THUCIIN HOIH (70) A pan Z
Thang Cin Lian, MIT
1999
A nungta Pasian bia inla, um in muang tawntung in.
A piangsa thute ah lungkim inla, mailam thu ding encian in.
Asia leh apha khentel thei inla, thuciin hoihlote nusia in.
Beh leh phung bulphuh lua kei inla, mimal hihna bulphuh zaw in.
Biakna leh ngeina khentel thei inla, khua hun kikhel zia phawk in.
Ciimna na ngah nadingin hanciam inla, gong tat ding ngaihsun ngei kei in.
Cit leh siam ding hanciam tawntung inla, khansia ngei kei in.
Deihteel theihte teelsiam inla,deihteel ahilo te ah lungkim in.
Duhhap huaiham kei inla, aipeng lungsim nei ngei kei in.
Eimite bek it kei inla, midangte zong it ding hanciam in.
Encian masa inla, tua khit teh na muhna zia gen pan in.
Gamtat hoih cimtak ngei kei inla, mawh nei mite engkha kei in.
Geelkholhna tawh nasem inla, hun zatzia siam in.
Guihtheih khamtheih pelh inla, siantho ding hanciam den in.
Hangsan inla, hang den kei in.
Hauh ding hanciam inla, kihau sak kei in.
Hazatna lungsim nei kei inla, mi deidan kei in.
Heh thei inla, hehpahpah kei in.
I pau, I lai leh ngeina te kemcing inla, zumpih ngei kei in.
Itna bulphuh in thu vaihawm inla, lampial sak kei in.
Kamkhum zang inla, lungsim takpi tawh hopih in.
Kampau kidawm inla, kidokkik thei nawnlo ahih lam phawk in.
Kha Siangtho lamlahna ngak inla, cilehsa ngaihsutna ultung sak kha ken.
Khansau ding hanciam inla, sih khit hun a sawtzawk lam phawk in.
Kiphasak kei inla, kiniamkhiat den zaw in.
Lai Siangtho sim den inla, nang deihdan zia in deihkaih kha kei in.
Lawmte tung ah thuman in citak inla, gen sia ngei kei in.
Lawmthak zonbeh inla, na lawmlui te mangngilh tuan kei in.
Maitai den inla, kineih khem kei in.
Maizum thei inla, maizum den kei in.
Mawhna mai sak inla, ciamtehteh kei in.
Mi hong muan dingin nungta inla, midang te zong muang in.
Midang tawh kipawlkhop siam inla, tang pek ngei kei in.
Midang te huhin panpih inla, amau hong thuh kik ding lamen se kei in.
Midangte khasiatna dingin gamta kampau kei inla, pahtawi in tha pia zaw in.
Min ut peuhpeuh phuak kei inla, khiatna nei ahih lam phawk in.
Mite hong pahtawi ding bek ngaihsun kei inla, Pasian deih thu lungngai zaw in.
Na khempeuh thungetna tawh apmasa inla, nang theihna suang kei in.
Na kisap van bek lei inla, na deih mawkmawk te lei kei in.
Na lungdamnate mangngilh kei inla, na lungsim sungah ciamteh khinkhian in.
Na theihloh thu dong masa inla, na upmawh thu gen kei in.
Nang bek a thupi in kingaihsun kei inla, midang te zong thupi sim in.
Ngaihsuncian masa in nasep kipan inla, a nungzuih a hamsat lam phawk in.
Ngim leh tup kician nei inla, nung kik ngei kei in.
Nisim in Diary gelh den inla, thusia ciamteh kei in.
Nu leh pate itin zahtak in vak inla, khasia sak ngei kei in.
Nupa kikal ah thuman citak inla, zuau thu gen ngei kei in.
Om mawkmawk kei inla, na hoih khat teitei sem in.
Omna peuh siangtho sak inla, nuntak siantho ding hanciam in.
Pasian nasem te huhin panpih inla, khasia sak se kei in.
Piakkhiatna hanciam inla, ciamteh ngei kei in.
Pilna na ngah nadingin hanciam in sin inla, kipil sak kei in.
Sangkah nuamsa inla, pilna bucing ngah sawm in.
Sepna peuhpeuh ah thuman citak in sem inla, lungkia ngei kei in.
Sum leh paai tung ah thuman inla, sum zeeksiam in.
Sum thupina thei inla, hong siasak thei ahih lam phawk in.
Tangthu kan inla, kipumkhat nading hi sak in.
Tawlngak hun nuam lazel inla, tawlngak hun tawh hun bei sak kei in.
Thu khat peuhpeuh tom ngaihsut lua kei inla, a thu telcian masa zaw in.
Thu manlo te ah lungdam kei inla, thuman thutak ah dingtang in.
Thuakzawh hatna kisin inla, mite hong simmawh ding in om kei in.
Thumanna leh cihtakna khah suah ngei kei inla, tua te kizepna in nei in.
Thungen den inla, nakpi tak in sep ding a kisap lam zong phawk in.
Thupha na bawl te gengen kei inla, thupha na sante pulak zaw in.
Upna tawh kalsuan inla, sepna tawh lakkhia in.
Vaihawm siam inla, angvaan luat nei tuan kei in.
Vantung gam tun sawm inla, tunbaih ding sawm kei in.
Zindo siam inla, zin tun zong siam in.
Zomi min it inla, amite nakpi tak in itzaw in.
Zuau thu gen ngei kei inla, ciampeel ngei kei in.
