TEDIM THU KIH ZAK NA LAI
SEPTEMBA KHA 1926
The Tiddim Chin Hills News
Bu 7 Nambat 9 |
A SUNG A OM THU TE
Tedim thu kih zak na lai
Teembaw tungah zun kha 30, 1926
Meitei uk sung Pasian khangna thu
Nipi ni thu hilh na
TEDIM THU KIH ZAK NA LAI
A kih pianna kum 1919
Kha simin Khalkha Khua ah kibawl hi.
Lai Bawl pa--------------------------------Sang Mang Pa
Dangka sangte-----------------------------Thuam Hang, Dam Khup
Kum khat a man hamu a hi hi. Khalkha khua Septemba kha 1, 1926
TEEMBAW TUNGAH ZUN KHA 30, 1926
Zun kha ni 15 ni ciangin Zangun khua teembaw tungah tuangin ka ding hi. Teembaw a min Pegu hi a a neite Skotland mi a hi hi. Zangun khua leh England gam kikal painah ding dangka 1,100 bang a bei hi. Ahih hangin tua man in paina man bek hi lo, an man, puan man zong a hi hi. An khempeuh, lupna puan teng ka ngah uh hi. Tua tham lo in ka lupna puan leh lupna mun pha takpi bawl dingin naseem a om hi.
Teembaw a sau, pi 480 leh a vai pi 60 a pha hi. Tui sungah pi 30 bang a thuk hi. Ahih hangin tui sung sangin tui tung a tam zaw hi. Tua bang a hi leh bang hangin kilet lo ahih hiam ih dong thei hi. Tui nuai suang meihol, tui neekna, an, enzin leh a puaksa van a om hi. A tung lam ah mihing beek a om hi. Tua ahih ciang in huih nakpi a nung ciangin a kilet mah bang in a om hangin a kilet zo kei hi.
A nuai lam ah van tampi kikawih thei hi. Kha thum zat dingin suang mei hol a kawih thei hi. A hih hangin tu in a bei dek tak a, nih vei a thak ka la ding hi. Suang mei hol sim lo buh tang ip 80,000 a om hi. Kawl gamah buh tampeen kingah na thei khin hi. Tua buh tang leitung gam khempeuhah a zuak thei hi. Hak ngo tampi zong a om hi.
A nuai lam lai zang ah enzin a om hi. Tua enzin a lian mah mah a teembaw painah ding a pei a pai sak hi. Tua enzin tawp nei lo in sun leh zan a pei sak thei ahih maninah ni simin tai 250 bang ka tung hi.
Naseem pawl 140 bang a pha hi. Tua naseemte nam li in kikhen hi. Nam khat in engine naseemte a hi hi. Tua te kim khat in enzin a uk hi, kim kat in suang mei hol a lua hi. Naseemte in ni ciamteh na li in na a seem zeel hi. Nai li akhawl zeel hi. Tua ahih ciangin ni khat in nai giat bang a seem uh hi. Engin nasemte a ukte Mang Kangte hi, a seemte Indiate hi. Suang meihol luana na a haksa hi. Tua mihing te a nasem a tawp ciangin na sam bang mahin a vom hi. Tua tam lo in amau omna a khua lum mah mah hi. Tua ahih ciangin teembaw dawn pan sik lawng lianpi a om hi. Huih a nung ciangin tua lawng sungah suang mei hol luate omna a nung suk hi. Ahih kei leh amau a seem zo kei ding hi. Amaute tawm vei bek khawl leh enzin a kiam ding hi.
Naseem pawl khat in teembaw tung lam na a seem uh hi. Tuate in ni simin tui in a sawp hi, zatui a zut hi, teembaw a hei hi. Van kawih dingin van la dingin teembaw a khawl ciangin tuate in nakpi na a seem uh hi.
Pawl khat in a tuangte na a seem hi. Tua te in an a huan hi, an a pia hi, lupna puan a phah sak a kipan mihing a deihna khempeuh a bawl hi.
Teembaw ukpa Mang Kang a hi hi. Amah in bangmah seem lo in naseemte khempeuh a en hi. Ama nuaiah bute sawm leh nga bang a om hi. Tuate kim khat enzin a uk hi, kim kkhat in a tuang te a cing hi, kim khat in teembaw painah ding a bawl hi. Na seem pawl dang khat a om thi. Tuate in sik khau om lo lai khak te a hi hi. Tuate nga bang pha a sun leh zan a maute a seem hi. Ni simin Mang Kang khua pan thu pha mawte ka za hi. Teembaw dang thu ka za hi. MangKang khua a ka lawm te kiangah lai ka khak nawp leh taute in a khak sak ding hi.
Tu laitak in mihing 24 bang a tuang hi. Izipt gam panin 50 bang a om ding hi. Mihing 140 a nawp leh a tuang khawm thei hi. Ahih hangin tuk lai ah huih nakpi nung ahih ciangin mi tawm beka khua a ciah nuam hi. Khua khal lai takin mi tampite a ciah ding hi. Tui a a tuangte omna thuap nih a hi hi. A tung lam mi kim khat a om hi, a nuai lam kim khat a om hi. Ka lupa dei a neu hangin mihing nih bang, thum bang, li bang a om khawm hi. Ka lupna a neu khat tungah khat a om hi. Lupna nuaiah ka puan kuang ka kawih hi. Khut sil ding leh mai phiak ding tui a om hi. Kisawpna ding mun dang a om hi. Khua etna neu cik khat a om hi. Huih nung a guah a zuk ciangin tua ka etna ka khak cip thei hi.
Mi khempeuh in a kibangin an a ne thei hi. Ahih hangin naupangte leh numei note in mi liante an a ne ma in a ne uh hi. An a hawih mah mah hi. Ni simin a kikhel hi. An hi zah bang ci a pua thei ding hiam ngahsun ding a haksa hi. Ka pute ka pate khang ciangin tua mah bangin a pua zo kei hi. Ahih hangin tu lai takin tui a khal sak a, tua tui khal tungah an kawih a a muat zo kei hi. An ka neek teng Engaland khua ah ki lei zo a tu dongin ki pua zo hi. An ka duh leh nga vei ni simin ka ne thei hi. A zing ciang in nai 6 ciangin niang tui hong pia hi. Nai kua ciangin zing an ka ne hi. Nai khat ciangin sun sia ka ne hi. Nai li ciangin niang tui a hawp kik hi. Nitak nai sagih ciangin ni tak an ka ne hi. Teembaw tuangte naseem nei lo ahih maninah an bek a ngaihsun thei hi.
Khua a pha ciang in teembaw lim sungah ka tu hi, gua a zuk leh a sung lam ka om hi. A tungah ka gelh mah bangin tu laitakin huih nakpi a nung thei hi. Ahih hangin kote Pasian in hong hehpih a nakpi takin a zu kei hi. Ahih hangin ni 14 tawntung huih nung a lai gelh ding a haksa hi. Mi kim khat tawm tawm na a, an a ne zo kei hi. Tua hui in mai lam panin hong hih ahih maninah teembaw ni khat in tai tampi a tung zo kei hi. Ni khatah huih nakpi nung ahih maninah an ka neek lai takin ka kuang leh hai a kia dek tak hi. Nang na sing peek sabuai geiah kikawih kei leh a kia tak ding hi. Tua ni ah tui kilawk a teembaw niam peen mun a tum thei hi.
Ahih hangin zanah Apilika gam ka nai uh a tua gam in huih hong laih hi. Tua gam ka tun ciangin huih thakhatin a dai hi. Nipi ni ka kikawm uh a sangmang khat in Pasian thu honghilh hi. Nipi khatin Zangun sang mangpa in hong hilh hi. Nipi ni khat keimah in in ka hilh hi. Nipi ni khat tawntung Silan kici tui lai gal khat ki lang hi. Tua gam a za mahmah a, khamtung sang in a za zaw hi. Tu ni tawntung Apilikla gam a kilang hi. Zing tung ka thawh ciangin tuipi pan a kah mual lianpi ka mu a, Tembaw tungah ka om kei leh khamtung mual hi, ka ci ding hi. Ken sang tampi om a, suang a kilang hi. Tua mual ka nai seem seem a, a nung ciang in mual khat tungah mei inn sang khat ka mu thei hi. Tua mei inn dawnah mei vakna lianpi khat a om hi. Zanah tuipi tung a gamlapi pan in ki mu a teembaw ukte in a mu ciangin lei tawh kinai ci in a thei thei hi. Ni dang lai inah tua mei vakna inn om lo a, teembaw tampite a kisia thei hi. Tua mei inn nih Silan gam geiah ka mu hi. Masa ka muna gam Silan gam Engaland kumpipa in a uk hi. Tuni ka muh na gam Itali kumpipa in uk hi. Mihing a hih hangnin khua ahih hangin kilang lo hi, a suang tamna mual leh sehnel bek ka mu thei hi.
Tembaw tungah na om lai tak in bang bawl na hi hiam hong dong thei hi. Mi dang te in bang mah seem lo in sun leh zan kihopih lo leh lai a sim hi. Tembaw tung ah tang thu laibu tampi om a tua laibu a tuangte in a sim uh hi. Kei ka hi leh ni simin Zo lai ka gelh hi. Ni kum ciangin naupangte sim ding laibu ka gelh hi. A nung ciangin Lai Siangtho zong ka gelh nuam hi. Khamtungah ka om lai takin laibu tampi ka sim man kei hi. Tua ahih ciangin ni simin laibu ka sim hi. Khat vei vei mi dang tawh ka kimawl uh hi.
Naseem nih kamang ngil hi. Khat in zato pa a hi hi. Tua pa Mang Kang hi a, cina peuh a bawl hi. Tua tham loin teembaw a siangtho hiam, ci in a en hi. Naseem a dang in numei hi a, a tuang numei leh naupang leh numei note a huh hi.
Zulai Kha ni 4
Ni khat in a tuang nuam a tuangnah dingin Pilem kici tui lai gam khat ka khawl hi. Tua gam a nei cik a mi tawm bek a om hi. Teembaw ukte suang meihol le nam gim tui lei ding in tuate in na a seem uh hi. Tua gamah tui neek ding khat bek a om kei hi. Amaute in tuipi lian tui la a huan a, tui khu a dai kik ciangin tui siangtho a suak hi. Tua tui a man ham a, tampi a om kei hi. Ni dang lai inah tua tui lai gam kuamah in a uk kei hi. Khat vei Piancit kumpipa in uk ding ah teembaw khat a sawl hi. Ahih hangin zan khat a tua teembaw uk pa in Engaland teembaw uk pa innah vah haw hi. Zu tampi a dawn ciangin a paina thu a gen hi. Tua ahih ciangin Engaland pa in zu tampi dawn sak a zu a kham lai tak in Engalandte tai a, at tua gam a la hi. A zing sang ciangin Piancit teembaw uk pa in bangmah ngaihsun lo in tua gam la dingin a pai ciangin Engaland dial kaina a mu hi. Tua ahih ciangin tu dongin tua gam neu Engaland kumpinu in a uk hi.
Tua lai tak in Tui San sungah ka pai lai tak. Ni tumna lam le ni suahna lamah sehnel gam vive om ahih ciangin a khua lum mah mah hi. Ni khat sehnel tui tungah huih in a len ahih ciangin mei kai tawh kibang hi. Kat vei vei tua sehnel tampi huih in a len ciangin teembaw ukte in lam mu thei lo a, a khawl thei hi.
Ni khatah Port Sudan kici, khua khat ka ban hi. Tua khua ah ni samah mah hi. Sing kung tawm cik kimu a, inn leh lam khempeuh a thak a hi. Tua khua panin mihing sawm li bang teembaw tunga tuang hi. Tua mihingte in tua khuapihte hi lo hi, sak lam pan mei leeng tuangin hong tung hi. Tu in tembaw tuang te tampi a om hi.
A zing ciang in Itazilate in Tui San kanna mun ka mu ding hi.
Sang Mang Pa
MEITEI UK SUNG PASIAN KHANG NA THU
Kum 1912 Lusei sang mang pawlte hong pai uh hi. Kham Khaw Lun khua San Vawn a hong om hi. Tua takah sang inn lam a sang naupangte a vak thei hi. Tua munah vakna om hi, ci min a theih ciangin, Kaw Thang mi, Thado mi vaiphei mi Gamte mi, Guite mi a zakha khempeuh hong pai a lai a sin uh hi. Tua lai in Tapidaw tawm bek a om hi. Naseem zong tawm bek a om hi. Ahih hangin tua munah lai sim khempeuh in Pasian thu zui a, kumpinu sanga sim mi kim khat zong in hong sim uh a, Tapidaw hong suak uh hi.
1. Siate nasep dan. Kum khat in ni 60 khual zin uh hi. Lo nei lo uh hi. A khual zin lo lai-in amau omna khua tekah lai hilin a om ngitnget uh a a khua kim nai-ah miten zong a va sim zeel uh hi. Lai simna thu dot dingin Lai Siangtho a peloh in a tel sak uh hi. Tua lai in lai hilh Sia khat bek a om hi. Thu hilh siate zong lai hilh kawm zeel uh hi. Kha sum sang te a ngen a nei hi.
Tua ciangin sang naupang in sang kong khak kalah a khua a ciah ciangin khua a phakna a mi a muh khempeuh te kiangah Pasian thu a thei zazah in a hilh zeel hi. Kum 1910 lai in zato khat Luseite a sam uh hi. Tua pa a hong tun ciangin kitawi sangin a um zaw uh a, Tapidaw zong a hong khang hi. Lai Siangtho sim thei zong tam ta uh hi. Tua lai takin Tapidaw 100 pha pan hi. Tua ciangin amauti in Lai Siangtho kawlunti 2:9 a thu bangin amau nasep bang in Topa Pasian na a seem uh hi.
2. Thu hilh tha nuamna thu. Siam sin a zin ahih zongin tanau veh ahih zongin, kumpinu na sepna ahih zongin a vak khiakna khempeuh a thu hilh kawm zeel a, naupang in a naupang pih. Pasal in amau gual tek, nungak, tangval in zong a nungakpih a tangvalpih thu hilh a Pasian a lam a pi khiak tumin a hahkat mahmah in hilh uh a thu a nget sak uh hi. Siate thu hilh a, a zin ciangin nungak, tangval a hih theih thei in a zui a siate zong khat guakin a zin sak sak lo zazen uh hi. Khua a tun uh ciangin mi khua sungah lasa a numei pasal in thu a hilh uh hi. Tua ci bang in a mi gam sungah a seem uh ahih man Topa Pasian hehpihna le Kha Siangtho hihna in gam khua vak a hong piang thei a hi hi. Tua bang ahih ciaingin Tedim uk sung khua mial lak a leh nau Tapidaw om sung teng bang ci in Topa Pasian nasepna ih haksat ding hiam. Ih hun om lai khempuh in pe gai ding him. La in: khut guak tawh si in pai ding hiam/ Sapsa zawlsa tawnpih loin Tapa kiangah lung nuam ding hiam.
3. Thawh lawm thu panin: Mi kim khatte in sum bul bek tawh lawm a khiak thei in a ngaihsun thei uh hi. Dangka bek tawh lawm thei hi lo hi. Khi ahih zong in tau ahih zongin bilbah ahi zong in, nikten puan sil ahi zong in ante no tang mai no ahi zongin, sing khuah khat bek ahi zongin an tang vei khat ahih zongin, Pasian nasepna ding in a pe thei uh hi. Tua bang na nei na lam upna tawh pia a hih uh leh no in a na om uh zong it na tawh na lawm uh gamlapi a zong thu hilh in a pai thei ding hi. Na lupna tungah lum sa leh na tap tung mei awi kawmin Topa Pasian na na sep nawp leh, a tung thu khempeuh na ngaihsun ding uh hi. A mang thei dangka sum leh a sia thei nikte’n puan silhte leh na man lo anteh sing kang ahih zong, leitung it lo upnatawh a khiate in a sia thei lo tawntung nuntakna leh lung damna a lei zo ding hi, ngai dih un, ka u ka naute aw, vawh tam pa in tam a at ding hi, ci na thei tek ta un. Kawluntu nihna a lian 6:9 a thu ih ngaihsun ding hi.
Meitei gam sung tua ci bang sepna a om ahi ciangin tu in sang mangte in thu hilh sia 3 leh lai hilh sia 16 tawh, tui phum sia 5, zato 2, tua teng an a vak hi. A gawmin 24 a pha uh hi. Thu hilh ih sia 20 bang Tapidawten a vak uh hi. Tua ci bang eite in zong sia tampi tak ih kawih zawhnah ding ih sin sung tek tawh lawm ahih zong ih ki hantawn ding hi. Tedim gam sungah Topa Pasian gam a piannawh ma sang sia Pasian in hong huh tawntung ta hen. Zahuaat.
NIPI NI THU HILHNA
Septemba Kha ni 19
Zu Tangna Thu
Bawlan Lai Siangtho 26
3 Note in kei ka phuan khiatna lampi hong zui in, kei thu kham na tang le uh cin, 4 a hun a na sumte hong pia a, huannah a kungte in a gah hong gah ding hi. 5. Buh cilna thute in a leeng gah tui sukna dongin ahih zongin, leng gah tui na lap ding uh a, note in kham takin na ne ding uh a, nagam sungah sihna tawh na kpel ding uh hi.
14 Note in kei thu na ngai lo in, hih thu kham a vek pi in na tang kei uh a, 15. Kei phuang khiatnate na kih uh a, na muh hangin kei thu kham bang in ana hih kei uh a, kei thu ciamna in a thu pha kisia leh 16 note kiangah hih thu ken kong hih ding hi: Note na mittang ki sia leh lung sim lau san a na om na ding in dip kuatna lung lim tawh kibang cinatna note tungah ka kawih ding hi. Note in khaici na tuh uh hangin a kimanna om kei hi. Bang hang hiam ci leh na galte in a nee khin ding hi. 17. Note in ken kong mai neih ding a, na galte maiah kong lel sak ding hi. Note in galte hong uk na na thuak ding uh a, kuamah in hong delh loh hangin na tai ding uh hi. 18. Tua zah tak a na thuak hangin kei thu ngai lo a na om uh leh na si ciangin note mawhna hangin sagih vei tam zawin gimna kong pia ding hi. 19. Note na kisakna ka sutan ding hi. Na vantung in sik bang ahih zongin lei in sumngo bang ahih zongin kei ka hih zo a note in zah huaina tawh hahkat in na om ding uh hi. Note lei tung in sum hong pia kei ding hi.
Khiatna Thu
Bawlna Lai Siangtho sungah Itazilate gamtat na thu leh khual zinna thu a om kei hi, Pasian biakna thu leh Pasian thu kham vive a om hi. Siampite nasepna thu leh gamtatna thu zong a om hi. Gamtatna thu kham ei Tapidaw ih zui lai hi. Ahih hangin biakna ngeina thu a hi leh, ih zui kei hi, Zeisu ngeina ih zui zaw hi. Zuda mihingte in biakna thu a zui lai uh hi.
Dawite an ka vak leh cidamna, ludamna ka ngah ding hi. Khua zangin dawi a biak leh an ka hau ding hi, ci-in Khamtungte in a um mawk hi. Khat vei Dakdun khua tung ken saang panin suang lianpi kia a, inn khat a sia dek tak hi. Tua inn tek pa in: ‘Dawi biak lo maninah ka inn kisia dek tak hi’, ci-in sa a go pah hi. Ahih hang in Pasian in tua suang a khia kha, ci-in a ngaihsun zo kei hi. Ahih hangin hih thu Pasian thu a hih kei hi. Pasian in: ‘Ka thu kham na ngai leh na ci dam ding hi, an na hau ding hi,’ a ci hi. Itazilate in Pasian thu a ngai lai takin a ciam mah bangin a galte a zo hi. Ahih hangin Pasian thu kham ngai loin a om ciangin an zawng a, a galte ma iah a tai uh hi. Hih thu a nung ciangin ih sin ding hi.
Pasian in: ‘Nang a hih hangin, na tate ahih hangin zu leh zu hang na nei kei un,’ ci-in a kham hi. Gimna a pawl a pawl in, cinatna a pawl a pawl in, dahna leh kahna a pawl a pawlin a piang sak kua a hi hiam. Zu a hi hi. Na ngaihsun un. Kihauna, kituna, kihuatna kheempeuh in zu panin a kipiang hi. Tua ahih ciangin Pasian in zu a huatsa hi. Ei Tapidawte in zong zu ih huatsa hi. Mangkaang te in zong zu a huatsa hi. Khamtung panin sum hau peen pawl kua a hi hiam, lung pil peen kua ahi hiam, tha a hat peen pawl kua ahi hiam. Zu hai pawl ahi hiam. Hi lo. Zu ne lo zu tawm bek neekte a hi hi.
Septemba Kha Ni 26 ni
Itazilate a Pai Kik Uh Hi
Vakna Lai Siangtho 10
11 A kum nihna a kha nihna a ni sawmnih ni a phak ni in mei kang in a tetci a hong pang a buuk tung pan a kila khia hi. 12. Itazila mihingte in Tina mual gam panin khual zin a, a nung ciangin mei kang in Pazan gam laka kawl hi. 13. Amaute in Mawsi thu piak mah bang in a khua zin uh hi.
13. Mawsi in: Zahovah ngaihsutna bang mah in kote hong pia ding hi a zat lam kote in tu in khual ka zin hi. Kote tawh kibangin hong pai in. Kote in thu pha kong pia ding uh hi. Bang hang hiam ci leh Zahova in Itazila mi pawlte a hehpih ding hi, lung muanna om hi, ci in a sung pa Midian pawl Zuiaila ta Hobat kiangah a ci hi. 30. Hobat in: Kei hong pai kei ding hi, Ka omna gamah ka u ka nau ka beh te kiangah ka ciah ding hi, a ci hi. 31. Mawsi in: Kote hong nusia in pai kei in. Nang na theih bangmah in kote in gam lakah giah buuk ka sat ding uh hi. Nang in kote mit tang na hi ding hi. 32. Kote tawh kibang in hong zui leh Zahovah hong hilh hehpihna in kote ka ngah bang in nang zong kong hehpih ding uh hi, a ci hi.
33. Itazila mite in Zahovah mual tung pan pai khia a, nithum a kigam la a khual zin in a pai uh hi. Zahovah thu ciamna a sing kuang in amaute aading giahna phual bawlna a mun zong ding a maia pai hi. 34. Amaute in giahna phual pan a kipan ciangin Zahovah mei kang in amau tung ah sun laitak a om hi, khente gal kapte, Baikna ngeina a nei hi.
Thu Khiatna
Kum nih Itazilate in Tina mual tamah a tam hi. Tua kum nih sungah Pasian thu kham ngah tham loin Pasian baikna buuk le nate a bawl uh hi. A siampite in zong a nasepna thu a thei khin uh hi. Tui in a pai kik hi. Ahih hangin masa bangin sal a hih kei hi. Tu in upate, thu khen te galkapte biakna ngeina a nei hi.
V 11. Meii a kai hi. Tua meii in Pasian omna a lak sak hi. A khawl ciangin Itazilate a khawl hi, a pai ciangin Itazilate zong a pai hi. Amau lam hilh a hi hi.
V 12. Pazan gam: Tua gam Tina gam sak lama om hi.
35. Kiciamna sing kuang a paiciangin Mawsi in: Aw, Zahovah hong in la na galte nawt khia in, Nang hong mudah mite na mai ah tai khia ta hen, a ci hi. 36. Sing kuang a khawl ciang in: Aw Zahovah Itazila mi pawlte a tul a then a omna pai kik in, a ci hi.
V 29. Hobat in Mawsi tu a hi hi. Ama omna Tina mual kiangah a hi hi. Lam hilh a siam thei hi. Ahih hang hangin khamtung mi tawh kibangin ama omna ama mi pawl a ngai hi.
29. Mawsi in: Hong huh in: a cih ciang in Hobat a pai hi. A nung ciangin ama suante Kanan gamah lo a ngah hi.
33. Ki ciamna siangkuang: Tua sing kuang a hawih mah mah hi. Sing hawih peen in kibawl a, a pua lam kham a om hi. A tung ah kham tawh kibawl vantung mi nih a om hi. Tua kuang sung ah Pasian thu kham sawm kigelh suang pek nih a om hi. Siampi li in sing kuang a mau liangah a pua hi. Zanah biakna buuk sungah a kawih hi, Kanan gam a tun khit ciangin tua sing kuang biakna inn sungah a om hi. Tu in a om kei hi.
Mawsi in a tu kiangah a gen nah bang in ci Tapidawte in Lawki kiangah ih gen hi. Amaute in hong zui leh thu pha ih pia thei hi. Hovat in a zui hi. Lam pi ah Itazilate a huh thei hi. A tawp peenah om na hawih a ngah hi.
Autoba Kha ni 3 ni
Azong leh Miliam Khialna
Vakna Lai Siangtho 12
4 Zahovah in Mawsi leh Azong leh Miliam kiangah thakat in a gen hi: Ki khawpna buukah hong pai khia un, a ci ciangin a hong pai khia hi. 5. Zahovah in meii kang sungah hong kum suk a buuk ka maiah a ding in Azong leh Milia a sam a, a pai khia uh hi. Tua ciang in Zahovah in: ka thu ngai un. Note lakah kam sang pa a om leh tua pa kiangah mang muna tawh hong kilak sak ding hi, mang matna sungah a mah tawh ka hohpih ding hi. 7. Ka sila Mawsi in tu bang a om kei hi. Amah leh a inn kuanpihte a pha hi. 8. Kithei hak kam tawh loin a kilangin amah tawh ka hohpih ding hi. Zahova mel amah in amu ding hi. Tua ahih ciangin ka sila Mawsi na mawh sak ngam lo na hi lo hiam, a ci hi.
9. Tua ciangin Zahova hehna khang a mau kiang pang a pai khia hi. 10. Mei kaang zong buuk pan kikhin a vuuk tawh ki bang a ngo Miliam a pum a phaak hi. Azongin Miliam a et ciangin a phaak zo hi a mu hi. 11. Azong in Mawsi kiangah: Ka Topa aw, khialna ka tungah na om sak kei in. Bang hang hiam ci leh mi hai ka hi zo a ka khial zo hi. 13. Mawsi in Pasian kiangah: ‘Aw Pasian tua numei dam sak in ka thuum hi,’ a ci hi. 14. Pasian in: ‘Ama pa in ama mai tunga cil leh ni sagih a maizum ding hi lo ahi hiam. Tua ahih ciangin ni sagih ciangin giakna phual pua lamah om ta hen. Tua ciangin hong tum kik ta hen,’ a ci hi.
Thu Khiatna
Mawsi nasepna a haksa hi. Khat vei vei mihingte akhial hi. Khat vei vei Izipt gam a ciah kik nuam hi. Khat vei vei Pasian in: ‘Tua mihingte ka susiat ding a nangma suan panin mi pawl thak ka piang sak ding hi’, a ci hangin Mawsi in amau aading hehpihna a ngen sak hi. Ahih hangin tuin a nau Azong in ama thu a ngai nuam kei hi. Azong leh a nau Miliam in: ‘Pasian in Mawsi tung bek hi lo ei te tungah zong thu a pia zo hi,’ a ci hi. Azong siampi lian a hi hi. Ama thu siampi te khempeuh a zui ding hi.
V.6. Mawsi in kam sangpa sangin a lian zaw hi. Pasian in amah tawh ki ho thei hi. Mawsi in Pasian a mu hi. Mawsi in Topa Zeisu tawh kibang hi.
V. 7. Mawsi in mi pawl dang tawh kiteeng zo maninah Azong in a mawh sak hi. Tu-in Pasian in Mawsi bawlna pha a sa hi.
V.9. Itazilate in phaak cinatna a kihta mah mah hi. Mi phaak in khua sunga om zo kei hi, dai pua sang gampa lakah a om tawntung hi. Tua ahih ciangin Miliam dantatna in sina sangin a hak zaw hi. A cinat lai takin a nungta lai hangin a nungta tak tak kei ding hi.
V. 13. Mawsi a lung nem mah mah hi. Thakhatin Miliam khial a phel pah a Pasian kiangah hehpihna a ngen sak hi. Ni sagih ciangin Miliam in giahna phual pua lama om hi. Tua ni sagih sungah Itazilate a pai kei hi. Ni sagih a bei ciangin a tum kik hi.
Mawsi a lian zaw maninah Azong in a eng hi. Ahih hangin hih thu Pasian thu ahi hi. Ei et kheempeuh in Sia a hih hangin, upa ahih hangin ih om zo kei hi. Pasian in mi lian leh mi neu a sam hi. Mi lian bek a om leh a pha kei hi. Tua ahih ciangin ei et in pilna nei loin mi neu ih hi leh lung himawh in in hih zawh mah bangin ih hih ni.
Autoba Kha ni 10 ni
Gam Ente Thu.
Vakna Lai Siangtho 13
23. Eskol kamtat kuam a tun’ ciangin a gah a pak tawh a om leeng gah gui a hiang khat sat khia a mihing nih in nam khautawh apua uh hi. Tah leh gah leh thei thek gah zong a puak uh hi. 24. Itazila mi pawlte a sat khat leeng gah bawkte a en uh a hih maninah tua kuam in Eskol kamlah kuam a min a puak uh hi.
25. Ni sawm li a khen khit ciangin a Kanan gam etna thu man zo a a ciah kik uh hi. 26. Mawsi leh Azong a kipanin Itazila mi pawlte kheempeuh omna Pazan gam lak Kadasia muna tun’ ciangin tua mi hon pi kiangah a thu za sakin a gen a tua gam a gahte a lak uh hi. 27. Mawsi kiangah, ‘Eite in a Topa hong pai sakna gama ka tung zo to hi. Tua gam in nawi zu leh khuai zu a luan’ nag am a hi hi. Hih a gahte in tua gam a gahte a hi hi. 28. Ahih zongin tua gam mihingte a gol thei mah mah uh hi. A tha hat mah mah uh a to mah mah khuapi a a teeng uh hi. Tua tham loin Anaka mi pawlte zong kimu hi. Amalet mi pawlte khang lama om hi. Hit mi, Zibutih mi, Amali mihingte in mual dawn lama om hi. Kanan mihingte in tuipi gei leh Zawdan gun gei khonga teeng uh hi,’ a ci uh hi. 30. Kalet in: ‘A manlangin sim un la tua gam lak sak un. Zawh tuak hi lo hiam,’ ci-in Mawsi maiah mi kheempeuh a dai sak hi. 31. Amah tawh a pai khawmte in: ‘tua gam mihingte in eite in ih sim zo kei ding hi. Eite sangin a hat zaw tham loin. 32. Kote ka etna gam in a khuapihte a gol thei hi. Kote kamu tua gam mite kheempeuh in nakpi takin a saang hi. 33. Nepinim a suan Anak tate hi Nepinim mi pawl zong ka mu hi. Tuate mai ah kote in ih pum pi ki lak lehang kauphe bang mah ka hi hi. Tua bang a amau maiah ka om uh hi,’ ci-in amau te etna gam in Itazila mi pawlte munin a hawih loin thu a gen a za sak hi.
Khiatna Thu
A sawt loin Itazilate Kanasia ki ci mun khat a tung uh hi. Tua munah tui siangtho tampi om a amaute a tam uh hi. Kanan gam gi nai ahih maninah tua gam hawi, hawihlo, a mihingte hat, a hat lo ci-in gam sawm leh nih ette a sawl hi. Tua sawl takte ni sawmli tawntung Kanan gam a vak kawi kawi a a en uh hi.
V.23 Kanan gamah leeng gah tampi a om hi. Tua leeng gah a gawl mah mah a hiang khat tawi 6 bang a gik thei hi.
V. 24. Eskol a khiatna in hiang acinawpna hi.
V. 27. Itazilate in khuai zu bek a nei hi, ci khum a nei kei hangin khuai zu a duh mah mah hi. Mi kheempeuh in bawng nawi a duh uh hi. Tua ahih ciangin amau paina gam a hawih mah mah a laknah dingin, khuai zu le bawng nawi gam hi, a ci uh hi.
V. 28. Anak mi pawl. Ni dang lai-inah vantung mihingte in leitung numei tawh kiteeng a ta a nei hi. Tua a tate mi lian mah mah hi, ci-in tang thu a nei hi.
V. 29. Khamtung tawh kibangin Kanan gamah mi nam tuam tampi a om hi. Hih sungah kim khat bek a min kigelh hi.
V. 30. Kalet. Tua pa leh Zawsu bek a kihta kei hi. Tua nih bek kanan gam sunga tum uh hi.
V. 32. Gam ette a lau maninah thu man a gen nuam kei hi. Amau a gen mah bangin mihing nih bek a pua thei gah kawi pan a ngah thei ding hiam. Mi lian bang ci a nung thei ding hiam.
Mawsi leh Azongte in Itazilate a hanthawn hangin a ngai nuam kei hi. Izipt gam ih ciah ni ci-in suang tawh a deeng dektak hi. Tua ahih ciangin Pasian heh a: ‘Kum 20 tung kua mah in Kana gam a tung nawn kei ding hi,’ ci-in dan a pia hi. Tua ciangin mihingte a lung khel: ‘Lut ni,’ ci-in kana gamah a pai uh hangin a gal te maiah a tai uh hi.
Tua mihingte in Pasian a um kei hi. Tua ahih ciangin a pute a pate gama tung kei hi. Lei tung mihingte in Pasian thu a um kei leh vantung gamah nawpna a ngah kei ding hi.
