TEDIM THU KI ZAK NA LAI
ZULAI KHA 1926
The Tiddim Chin Hills News
Bu 7 Nambat 7
|
TEDIM THU KIH ZAK NA LAI
A ki pian na kum 1919
Khalkha khua kha sim in kih bawl hi.
Lai Bawl pa………………………….. Sang Mang Pa
Dangka Sangte…………………….. Dam Khup leh Thuam Hang
Kum sim in aman hamu ahi hi.
Khal kha khua zulai kha ni 1, 1926.
Kawl gam Homalin khua sak lamah khamtung mi tawh ki bang pil na nei lo mi pawl khat a om hi. Tua mihingte a hang mah mah a kua mah in a zo ngei kei hi. Kumpinu in ama gam uk lo a Mang Kang te apai ngei kei hi. Amau te in sila khawi lo hangin galte a mat ciangin midangte kiangah a zuak uh hi. A hang mah mah a pasal khempeuh te in a galte lu a la zeel hi. Tua galte lu a lak ciangin dak in lu neu bawl a numei in ki a ngawnga kai bangin dak lu a kai hi. A mau khua mual ah a galte pum nate tuam a tuam a ki kawih hi.
Tu kum tua mihingte in kumpinu tawh kilem inn pipa gam sim a mina man uh hi. Kumpite in a mau gal kap khuan (kap-huan) uh a, tua khua sim sak hi. Tua gam sim ding a hak sa hi. Lampi a om kei hi. Mual asang mah mah a tupi vive a om hi. Galte in thau tawm bek a nei hangin teipi leh thal tampi tawi a, tua thal dawn ah gu a zut sak hi. Tua thal tawh galkap khatpeuh kha leh a si pah ding hi. Galkap te thau awng neu a hih manin ah thau tang zong neu a hong that zo kei, ci in a um mawk uh hi.
Sizangte bang in tua mihingte in galkap a nang tawntung hi. Khua kim khat a lut pah hi. Ahih hangin khua lian nih a lut nuam kei hi. ‘Kong kap ding hi,’ a ci uh hi. Amau hausa lian khat in galte lutang guk a ngah zo hi. Sagih a deih in bawng cin bangin galkapte phualah a tum sim hi. Galkap khat kaap ding a ngim laitak in gal kap ding in mu a a that masa hi.
A lut nuam lote khua a naih ciangin a kahto ngam kei hi. Bang hang hiam cih leh lam gei lopa lakah so tampi kiphut hi. So bek hi lo, tei pi zong so bangin a kiphut zo hi. Tua a hih ciangin galkapte lam kiim pai in a khua nung lam pan in kahto a, za sim hi. Ahih hangin galkap a tai kei hi. Thau tawh, tei pi tawh, lum tawh, thal tawh nak pin a do uh hi. Mi tampi ki that khit ciangin a tai uh hi. Gal kapte in a khua mei tawh a hal khit ciangin a sam uh hangin a lut ngam kei hi. Tua a hih ciangin galkap a ciah uh hi. A ciah uh a muh uh ciangin tha khat thu in delh a, a kap kik hi. Galkap te pai kik a galte a that kik uh hi.
A ciah uh lai tak in galkap te in phun tuangin gun lam ah a tawn suk hi. Mangte phung ki sia a amau an khempeuh tui sungah a kia hi. Galkapte phung a ki sia kei hi.
Galkap 50 bang si a, mi tampite ki kha hi. kumpinu galkap khat beek kih that lo hangin thum bang li bang so tawh ki sun hi.
Amaute a lut nuamlo ahih maninah galkapte ni kum ciangin a kuan to kik in ki um mawk hi.
KHAM TUNG SIVUAIZI THU
Kha lui pan kih beh lap hi.
Nitak nai 3 ciangin Zahuat in Meitei uk sungah Pasian gam bang ci ki zai sak hiam, ci in hong hilh khit ciangin, pawlpite thu ki zak na lai siate in a sim uh hi. A simna a bul in anuaiah a ki gelh hi.
Pawl pi | tapidawte | Tui ki phumte | Site | Tawpte | Ngun
|
Khalkha Khuasak Phalam Hualngo Tukial Tezang Dol luang Nahnuai Tangphila Hong Nai Tedim Lumbang…… Sihaung……. Nacaung……
| 60 190 63 78 44 37 37 75 47 38 134 264 | 2 38 8 27 5 7 15 5 1 … 17 33 | 1 1 1 1 1 0 0 3 0 .. 1 2
| 16 5 4 0 0 0 0 4 5 … 6 9 | 163 0 0 197 10 6 57 12 0 53 15 0 66 1 0 55 7 0 20 5 3 135 3 9 82 8 0 ………… 195 3 9 185 7 0 |
khempeuh | 1,067 | 158 | 11 | 49 | 1,112 4 0 |
Ni kumah Tapidaw 1,283 pha hi. Bang hang in a kiam hiam. Ni kum Lusei Tapidaw 274 pha hi. Tu kum tuate in Monzua sang mangpa khut nuaia suak uh hi. Tua tham lo in Zahau Tapidaw kim khat Lusei gamah a lal uh hi. Tua pawl nihte kisim lehang Tapidaw 1,300 val a om ding hi.
Ni kum sangin tui sung kiphum sa 3 a tam zaw hi. Hong Naite sum ki ngah nai kei hi. Ni kum dangka 1,213-14-6 ki pia hi. Tua ahih ciangin tu kum sum tawm zaw ki pia hi. A site leh a tawpte tawm zaw ahih maninah lung damnah ding hi.
Zan lam nai 7 ciangin mi tuam tuam in thu hong hilh uh a, pawlpi tuam a tuam la a sa uh hi. Sivuai ka khempeuh te ka lung dam uh hi.
Ni 6 ni
Zanah guah a zu maninah ki khawpna buuk sungah kawt a, Buukphil Tapidawte kikhawp na innah ka ki khawm uh hi. Zahau pa za Ngai Sun in hong hilh khit ciangin thu ka ngen uh hi.
Nai 11 ciangin buuk sungah pai a ka kikhawm thei hi. Sia Aung Duai in Kazian gam ah Pasian gam bang ci ki zai thei hiam, ci in kawl kam in hong hilh hi. Tua khit ciangin upate in amau kizakna lai hong sim hi. Ki ciamnah ding thu tam kei hi.
Sivuaizi upate a kikhawm a a kivaihawm ciangin tampi hong suak kei leh ki khen kei le a ki lawm hi. Hih thu Tapidawte a lung kim hi.
Tapidawte in Lawki tawh ki tawng leh tui a tuak thei kei ding hi. Hih thu zong Tapidaw a pha a sa hi.
Nitak nai 3 ciangin Lusei Tapidaw khat in lusei gam sungah Pasian gam bang ci a ki zai hiam, ci in hong hilh masa hi.
Tua khit ciangin thu hilh siate in amau nasep na thu hong za sak uh hi. Ni dang sangin tu laitakin khamtung mihingte in Pasian thu a ngai nuam zaw hi. Mun khat peuh mah ah bawl siat na leh haksa a om hangin gimna sangin lungdamna a tam zaw hi, hong ci uh hi. A khual zinna le nasep na ni in:
Van lo ni 155 Sang Ling Ni 140
Za Huat 76 Lian Zam 110
Nawl Kling 190 Vial Nang 173
Vang Tual 149 Thang Cin 120
Dam Suan 152 Thuam Hang 131
Lal Bawng 157 Sang Phen 140
Thuam Hang in mi 50 leh Vial Nang in mihing 17 tui sungah a phum hi. Lal Bawng in tui sungah kuamah a phum kei hi. Tua khit ciangin upa vai hawmte thu ka vai hawm uh hi.
Nahnuaite in sia khat a ngen hi. Kawl gam ah tui phum sia om lo ahih ciangin a hak sa hi. Tua khua tawh kih nai Tapidaw khua nih pha hi. Sivuaizi in ama an pia a kum sim in Thaang kai lam sang khual zin ding in thu a pia leh Sia Dam Suan, Nahnuai khua sia ding in pia leh ki lawm hi, a khen sat hi. Tua ahih ciangin Dam Suan in sivuaizi panin kha sum 15 a ngah ding hi.
Zahuat in kha sum 5 ngah in kum thum bang pha takpi na a seem zo hi. Tu kum Dam Suan kha sum peek 5 a kiam ding hi. Hih peek 5 Zahuat ki pia leh ki lawm hi, ci in sivuaizi in a khen hi.
Khalkha uk sungah Cawng Tula kum thum bang kha sum tawm ngah in na a seem hi. Tua kha sum sia Aung Duai in a pia ngei hi. Tu in Cawng Tula zi a nei ding hi. Tua ahih ciangin ama in kha sum 10 ngah le ki lawm hi. Tua peek 10 sung pan Sia Aung Duai in peek 7 tu kum a pia lai ding hi. Tapidaw te a lung kim uh hi.
Tu kum Pilung sivuaiziah peek 200 phuak leeng ki lawm hi. Ahih hangin Tapidaw kim khat a lung kim lo maninah upate a vai hawm sak kik hi.
Ni kum ciangin Sivuaizi ki tun khua upate in ama thu ki zak na a hong za sak uh hi. Khua thum te in hongsam hi. Tedim khua, Nacaung khua le Nahnuai khua. Nahnuai khua tung leng ki lawm hi a ci uh hi. Tapidaw a vai hawm khit uh ciangin pha hi, ni kum ciangin Pihuaizi kha ni 24,25,26,27 ni Nahnuai khua Sivuaizi a tung ding hi, a khen uh hi.
Ni kum Sivuaizi ki vaihawm nah ding upate in amau kih zak na lai a hong sim hi. Tua lai a nung ciangin Thu Kih Zak na lai sungah ki gelh ding hi.
Ni tak nai 7 ciangin kah ki khawp uh ciangin thu nei te in thu hong hilh hi. Lasa nuam te in la ah sa uh hi.
Ni Pi Ni
Zing sang nai 7 ciangin kah ki khawm uh a la ka sa uh a thu ka kinget sak uh hi. Zanah Tapidaw tangval khat a si maninah ka dah uh hi.
Sun nai 11 ciangin Lian Zam leh Lian Lut Lo in thu hong hilh hi. Buukphil khua mual dawn ah om a hih ciangin tui phum nah ding tai 3 bang gamla gunah ka pai uh hi. Tua gun sungah Sang Mang pa in mihing 8 bang tui sungah a phum hi. Ka ciah to ciangin mi khempeuh te in mi si han bawl dingin suang peek ka pua uh hi. Sivuaizi zawh ciangin tua tangval luang a vui uh hi.
Ni tak nai 3 ciangin Sia Vial Nang, Thuam Hang, Lal Bawng, Thang Cin leh Vang Tual te khut tung pan in leenggah tui leh an lum ngah in ka ne uh hi. Tua laitak in a nuam mah mah hi. Kua mah gen lo in ka om a Pasian hehpih na a tel takpi ka lung ngai thei hi. Pasian in kote lak ah a om ci ka thei tak hi.
Ni tak nai 7 ciangin khat vei kah ki khawm uh hi.Lal Bawng leh Vang Tual in thu hong hilh masa hi. Tua ciangin sivuaizi upate in khanglam dangka puak na thu a hong sim kik hi. Pilung sivuaizi peek 120 kawl lai siangtho sang inn peek 60 Kazian lai siangtho sang inn peek 20 pia leng ki lawm hi, a ci uh ciangin Tapidaw te a lung kim uh hi.
Tua ciangin mei inn a ki siat dongin la ka sa uh hi. Pawlpi a tuam a tuam lai hilh sia te, thu hilh sia te, tui phum sia te numei te la a sa uh hi. Mei inn a ki siat ciangin ka tawp uh hi. Ahih hangin mi kim khat in amau tuna inn sungah zan kim dong in la a sa uh hi.
NI PI NI THU HILH NA
Zulai kha ni 18 ni
Pasian in Mawsi a sawl hi.
Pusauk na Lai Siangtho 3,4
10. ‘Tua ahih ciangin nang mah in Itazila suante keima mihingte Izipt gam ah pia khiat pih ding in Pazaw kumpipa kiangah kong sawl ding hi, a ci hi. 11. Mawsi in zong ‘Pazaw kiangah pai a Itazila suante Izipt gamah pai khiat pih ding kei kua ka hi hiam, a ci hi. 12. Pasian in: ‘A man tak pi nang lamah ka om ding hi. Nang ka hong sawl na lim kitel na in nang in tua mite Izipt gam pan na pai khiat pih khit ciangin hih mual tungah Pasian na bia ding hi, a ci hi.
13. Mawsi in: ‘En in Itazila suante kiangah tunga ih pu ih pa te Pasian note kiangah kei hongsawl hi ka cih ciangin amaute in tua Pasian a min kua hiam ci in hong dot kik uh leh bang ka ci dawng kik ding hiam, a ci hi. 14. Pasian in: ‘Ka om Hangin ka om hi. Itazila suante kiangah Ka Om Hi in hongsawl hi, na na gen ding hi a ci hi. 15. Khat vei Pasian in: Hih bang in Itazila suante kiangah na gen ding hi. Abiahang Pasian, Izet Pasian, Zakoh Pasian Zahova in note kiangah kei hongsawl hi. Hih min a tawn tung ka min hi dinga, a khan tawn tung kingaihsutnah ding a hi ding hi, a ci hi.
10. Mawsi in: ‘Topa aw, kei kam ka siam kei hi. Ni dang ahih zong ka siam kei hi. Kei na sila pa thu na hong piak zong ciang ka siam kei hi. Kam man lang lo thu gen zekai mi ka hi hi. Zahova kiangah a gen hi. Zahova in: Mihingte kam kua bawl a hi hiam. A pau thei lo, beng ngong, mit khua mu, mit khua mo lote kuabawl hiam Keimah Zahova bawl hi lo a hi hiam? 12. Tua ahih ciangin tu ih pai in na kam kei ka om hi. Bang na ci pau ding ka hong hilh ding hi, ci in thu a pia hi.
Khiatna Thu
Mawsi a let ciangin ama mi pawlte hehpih a, a kihta manin tai a Dimian gam kum 40 a teng hi. Tua kum a cin ciangin Pasian in Itazilate gimna ngaihsun a, hehpih ning, ci in Mawsi a sawl hi.
11. Tu in Mawsi a lung kiniam zo hi. Izipt pa a thah lai tak in a kipha sak hi.
12. Hih mual: A min Tina kici hi. Tua mual dawn panin Mawsi in Pasian thu kham a ngah hi.
Itazila te in Mawsi a thei kei hi. Amau kiangah a tun ciangin: Na letmat kawi ah om hiam, ci in a dong ding hi. Ka om Hang in Ka om Hi: Pasian kuamah in a piang sak kei hi. Leitung leh vantunga a om ahih ciangin leitung min kipia zo kei hi.
15. Ahih hang in Itazila te in a theihnah dingin amau aading min a kipia mawk hi. Abiahang in Itazilate piang sak pa hi. Izet in ama ta hi, Zakoh in ama thu a hi hi.
10. Mawsi a lau hi. Tua ahih ciangin nialna thu a zong kik hi. Pasian hongsawl ciangin mi tampite in Mawsi bang in a gen ngei hi.
11. Hih thu a man hi. Pasian in kam leh lei a bawl leh tua kam leh lei a siam sak thei hi. Zeisu in ama nungzuite kiangah: Bang ci ka gen ding hiam, lung hih mawh kei un. Kha Siangtho in nomau thu hong pia ding hi, a ci hi.
Pasian in: Nang lam ka pai ding hi, a ci hi. Tua ahih ciangin leitung mi lian belte khat, Mawsi a hi hi. Tua mah bangin Zeisu in a nungzui te a sawl ciangin: Van leh lei a bei dong in nomau tawh ka om khawm ding hi, a ci hi. Hih kiciam na thu gen loin ei lam a om leh kua in hong zo thei ding hiam Pasian in eite khempeuh hongsawl zo hi. Pasian thu hong piak bang in hih hiam. Mawsi tawh kibang nasepna lian bawl dingin Pasian in hongsawl kei hi. Ahih hang in Tapidaw khempeuh in nasep ding a nei tek hi.
Zulai kha ni 25 ni
Pasian Paisan Pawi
Pusuakna Laisiangtho 12
1 Pasian in Izipt gam pan Mawsi leh Azong kiangah: 2. ‘Tu kha nomau kiangah cil tung kha a hi ding ki. Nomau kiangah kum kipatna kha a hi ding hi,’ a ci hi.
21. Tua lai takin Mawsi in Itazila upa lian kheempeuh sam a: ‘Note in inn kuante tawh a kituak a kituak in tuu note la in la, Pasian Pawi sa go un. 22. Phumpeeng ngum lawm khat la in, kuang sungah kikawih si lakah pap khit ciangin kong khak, kong biang lang nih in zut ta un. Tua khit ciang zing sang mateng kuamah a inn pua lam a pusuak thei lo ding hi. 23. Bang hang hiam ci leh, Pasian in Izipt mite dan pia ding in a pai let ding hi. Pasian in kong khak leh kong biang lang nihah si baang a muh ciangin a paisan ding hi. A sugawpte in no te dan pia dingin inn sungah tumnah ding thu pia lo ding hi. 24. Note leh na tate tungah thu kham om ahih ciangin hih thu na zui tawntung ding uh hi. 25. Thu ciamna bangin Pasian hong piak ding gam na tun’ uh ciangin hih ngeina na bawl dinguh hi. 26. Na tu note in, hih ngeina a cinawpna hong dot leh: 27. ‘Pasian in Izipt mi te dan pia a, eite inn hong hehpih lai takin Izipt gamah Italiza mite inn a pai san pawi sa hi,’ na ci ding uh hi, Mawsi in a ci hi. A ute in kunin bia uh hi. 28. Tua bang Mawsi leh Azong Pasian in a vai khak bangin Itazila mite in a bawl uh hi.
A thu bul pi: Khazi a hi, eite Pasian Tuu no in eite aading biakna sa kigo zo hi.
Khiatna thu
Pasian in a sawl mah bangin Mawsi, Izipt gama ciah hi. Lampi ah anau Azong tawh kituak a, a nih mah Kumpipa kiangah pai-in: ‘Itazilate in Pasian bia dingin na suakta sak ta in,’ ci-in a gen ciangin kumpipa heh a, Itazilate a bawl siat seem seem hi. Tua ahih ciangin Pasian in tua Kumpipa lung kiniam sak dingin bawl siatna nam kua tawh dan a tat hi. Si tawh, uili tawh, bawng pul tawh, meima tawh, gial kia tawh, khauphe tawh, khua mial tawh, uiphuk tawh, thosi tawh dan a tat hi. A gim lai takin Kumpipa kisik kik a: ‘Kong heh pih ding hi,’ a ci hangin dan a beih ciangin a lung khoh kik a, a suakta sak nuam kei hi. Tua ahih ciangin Pasian in dan nam khat tawh dan a pia lai hi. Hih dan a piak ciangin Kumpipa in Itazilate a shuakta sak hi.
V. 1. Tu dongin Itazilate sila a hi hi. Tu-in to nei lo mi pawl a suak ding hi. Tua ahih ciangin tua kha amau kih pianna kha a hi hi.
V. 21. Tua tuu no, ni li kikhawi zo hi. A that khit ciangin sa em a, silnu om lo anlum tawh, meh tui kha tawh inn kuan kheempeuh a ne khawm uh hi. Amau puan silhin a ne uh a, a zo khit ciang in Izipt gam pan a tai uh hi.
V. 23. Pasian in bang ci in Iziptte dan a tat hiam. Inn kheempeuhah tapa upa peen a that sak khin hi. Ahih hangin ama vantung mi in Itazilate inn a tun’ ciang in, si a mu leh a paisan hi.
V.24. Tu dongin Itazilate in kum simin Pasian pawi sa a ne uh hi. Topa Zeisu eite aading a si ahih ciangin eite tuu no hi a, paisan pawi a kam kei hi. Lai siangtho thak sung pan Zeisu, tuu no, kici hi.
V. 25. Tua gam. Pasian in Abiahang kiangah: ‘Na tu na tate in hi Kanan gam a luah ding hi,’ ci-in a kiciam zo hi. Ahih hangin tu lai tak Itazilate in tua gam a uk kei hi.
V 26. Tu lai tak zong Itazilate in paisan tuuno sa a ne lai takin ta neu peen in: Ka ta aw bang hang hih tuu sa ih ne hiam, a ci in a dong hi.
Zeisu in eite Pasian tuuno a hi hi. Itazilate inn kong khakah si om ahih ciangin a kih gum mah bang in ei Tapidaw in Zeisu si ih muangmaw maninah gumna ih ngah tek hi. Pasian vantung mi in Itazilat innah a paisan mah bangin Pasian hehna in eite hong paisan ding hi.
Awgu kha ni 1 ni
Itazilate Tuipi Suangapan Kigum Hi
Pusuak Lai Siangtho 13,14
12. Amau sun tawh zan tawh a pai theihnah dingin Pasian in sunin meei, Zang in khua vak mei lam hilh ding amau maia pai sak hi. 22. Sun in meei, zan in khuavak meii, amau pai pan lakhia ngei lo hi.
10. Pazaw kumpipa a ngaih ciangin Itazilate in en a Izipte a delh a muh ciangin lau uh a, Pasian kiangah a ko uh hi. 11. Tuate in Mawsi kiangah: Izipt gamah han om lo ahih maninah gampa lakah hong si sak dingin hong paipih na hi hiam. Bang hangin Izipt gam pan pai khiat ding in hong kheem na hi hiam. 12. Izipt gam pan eite in Izipt mihingte na ka seem ding inhong nusia in, ci in ka gen hi lo a hi hiam. Bang hang hiam ci leh, gam lak si sangin Iziptte na ka seem leh kilawm zaw hi, a ci uh hi.
13. Mawsi in: Lau kei un la ding un. Tu ni namu nading a bawl sa Pasian honna vang letna na mu ding hi. Bang hang hiam na ci uh leh tu ni na mu uh Izipte na mu nawn kei ding hi, a ci hi.
16. Pasian in Mawsi kiangah: Na ciangkhut tuipi tungah na lam in la na khen sak ding hi. Izipte lai po tungah tuipi lakah a pai ding uh hi a ci hi.
21. Mawsi in a khut tuipi tungah lam a ni suakna lam pan zan khua vak dongin huih nakpi nung in Pasian in tuipi a nung lam khin sak a, tuipi, lei po a piang sak a tuipi a kihkhen hi. 22. Itazila suante tui lakah leipo lama pai uh hi. A vei lam, a ziat lamah tui in phung bangin a om hi.
Thu bulpi: Pasian in ka hatna le ka losana hong suak hi.
Ka hong hon Topa a hi hi.
Khiat na thu.
Izipte in a tate hangah a kap lai takin Itazilate a tai uh hi. Izipte kim khat Itazila mite hehpih a kham leh suang man pha a pia uh hi. Ahih hangin a sawt ma-in Kumpipa in a gimna ngaihsun loin Itazila sila khawi kik dingin a gal kaapte tawh a delh uh hi. Itazilate a tai ciangin pasal 600,000 a pha hi. A taina kum tel takpi kithei lo hangin Zeisu pian ma kum 1,250 kum hi ki um hi.
V. 21. Itazilate lam thei lo ahih maninah Pasian in meii tawh a hilh hi. Tua gamah ni sa lua a hih maninah khat vei vei zanah a pai nuam ding hi.
V. 11. Itazilate a pai khiat laitakin a lung dam hi. Tu-in gimna, launa a thuak ciangin a dah hi. Izipt gam panin Pasian vangletna a mu zo hangin a mangngil zo hi. Zeisu in: ‘Mi khat peuh mah lo kho a kihpat khit ciangin a nung lam a en le vantung gam tung ding a kilawm kei hi,’ a ci hi.
V.13. Mawsi upna a lian hi. Pasian vangletna a mangngil kei hi. Amah in Sia hawih a nei hi. A khut nuaite a lau ciangin amah a lau kei hi.
V.21. Tua tuipi a sau kei hi. A thuk zong a thukpi kei hi. Tua ahih ciangin huih nakpi a nun ciangin a kikhen thei hi. A zing sang ciangin Itazilate tui lakah lei pona lamna pai thei hi. Izipt gal kaapte in a muh ciangin a mau zong a delh uh hi. Ahih hang in Itazilate gal khatat a tun’ khin ciangin Mawsi in a khut tuipi tungah lam kik a, tui kituak kik a, Izipt gal kaap kheempeuh tui lakah a si uh hi. Tua ahih ciangin Mawsi a gen mah bangin Itazilate in Iziptte a mu kik nawn kei hi.
Thu bulpi in Itazilate lung damna lasa lang khat a hi hi. Itazilate in Pasian a ko lai takin: ‘Maiah nawt un, ci-in thu a pia hi. Tua mah bangin eite in gimna ih thuak ciangin kap lo in, ko loin maiah ih nawt leh Pasian in hong hon ding hi. Ih galte hang bangin hang ni. Ih kidempihte a nuam bangin ih nuam ni. Tua mah bangin ih hih leh ih zo ding hi.
Awgu Kha ni 8 ni.
Pasian in Mana Anluma pia hi.
Pusuakna Lai Siangtho 16.
11. Pasian in: ‘Itazila mite nawh sak phun’ na aw ka za hi. 12. Ni tak tungin note in sa na ne ding uh hi. Zing sang ciangin an lum na kham ding uh hi. Kei in no Pasian ka hi, na hong thei ding uh hi, ci-in a mau kiangah na gen in, ci in Mawsi thu a pia hi.
13. Ni tak tungin giah buukah dimin meeng keeng hong leeng hi. Zing sang ciangin giah buuk kiim kheempeuh dai a kia hi. 14. Dai a kap ciangin dai tui khal bang a neu no no nate in leitungah om lai hi. 15. Tua nate Itazila mite in a muh ciangin. ‘Bang a hi hiam,’ ci-in khat leh khat kidong uh hi. Mawsi in: ‘Hih nate note neek dingah Pasian hong piak an lum a hi hi,’ a ci hi. 16. Mi kheempeuh in amau buukah om mi tawh a kituak a neek khawp ding khat in lawh khat ciat la un, ‘ci in Pasian thu piakna ahi,’ Mawsi in a gen hi. 17. Itazila mite in tua bang hih a, a tawm a tam a kituakin a la uh hi. 18. Lawh ta tawh a teh uh ciangin tampi a ngahte a val lo ding, tawm kha a ngahte a sam lo dingin amau kheempeuh in a neek ding uh in a la uh hi.
35. Itazilate in mi omna gam a tun’ matengin kum sawm li tawntung Khanan gam a tun’ mateng manna an lum a ne uh hi.
Thu Bulpi: Zeisu in: ‘Kei nuntakna an ka hi hi,’ a ci hi.
Itazilate in Tuipi pan pai khia a, Taina mual lam a tawh uh hi. Ahih hangin tua lam a haksa hi. Tui tawm kha a om hi, lo a om kei hi khua zong a om kei hi. Itazilate in ganhing tampi a nei manin a gim thei hi. Ni thum tui mu loin a pai khit ciangin tui khuk khat a tung hangin tui kha a, a ne zo kei hi. Pasian in a hehpih a, Mawsi in sing hiang khat tui sunga khiat ciangin tui lim suak a, a ne uh hi. A nung ciangin an a bei ta hi. Itazilate in Mawsi a maw sak kik a: ‘Nong kheem hi. Izipt gamah an tampi a om hi. Hih laiah ka si khin ding hi,’ a ci uh hi.
V. 12. Itazilate in Pasian kiangah hehpihna a ngah tawntung kei le ama thu a um thei kei ding hi.
V.13. Meeng keeng: Tu lai tak zongin tua vasate kum simin khua khal lai tak, sak lam Sugi gamah a leeng uh hi. Phalbi ciangin Apilika gam a leeng suk klik hi. A gim ciangin lei tungah a tu laitakin mihingte in a khut in a man thei hi.
V. 14. Tua khomun bang tawh kibang hiam ki thei kei hi. A kang hi, a khum hi, sim lo bangmah ki thei kei hi. Ahih hangin Itazilate in kum 40 tawntung a ne a hih ciangin a lim hi, ki ngaisun hi.
V. 16. Pasian in mi kisap mah bangin hehpihna a pia hi. An duh gawh kim khat in Pasian thu um loin zing ciang neek ding tua khomun tampi a khawm hi. Ahih hangin a zing ciangin a thawh ciangin khomun a muat khin hi.
V. 35. Itazilate in ganhing neih a hih ciangin manna bek a ne kei hi. Ahih hangin manna kum sawm li tawntung ni simin a ne hi. Kanaan gam a tun’ ciangin manna a kia nawn kei hi. Manna: Tang laite kam in anlum a cinawpna hi
Zeisu in: ‘Kei nuntakna anlum ka hi hi,’ a ci hi. Ei Tapidawte manna a hi hi. Pasian in manna a piak mah bangin Zeisu zong a hong pia hi. Itazilate in an dang mu lo ciangin manna a ngah mah bangin eite in lam dang, biakna dang panin lung damna ih ngah thei lo ciangin Zeisu kiangah nawpna ih ngah uh hi. Itazilate in manna ne loin a si thei mah bangin eite in Zeisu ih up kei leh ih si khin ding hi. Pasian in Itazilate gampa lakah si sak dingin Izipt gam panin a suakta sak kei hi. Lampi a tawn laitakin kum 40 tawntungin Pasian in a keem hi. Tua mah bangin Pasian in eite hong keem tawntung ding hi.
Awgu Kha ni15 ni
Zetaw aThu Hilhna Pha
Pusuakna Lai Siangtho 18
14. Mawsi in mite a bawlna kheempeuh a sungpa in a muh ciangin: ‘Hih mite bang ci bawl na hi hiam: Bang thu ahi hiam. Nang guak tu in mite kheempeuh zing sang a kihpan ni tak dongin na mai ah bang hangin a om uh hiam. 15. Mawsi in: ‘Hih mite Pasian kiangah thuum lai nuam a, kei kiangah hong pai uh ahih ciangin hih bang hi,’ a ci hi. 16. Amaute in thu a nei leh kei kiangah hong pai uh a, kei in ka khen sak hi. Pasian thu khamte zong amaute ka hilh hi,’ ci-in a sung pa kiang ah a gen ciangin. 17. Asung pa in: ‘nang hihna kilawm kei hi. 18. Nang leh nang tawh a om khawm hih mite mantakin na kiam ding uh hi. Hih thu nang aading haksa lua hi. Nang guak hih zawh lo ding thu a hi hi.19. Ka thu hong mang in. Ka hong ngaihsut sak ding hi. Pasian nang lamah om ding hi. Nang in Pasian tawh kipawl thute Pasian kiangah tum in na gen ding hi. 20. Thu khamte amau na hilh ding hi. Amau paina lam bawlna thu zong na hilh ding hi, na lak ding hi. 21. Tua tham loin Pasian in a kih ta , Thu zuau gen lo, huai hamna a muhdah, siam thei na a neite, mi kheempeuh sung pan lakhia in la, tul khat uk, za khat uk, sawm khat uk, kawih ta in. 22. Tua mite in a tawntung in mite thu khen ta hen. Thu lian a hi leh nang kiangah hong thuum lai ta hen. Thu neu ahih leh a mau thu thu in khen ta uh hen. Tua bangin a maute in hong sepih leh nang aading nuam tuam ding hi. 23. Tua bang Pasian thu tawh na hih leh na kip ding hi. Hih mi kheempeuh amaute om na a nuam takin a ciah ding uh hi,’ a ci hi. 24. Mawsi in zong a sung pa a gen bangin a hih hi.
Thu Bulpi: Mi kheempeuh in a mau na sep tek seem ta un.
Thu Khiatna
Itazilate a pai pai uh a, khat vei tui om lo hi. Amau te in Mawsi nakpi aheh maninah suang tawh deeng ding a lung ngai uh hi. Pasian in suangpi khat pan tui a luang khia sak hi. Anung ciangin Amalakih mi tawh kido uh hi. Mawsi, mual kah to a, akhut lam lai takin Itazilate in a zo hi. Akhiat ciangin a lel uh hi. Ni tum dong in a khut lam a hih ciangin Itazilate in a galte a zo khin ta uh hi. Tua pan in tina mual ah tunga tua mual panah sawt veipi atam uh hi. A tam laitak un Mawsi sungpa in Itazilate giakna phualah haw a, amau ngeina en hi.
V. 18. Mawsi bek in thu khen leh a gim ding hi. Mihing a hi leh man langin khen na a ngah zo kei leh a dah ding hi.
V. 18,19, Mawsi in thu hilh pa mah bangin Pasian thu a hilh ding hi. Midang te in thu a khen ding hi.
V. 21. Mi mawhte in thu khen upa a suak thei kei hi. Thu mante bek a deih hi. Sum guhte in thu khen a siam kei hi.
V.24. Mawsi Itazilate uk pa hi. Ahih hangin mi dangte thu siam a hi leh a mang thei hi. Mi liante kheempeuh in huhna a deih tawntung hi.
Hih thu sungpan in Itazilate ki-uk na kihpat na hi. Tu ma amau te sila hi uh a Mawsi thu bek a ngai hi. Tu a kihpan in amau lawmte thu zong a ngai ding hi. Mawsi sung pa thu leh Kumpinu thu khen ngeina thu a ki bang hi, ci-in ciamte un. Bang hang a ki bang hiam ih ci lehni dang lai inah England kumpipa khat in Lai Siangtho sungah hih lai a sim ciangin hawih a sa a, a zui hi. Ei Tapidawte in zong hih ngeina ih zui a, thu khen dingin Sivuaizi upa vaihawmte leh pawlpi upa vaihawmte ih nei hi.
Zeisu in: ‘Mi kheempeuh in amau nasepna tek hih ta in,’ a ci hi. Eite kheempeuh in nasepna ih nei hi. Mi pilte nasepna le mipil lote nasepna ki bang lo hangin Pasianin Tapidaw kheempeuhte na hong sawl hi.
