natna tuamtuamte damsak in misite thosak a, dawite hawlkhia in, suahtakna thu pulak hi (cf. Mt. 4:24; 10:1; Mk. 1:34). Tua banah, Amahin mite mawhna zong maisak hi (cf. Lk. 24:48; Acts 2:38). [11] A zawng leh a hau deidan neilo in na sem a, damlote damsakin, numei leh naupangte it-bawl in thupi ngaihsut a, mimawh a kici ‘siahdong’ leh ‘numei kizuakte’ (prostitutes) nangawn deidanlo hi. Amahin a kinawlkhin mite’ lawm bawl a (cf. Mt. 11:19), mimawhte tatkhiat nadingin a pumpi mahmah piatawm hi. Gentail mite’ tungah zong itna lak sawnsawn ahih manin “mimawhte lawm” (friend of sinners) ci liang uh hi. Amahin, thatang suan ding phallo a, thukkik ding zong lem salo hi (Mt. 5:1ff; cf. Acts 10:36). Tua mah bangin, Singlamteh tunga a kithah ding laitakin, Amahin a bawlsia mite’ adingin thu ngetsak hi (Luke 23:34). Hih banga Jesu nasep theihna pen “itna Pasian” tawh pumkhat ahih man uh ahi hi.[12] Pasian’ Kha tha tawh na a sep manin, Jesu in hih nasepte a sem thei ahi hi. Pasian Kha Siangtho in Amah tha pia in itna tawh kidimsak a, hangsanna leh na lamdang bawl theihna tawh tuamthuah lai hi.
Luka in Jesu nasepna pen Nazareth Manifesto a kici 4:18-9 sungah na gencian mahmah hi: Gimna a thuak mite tungah lungdamna thu a hilh ding, salin a kimante tungah suahtakna thu a gen ding, mittawte in khua a muhkik theihna ding, a kinengniamte a suaktasak ding leh, Topa in a mite a hotkhiat ding kum a pulak dingin a sawl ahi hi. Ahi zongin hih nasep pen “Topa Kha tha” (4:18a) bek tawh a sep ding thu na gen hi.[13]
3.2.2 JOHAN SUNGAH
Johan sunga Jesu nasepna pen Pasian tawh kisai pian zawleh kilawm hi. Bang hang hiam cih leh, Johan in leitung pen Pasian a thei khalo, a nawlkhin leh a lehdo danin na gen hi (1:5; 7:28; 8:55). Ahi zongin Pasianin leitung pen samsia tuan loin, a bawlsa leitung (mite) it mahmah ahih manin, a tan dingin A Tapa Jesu hong lehsawl zawsop hi (3:16-7; 12:47). Tua ahih ciangin, Johan sunga Jesu nasep (salvific mission) pen A Pa’ sawlna bang a mang ding leh a tangtungsak ding ahi hi (4:34; 5:36; 17:4; 19:30). Tua bang hileh, Jesu’ a nei mite in Pa leh Tapa tawh pumkhat hihna neikhawm ding uh a, ahi zongin Amah a um lote in thukhenna thuak pelmawh ding uh hi (3:3-8, 18-21, 36). [14] Johan sunga Jesu nasep pen a tomin gen ding cileng, a mangthangsa leitung mite hotkhiat ding ahi hi. Ahi zongin, tua nasep pen Pa sawlna tawh kizui a sep ding hi a, tua sawlna bang manga sep theihna pen Pasian’ Kha tawh a kidimna hang ahi hi.
4. SAWLTAKPITE’ MISSION NASEPNA LEH KHA SIANGTHO: LUKA LEH JOHAN SUNG PAN
Pasian’ Kha Siangtho pen Jesu nasepna dingin a kisam ahih mah bangin (Mt. 3:16; cf. Mk.1:10; Lk. 3:21-2), nungzuipite in zong Kha Siangtho a ngah masiah pen nasep thupi sep ding kipan lo uh hi. Tua ahih manin Jesu in a nungzuite kiangah, Kha Siangtho a hong tun masiah Jerusalem ah a ngak ding leh nasep a kipanlo dingin vaikhak hi (Sawl. 1:4-5). Ahi zongin, Kha Siangtho a hong tun tak ciang amaute vangliatna tawh kidim in, “Jerusalem khua sung, Judea gam sung, Samaria gam sung, leh lei mong dongin” (Acts 1:8) lungdamna thu a tangko ding lamtak uh na gen hi. Tua ahih ciangin, Kha Siangtho ompihna lo tawh Pasian’ nasep kipat theih mawk hilo a, Pasian’ adinga sep theihna pen Kha Siangtho ngahna lim hipah hi.[15] Nungzuipite in Kha tha tawh mission na a sepna tomno pen a nuai abang ahi hi.
4.1 LUKA GELHTE’ SUNG PAN (SAWLTAK LEH LUKA)
Luka gelh sunga nungzuite mission nasepna pen Jesu in a nungzuite tunga a vaikhakna panin kimu thei hi. Luka 24:47b-48 leh Sawltak 1:8b sung I et ciangin, Amahin a nungzuite pen Ama (Jesu) thu teci pang a, a vakkhia dingin sawl hi (Lk. 24:47b-48; Sawl. 1:8b). Hih a sawlna panin thu nam nih muh theih hi. A khatna ah, nungzuite pen gam a keek ding ahi uh hi: Jerusalem panin (Sawl. 2-7) Judea leh Samaria (Sawl. 8-12), leh leimong dongin (Sawl. 13-28) a vak kawikawi ding uh hi. Anihna ah, Jesu in a nungzuite pen nam deidan neilo a nasem dingin sawl hi: Palestine gama a teng Juda mite (Sawl. 6:1-7) panin Samaria mite lak (Sawl. 8) leh Gentail mite (Sawl. 10) dongin deidan neilo in nasem dingin sawl hi.[16]
Gamkeek ding bek hun salo in, nungzuite pen mawhmaisakna thu zong a pulak dingin Jesu in deih hi (Lk. 24:47a).[17] Hih mawhmaisakna thu a um mi peuhmah in a nuntak lui nusia in Pasian’ mi hihna nei ding hi (Sawl. 10:34-6; 15:9, 14; 26:18). Amah pen leitung mi mawkmawk hinawn loin, Pasian innkuan hihna za ngah ding hi (Lk. 8:20-1).[18] Hih banga sepzawhna dingin Kha Siangtho in nungzuite huh ding hi. Tua banga Kha Siangtho in nungzuite a ompihna pen Sawltak 2:1-4 (Pentecost) panin zong kimu thei hi. Kha Siangtho in nungzuite a ompih ciangin:
4.1.1 Lungdamna thu hangsan takin pulak uh hi.
Hih tawh kisai in Piter nuntakna panin kitel mahmah hi. Launa tawh kidim ahih manin Piter in Jesu’ nungzui ahihna thu na iim ngei hi (Mt. 26:69-75). Ahi zongin, Kha Siangtho tawh a kidim tak ciangin, hangsan takin hong dingto in, thu hong gen hi, ci in Lai Siangtho in gen hi (Sawl. 2:14-36; 4:8-12). Tua ahih ciangin, hangsan taka thu a gensak pen kua dang hilo in, Kha Siangtho ahi hi (cf. 4: 29, 31; 9:27; 13:46; 14:3; 18:26; 19:8). Tua mah bangin, Amahin Judah makaite leh upate maiah hangsan takin thu na gen hi (Sawl. 4:8-12). Sawltak 4:13 sungah bang ci in kigelh hiam cih leh, “Uliante in Piter leh Johan a han mahmahna thu leh amaute pilna sang a neilo mi mawkmawk ahihna thu a theih uh ciangin lamdang a sa mahmah uh hi…” ci hi. Tua ahih ciangin, Piter thugente pen Kha Siangtho piak hi a, mihing tung pana hong piang leh kipan hilo hi.[19] Gary Tyra bangin, hih huna Piter sermon pen Joel kamsanna tawh na tehkak liang hi. “Kamsanna” (prophecy) a cih ciangin, genkholhna (foretelling) tawh kisai hilo in, Pasian’ thu leh kammal pulak khiatna (forth-telling) tawh kisai in na gen hi. [20] Tua ahih ciangin, Pasian thu pulak nasepna (prophetic speech of mission) zong Kha Siangtho ompihna hang mah ahi hi. Sawltak 2:4 sungah Luka in bang cidanin gen hiam cih leh, Kha Siangtho in pau dang tawh mite pau sak hi (cf. Sawl. 2:14-8) na ci hi. Tua ahih ciangin, Piter pautuam a pausak pen hangsan taka Pasian’ thu a pulaksak Kha Siangtho mah ahi hi.
4.1.2 Na lamdang bawl uh hi (Sawl. 2:43).
Luka sungah, mission nasepna pen Pasian thu tangkona tawh kisai zawdeuh ahih laitak, na lamdang bawlna tawh zong na genkhawm veve hi. Jesu in na lamdang a bawl mah bangin (2:12), a nungzuite in zong a bawl uh hi, ci in na gen hi (2:43; 3:1-10; 5:12; cf. 4:29-30).[21] Babu Immanuel in Luka laigelh sunga na lamdang bawlna leh Pasian thu tangkona tawh kisai hih bangin gen hi: Na lamdang bawlnate in Pasian vangliatna kilangsak in, mite’ lungsim leh ngaihsutna zo bek hilo in, a Thu tangkote uh man taktak mah hi, ci in kipsak hi.[22] Hih na lamdang bawlna-ah, Kha Siangtho pen na lamdang a piangsak ahi hi. Bang hang hiam cih leh, Jesu mahmah zong Kha Siangtho tawh a kidim manin na lamdang bawl hi, kici thei hi (cf. Lk. 4:18; 7:21-2). Tua mah bangin, Luka 11:20 sunga Pasian khut (finger of God) tawh dawi a kihawlkhiatna thu zong Kha Siangtho nasepna tawh kitehkak hi (cf. Mt. 12:28). Tua ahih manin, nungzuipite’ nalamdang bawlnate zong Kha Siangtho kipawlpihna hang ahi hi. Sawltak 4:7 sungah, “Kua min leh thuneihna tawh Piter in nalamdang bawl hiam?” cih a kidot ciangin, Piter in Jesu (Kha Siangtho) min tawh a hihna thu na gen hi. Hih thu pen Sawltak 1:8 panin zong kitel thei hi: “Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khuasung, Judea gamsung, Samaria gamsung, leh leimong dongin note in keima thu na gen ding uh hi…”
Luka laigelhte sungah Kha Siangtho leh nalamdang bawlna thu pen kilim genkhop khollo napi, a genlo bikbek bel hilo hi. Amahin (Luka) Kha Siangtho tungtawna nalamdang piansakna sangin (supernatural acts), Pasian thu hangsan taka pulak khiatna (supernatural proclamation) pen a lim genzaw hibek hi.[23]
4.2 JOHAN SUNGAH
Johan sunga nungzuite nasep pen Jesu kammal panin kitel mahmah hi. Amah in, “Pa in kei a hong sawl bangin note zong ka hong sawl hi” (20:21; 17:18) ci hi. Tua ahih ciangin nungzuite nasep pen Jesu’ sawlna ah kinga hi.[24] Tua a sawlna pen, Pasian a phawk khalo leh a lehdo leitung mite lakah Jesu hotkhiatna thu tangko ding ahi hi (17:11-20; 20:21). Bang hangin nungzuite sawltuam sese hiam cih leh, amaute pen Jesu’ nasep mit tektek tawh a mu leh a telciante ahih manun, pello a tangko ding pen a mawhpuak uh ahi hi (15:18-27). Hih a tangkona uh tungtawnin, mite in Jesu um in Thuman ahihna thei ding uh hi (cf. 21:4-11). Tua ahih ciangin nungzuite nasep pen Pasian’ huangsung ah mite lutpih ding ahi hi (cf. Jn. 4:31-8).[25]
Suahtakna nasep (salvific mission) Jesu in a sep theihna pen Pasian’ Kha Siangtho ompihna hang ahih mah bangin, nungzuite nasep nading ah zong Kha Siangtho mah kisam masa pen hi. Tua mah bangin, Johan 14:26; 15:26 leh 16:7 sungah bang ci hiam cih leh, nungzuite in mission na a sep theih nadingin Pa leh Tapa in Kha Siangtho hong sawl hi, ci hi. Ahi zongin Kha Siangtho in Amah bekin Jesu thu pen leitungah theisak theilo ahih manin, nungzuite paisuaka a sep kul hi. Bang hang hiam cih leh, tua Kha Siangtho pen leitungin mu theilo, zong theitheilo hi (14:17). Tua ahih ciangin Kha Siangtho leh nungzuipite pen Thuman tangkona ah na a sepkhop uh kisam hi. Hih tangkona ah Kha Siangtho in leitung mite’ gitlohna leh mite in Jesu a uplohna theisak ding a (16:8-11), tua Kha Siangtho mahin leitung mite’ mawhsak thukhenna pen nungzuite tungtawn in pulak ding hi.[26]
Tua banah, nungzuipite’ nalamdang bawlna hangin Kha Siangtho in leitung mite Jesu umsak ding hi. Kha Siangtho’ nasepna leh na lamdang bawlna thu pen Johanin a gen lianloh hangin, Jesu in 14:11-2 sunga nungzuite a kamciamna panin kimu thei hi. Hih sungah Jesu in Ama sep sang a lianzaw a sem dingin nungzuite na gen hi. Tua ahih ciangin, Johan ngaihsutna ah nungzuite’ na lamdang bawl theihna zong Kha Siangtho hang mah ahi hi.[27]
Johan sunga nungzuite’ mission nasepna pen hici danin tomlak theih hi. Pasian in a mawhsa leitung mite honkhia dingin A Tapa hong sawl a, tua mah bangin Jesu in leitung a nusiat ding ciangin tua suahtakna thu mah a tangko dingin a nungzuite tungah liangko na suan leuleu hi. Tua nasepna a huh dingin Kha Siangtho na ciam a, tua Kha Siangtho leh nungzuite nasepna pen kikhen thei kiuhkeuhlo hi. Hih mission nasep in mi khempeuh deidan omlo in huamkim a, Juda mi- Gentail mi cih om nawnlo in, a kuamah peuhin Pasian’ mi cihna ngahkim thei ding uh hi.
5. NUNGZUIPITE MISSION NASEPNA PANA MUHKHIATTE
Nungzuipite in Kha tha tawh mission na a sepna panin, hih a nuaia bang teng kimukhia hi.
5.1 Mission nasepna icih pen Pasian mission ahi hi.
Hih mission nasepna ah, Kha Siangtho leh Jesu pen kikhen thei kiuhkeuh lo hi. Bang hang hiam cih leh, Pasian in Jesu leh Kha Siangtho hong sawl a, Jesu pen suahtakna bulpi hi in (source of salvation), Kha Siangtho pen suahtakna lamlak (agent) ahi hi. Tua Kha Siangtho mahin Jesu sihna hanga mihingte in nuntakna leh suaktakna a neihna thu mite theisak hi.[28] Jesu pen eite tawh a hong omkhawm nawnloh hangin, a Kha tawh eite lakah hong teng in, mission nasepna ah zong hong huh hi. Tua ahih manin, Kha Siangtho pen mission nasepna-a a bulpi pen (driving force) ahi hi.[29]
5.2 Mission nasepna ah, Pawlpi pen Pasian’ vanzat khat ahi hi.
Tua ahih ciangin, Pasian’ Pawlpi nasep pen Jesu’ sepna maban zoptoh ding ahi hi. Hih nasep a sem dingin Jesu in nungzuipite teel a, Kha Siangtho in tua a nasepna uh huh hi (Luka/Johan). Tuni dongin tua Kha Siangtho in hih nasepna pen huh lai hi.[30]
5.3 Mission nasep in deidan leh khentuam neilo hi.
Pasian in a bawlsa na khempeuhte tungah lungdamna thu pulak ding deih hi. Juda mi, Gentail mi, cih om nawnlo in; suahtakna pen a bawlsa na khempeuhte tungah kicing hi (cf. Gal. 3:27).[31]
5.4 Mission cih in, Pasian’ thu tangko/pulak ding cihna zong ahi hi.
Hih tangkona ah, Kha Siangtho in hangsanna Pasian’ mite tungah guanin, gualzawhna zong piakhawm hi.[32]
5.5 Mi khat peuh in kikhelna lungsim (conversion) a neih theih nading gelna leh ngimna tawh mission na kisem hi.
Mission a kisepna tungtawnin mi khat peuhin gitlohna panin a hoih lampi hong tawn in, leitung mi hihna panin van mi hih na hong nei hi. Amahin a nuntak luite nusia in, nuntakna thak ah nungta a; uplohna panin upna ah, cih bangin kikhelna hong nei hi. Tua banah, Kha Siangtho pen mite mawhna a phawksak leh lungsim a hei ahi hi. Tua mah bangin, Luka sungah mawh kisikna (repentance) leh mawh maisakna thu (forgiveness) I mu a, Johan sungah Thuman (Truth) –ah upna ngak ding thu I mu hi. Tua ahih ciangin, Kha Siangtho pen mission sepna ah suahtakna zong a pia kici thei ding hi.[33]
A tunga kigen thute panin Kha Siangtho neihna pen Khristian hihna lim ahi, cih kithei thei hi. Amah in mite’ lam man lakin, Pasian’ innkuan sungah mite kha hi. Tua mah bangin, Luka mipite (community) in Sawltakte’ thungenna (Sawl. 2:37-47) tungtawnin Kha Siangtho tawh kipawlna ngah uh a, Johan mipite in ahih leh Kha Siangtho tungtawnin Thuman (Jesu) lampi zui uh hi (14: 17, 23).
[1] Nungzui 12 min in: Peter (Simon), Andru, James, Johan, Filip, Bartholomew, Thomas, Matthai, James, Thaddeas, Simon (gam khualpa), leh Judas Iskariot (Mt. 10:2-4)
[2] David Bosch, Transforming Mission: Paradigm Shifts in Theology of Mission (Bangalore: Centre for Contemporary Christianity, 2006), 140.
[3] Christopher J. H. Wright, Knowing the Holy Spirit Through the Old Testament (Downers Grove: IVP, 2006), 97-8.
[4] Wright, Knowing the Holy Spirit, 106-07.
[5] Bosch, Transforming Mission, 489.
[6] Jurgen Moltmann, The Church in the Power of the Spirit: A Contribution to Messianic Ecclesiology (London: SCM Press, 1977), 13
[7] Howard A. Snyder, “The Meaning of Holistic Mission with Special Reference to Creation Care,” UBS Journal 5/1 (2007): 7.
[8] Bosch, Transforming Mission, 489.
[9] Snyder, “The Meaning of,” 4-5.
[10] Synoptic Gospels cih ciangin Matthai, Marka leh Luka cihte genna hi.
[11] Bosch, Transforming Mission, 145-6.
[12] Wright, Knowing the Holy Spirit, 114-5.
[13] Bosch, Transforming Mission, 145-6.
[14] Cornelis Bennema, “Spirit and Mission in the Bible: The Spirit As the Agent of Divine Life-Giving Communion,” Edinburgh 1910 Revisited – “Give Us Friends”: An India Perspective on One Hundred Years of Mission, edited by Frampton F. Fox (Pune: CMS/ATC, 2010), 21-2.
[15] Ott-Strauss, Encountering Theology.
[16] Bennema, “Spirit and Mission,” 15-6.
[17] Bennema, “Spirit and Mission,” 15.
[18] Bennema, “Spirit and Mission,” 15-6.
[19] Bennema, “Spirit and Mission,” 17-8.
[20] Gary Tyra, Holy Spirit in Mission: Prophetic Speech and Action in Christian Witness (Downers Grove: IVP, 2011), 41.
[21] Bennema, “Spirit and Mission,” 18.
[22] Babu Immanuel, Repent and Turn to God (Perth: Him International Ministries, 2004), 208-211.
[23] Bennema, “Spirit and Mission,” 19.
[24] Nungzui 12te bek hilo in, tu hun nungzuite zong huam kha thei ding hi. A. J. Kostenberger and P. T. O’Brien, Salvation to the Ends of the Earth: A Biblical Theology of Mission (Downers Grove: IVP, 2001), 211-4.
[25] Bennema, “Spirit and Mission,” 22.
[26] Bennema, “Spirit and Mission,” 22-4.
[27] Bennema, “Spirit and Mission,” 25.
[28] Bennema, “Spirit and Mission,” 30.
[29] Bosch, Transforming Mission, 140-01.
[30] Bennema, “Spirit and Mission,” 30-1.
[31] Bennema, “Spirit and Mission,” 31.
[32] Bennema, “Spirit and Mission,” 31.
[33] Bennema, “Spirit and Mission,” 33-4.
