TEDIM THU KIH ZAK NA LAI
PIBUAZI KHA 1926
The Tiddim Chin Hills News
Bu 7 Nambat 2 |
A SUNG A OM THU TE
Tedim thu kih zak na lai
Leitung mi gamtatna thu
Lai Siangtho Tangthu 17
Nipi ni thu sin na ding
TEDIM THU KIH ZAK NA LAI
Ah kih pian na kum 1919
Khasim Khalkha khua ki bawl hi.
Lai bawl pa-------------------------- Sang Mang Pa
Dangka sangte---------------------Thuam Hang leh Dam Khup
Kum khat ah man hamu ah hi hi. Khalkha khua Pibuazi kha 1, 1926.
LEITUNG MI GAMTATNA THU
Tu kum kumpite in la tal li khamtungte aading ah lei sak hi. Tua la tal nih Tedim uk sungah ah om ding hi, nih in Phalan uk sungah ah om ding hi. Hausate in ah man kim khat ah pia ding hi, kumpite in kim khat ah pia ding hi.
Tu kum Kawl puan gan ngeina hilh pa hong patio kik hi. Masa ah hong kah ciangin khua khatah ni tawm bek ah tam hi. Tu kum ah sin nuamte khua-ah sawt pi ah tam hi. Khamtungte in hih ngeina ah siam leh ah pha ding hi.
Mangpipa in niang ciing ding leh nai bawl ding ah ngaihsun hi. Kacin mihingte in nai puan bawl siam uh hi. Khamtung mite in zong ah siam thei hi. Mi kim khatte in niang ah ciing nuam hi. Ahih hang in kumpite hong huh kei leh ciing ding ah haksa hi.
Tukum Lusei gamah an ah hau mah mah hi. Tua ahih ciangin Tapidaw tampite in zu duh a lam nuam ahih ciang in ah tawp hi. Ahih hangin ni kum ciangin kial hong tung ding ci in ah um mawk uh hi.
Khamtung ah nattun ah khang to seem seem mi khempeuh ah thei uh hi. Ahih hang in Khamtung bek hi lo lei tung khempeuh a nattun ah khang hi. Kum sim in nattun vei mihing 2,000,000 ah si hi. Zato mangte ah lung mang mah mah uh hi.
November kha ni 22 ni in Sang Mangpa in Khuasak khua panin sia Thuam Hang tui phum sia ah kawih hi. Septemba kha sivuaizi upate in Thuam Hang thu ah dong uh hi. Tui phum sia kawih lehang ah man hi, ah ci uh hi. Tua ahih ciang in Sizang te leh Sukte in tui phum sia ah nei zo hi. Ah nung ciang in Mangpa in Tapidaw 19 tui sung ah phum hi. Tui kih phum nuam 50 bang ah om lai hi.
Khamtung mihing te bek in zu tampi ah ne kei hi. Kalkata khuapihte in ni sagih simin zu bang beel 2250 bang ah dawn uh hi.
Suzi gam Piancit kumpipa in ah uk hi. Ahih hangin tua khuapihte in ah gam kih uk nuam uh hi. Tu kum ah kih do uh hi. Piancit gal kapte in ah zo zaw ding hi. Ahih hang in dangka tampi ah bei ding hi. Gam kih uk nuam te in Mang Kang Sang Mangte sang inn tampi ah siat gawp uh hi.
Galik leh Bulgeilia te ah kih do dek tak hi. Galik gal pawl khat in Bulgeila gam ah lut uh ahih ciangin Bulgeiliate heh uh a ah kap uh hi. Tua ahih ciangin Galik gal kap tampite in zong ah tum uh ah kih do uh hi. Ahih hang in Mang Kang upa dangte in ah kih lem sak kik uh hi.
Apilika gan sungah Piancit leh Sapeinte in ah zo zaw uh hi. Amau galte ah kih lem nuam hangin ah kih lem nai kei hi.
Mang Kang te gal ah kih do khit uh ciangin Piancitte leh Zaminite ah lau tawntung uh hi. Bang ding hiam ih ci leh: Piancit te in kah khua ah sim kik ding hi, ci in Zaminite ah ci uh hi. Piancitte in zong: Zaminite in kah gam ah sim kik ding hi, ah ci uh hi. Mihingte ah lau manun na tampi ah seem ngam kei hi. Ahih hangin Novemba kha England upate, Piancit upate, Zamini upate, Belgum upate leh Itali upate kih khawm uh a gal dohna thu ah kih vaihawm uh hi. Tua ahih ciang in Piancit upate leh Zamini upate ah kih ciam uh hi. Eite in cik mah hunin ki do nawn kei ding hi, ah kih ciam uh hi. Tua ahih ciang in mizawngte ah nuam mah mah uh hi.
Nidang lai in Matu lam sangah kumpi uk lo gam khat ah om hi. Tu ma kum thumah tua gam ah uk hi. Ahih hang in Zakhan mangpa ah ukte ah gi lo mahmah a khat vei vei kih do a kih that lum hi. Tua ahih ciangin kum simin mangte leh gal kapte in tua gamah pai in mi gi lo dan ah tat uh hi. Tu kumah zong ah pai kik hi. Novemba kha kumpipa ah nu ah si hi. Ah teek mah mah hi.
Pasia mihingte in ah kumpipa ah deih kei hi. Tua hih ciangin Novemba kha sungah kumpipa hawl khia a mihing dang ah kawih hi. Lusei gamah lai sin tum dang mah mah hi. Siate in kha sum tawm bek mu ahih ciang inah an duh tawntung hi. Ah naupangte in lai dotna ah zo zo kei leh ah sia pa kiangah an ahih hang in ngun ah hih hang, pia a ah zo kik hi. Sia pa in naupangte ah zo sak lo ah hi leh ah hawl khia uh hi.
LAI SIANGTHO TANG THU 17
Davuih
Davuih in Pilipi gal kap 6 awli ah ah that khit ciang in ah khua ciah loin kumpipa sawlu kiangah ah om top hi. Sawlu inn luah pa Zawnathan leh Davuih kih it a u-nau tawh kih bang ah piang hi. Khat vei vei sawlu tungah kha gi lo ah tun ciang in Davuih in ama kiangah la ah sa hi. Ahih hang in mihingte in Davuih min phat uh ahih ciang in Sawlu heh a khat vei vei Davuih ah that nuam hi. La ah sak lai takin ah teipi tawh ah sun nuam hang in Davuih ah tai hi. Davuih ah hang mah mah ahih ciang in gal kap mangpipa zong ah piang hi. Ah tawntung ah galte ah zo zaw thei hi. Sawlu tanu in Davuih ah ngai hi. Ahih hang in Davuih ah gen uh ciangin: Kei mi zawng kah hi hi. Kumpipa tanu tawh kih teeng ding kah kih lawm kei hi. Sum kah nei kei hi, ah cih ciang in Sawlu in: Sum kah deih kei hi. Pilipi galkap lu tang za khat nong piak leh sum tampi tang ding ah hi ding hi, ah ci hi. Bang hang in hih bang ah gen hiam ih ci leh Piliti mihingte in Davuih ah that ding, ci in ah lung ngai hi. Ahih hang in Davuih pai in lutang za khat hi lo zah nih hong paipih tua ciangin Sawlu tanu ah teenpih hi.
Davuih in Zawnathan kiangah: Nah pa in hong that ding hi, ah ci ciang in Zawnathan in Davuih aading ah pa kiangah hehpihna ah ngen hi. Ahih hangin Sawlu in Davuih a heh kih thei hi. Tua ahih ciangin khat vei Davuih mat nahding in pawlikte tampi ah inn ah um hi. Ah mu ciang in Davuih in khua dakna pan paikhia a ah tai hi. Ah zi in Davuih tang ding in sing pum leh keel mul ah lupna tungah ah kawih hi. Pawlikte in inn sungah ah tum uh ciangin ah zi in: Kah pasal a cina hi, ci in sing pum ah en sak hi. Amau ah ciah uh a: Davuih ah ci na hi, ci in kumpipa ah za sak uh hi. Kumpipa in: Ama lupna tungah hong pua in, ci in ah sawl kik hi. Amaute pai kik uh a sing pum leh keel mul ah mu uh a kumpipa kiangah ah ki kik uh hi. Kumpipa ah heh mah mah hi.
Khat vei Sawlu in pawi ah kham lai takin Davuih ah hawh kei hi. Kawi sung ah om hiam ci in ah dot ciang in, Pasian biak ding in ah khua ah ciah hi,’ ci in Zawnathan ah ci ciangin Sawlu heh mah mah a Zawnathan zong a tai hi. Tua a hih ciangin Kunpipa in Davuih ah that ding thei a Davuih a za sak hi. Tua ahih ciangin Davuih in Kumpipa khua om ngam lo in gamlapekah ah tai hi.
A tai laitak in Pasian biakna innah ah tung hi. Kumpipa tanu ah pasal a hih maninah phui sampipa in Davuih ah zahtak hi. ‘An ah om hiam,’ ah dot ciangin, Pasian biak na an lumsiangtho bek ah om hi, ah ci hi. Davuih in ‘Kumpipa hongsawl a hih ciangin an la ding in kah man kei hi. PaSian biakna khomun hong pia in’ ah ci hi. Tua a hih ciang in Khomun siangtho leh biak na innah kih kawih sa Gawliat nam sau ah la ah om laitak in Kumpipa gan cing uk pa in ah mu hi.
Tua nung ciangin Sawlu in ah na septe kiangah ‘No migilo nah hi uh hi. Davuih om na nah thei uh hang in kah mat ding in nah hong huh nuam lo uh hi,’ ah ci ciang in ah gan cing uk pa in: ‘Davuih in biak na innah kah mu hi. Phui sampipa in khomun leh Gawliat namsau a pia hi.’ a ci hi. Kumpipa in phui sampipa sam a: ‘Hih thu a man hiam,’ ah ci ciangin: Ah man hi, ah ci hi. Sawlu in thu dang khat dong lo in in amah leh ah in kuan a that sak hi.
Davuih a tai ciangin Piliti khua khatah tung hi. Ahihhang in a laumaninah mi hai bang ahi hi. Khat vei vei cil a luang khia sak hi. Piliti te in Davuih a muh uh ciangin a nuam mahmah hi. Ahih hangin mi hai suak a mu uh ciang in ah tai khia sak kik hi. ‘Mi hai kah deih kei hi’, ah ci uh hi. Davuih gampalak ah tai kik a kumpipa mu dah te, bawl siat a thuak te, thu nei a lelte khempeuh in ama kiangah pai uh a ama khut nuaiah ah om hi. Tua ahih ciangin galkap 600 bang ah nei hi.
Sawlu in Davuih a delh kik hi. Davuih leh a galkap te in lei hawm lianpi sungah ah bu uh hi. Davuih zong ding in Sawlu tua lei hawm lianpi sungah ah tung hi. Ah nung zui te in ‘Tu in Sawlu vah that in’, ci in Davuih a han suah hangin Davuih in ah that ngam kei hi. Sawlu puan kiu khat ah nam sau in ah tan hi. Sawlu a pai khiat khit ciangin Davuih in zong pia khia a: ‘Kah pa Sawlu aw, bang in dingin hong delh nah hi hiam. Nang ma tungah khialh na khat bek kah nei kei hi. Nang in ui ahih bangin nah delh hi,’ ah ci hi. Sawlu in Davuih aw a zak ciangin ah mai zum mahmah hi. Kah ta Davuih aw, kah khial zo hi. Hong ciah in, Nang ma tungah bangmah kah bawl kei ding hi, ah ci hi. Sawlu ah ciah hangin Davuih in gampalakah ah om lai hi.
Khat vei leu leu in Sawlu in galkap 3000 tawh Davuih ah delh kik uh hi. Davuih in mual tung pan en suk a zanah ah giak uh ciangin Sawlu lupna mun ah ciamteh hi. Khua mial ciangin Davuih leh ama galkap nih tawh pai suk a kua mah pawng lo in Sawlu kiangah ah tung hi. Ah gal kap te in: ‘Pasian in hong hehpih zo hi. Tu in na gal nah that in,’ ah ci uh hang in Davuih in: ‘Pasian in Sawlu ah dantat ding hi. Pasian ah kawih sa Kumpipa kah that ngam kei hi’, ah ci hi. Tua ciangin Sawlu tei pi leh a tui um la a ah tai kik hi. Mual tung pan in Sawlu galkap mangpa ah kih ko hi. ‘Nang galkap mang siam nah hi, nah kumpipa nah keem mah mah hi. Tu in Kumpipa teipi leh tui uum nah zong ding hi, nah mu thei hiam?’ ah ci hi. Sawlu tho a, ‘Kah ta Davuih na hi hiam,’ ci in a dot ciangin Davuih in ‘ka hi hi, bang ding in hong that nuam na hi hiam’, a ci hi. Kei uili tawh kih bang kah hi hi. Tu in nang kah that nawp leh kah that zo ding hi, ah cih ciangin Sawlu in, ‘Kei mi hai ka hihi. Nang kah that kei ding hi. Nah innah nah ciah kik ding hi’ ah ci hi.
Tua ciangin Davuih a in a ciah hi. Zudah gamah kah om leh Sawlu in hong that ding hi, ci in lung ngai a Piliti gam Akish khua ah tai hi. Piliti gam kah tai zo, ah theih ciangin hong delh nawn kei ding hi, ah ci hi. Akish Kumpipa in Davuih a mu ciangin nuam mah mah a khua khat a pia hi. Tua khua ah Davuih leh a gal kap te a teng uh hi. Khat vei vei amau te in a galte khua pai in a sim uh hang in khat vei bek Zudah gam ah pai kei uh hi.
Tua laitak in Itazhilate leh Pilitite ah ki do kik uh hi. Akish kumpipa in Davuih sam a, ‘Ko tawh pai in na do ding hi,’ ah cih ciangin Davuih in, ‘Kah pai ding hi’ a ci hi. A hih hang in Piliti kumpite leh galkap mang te in Davuih a mu ciangin ah lung mang uh a Akish kumpipa kiangah ‘Tua pa Itazila mi ah hi hi. Gal ih do lai takin amah mi pawlte ah hon ding hi’, ah ci uh hi. Akish kumpipa in Davuih sam a, ‘Kumpi dangte in nang hong delh kei hi. Nah ciah ding hi,’ ci in thu a pia hi. Tua a hih ciangin Davuih leh ah galkap 600 te ah ciah uh hi. Ah khua ah tun uh ciangin inn khat bek, numei, naupang khat bek ah mu kei hi. Bang hang hiam ih cih leh ah pai lai tak un ah galte uh hong tung a ah khua mei tawh a hal khit uh ciangin numei leh naupang teng a pai pih uh hi. Tua ciangin Davuih leh ah galkap te a heh mah mah uh a ah gal te a delh uh hi. Meeng meeng in a pai uh lai tak in mi kim khat a gim mahmah ah pai zo kei hi. Ahih hang in Davuih leh mi thahat te a delh lai uh hi. A galte giak na phualah tun uh ciangin zu kham in a lam uh hi. Davuih te in tha khat in delh uh a ni khat tawntung ah kih kap uh hi. Kalaoh tungah tuangin a tai tangval 200 sim lo in galte khempeuh a that khin uh hi. Tua tham lo in a zite atate leh sum tampi a ngah kik uh hi. Tua a hih ciangin lungdam in a khua ah ah ciah uh hi. Sum ah hawm khit ciangin a om lai hi. Tua ahih ciangin Davuih in hih sum Zudah gam ama lawm te kiangah ah khak hi.
Sawlu in Itazila galkap a khawm hi. Ahih hangin Piliti galkapte a mu ciangin lau mahmah a ah lel in a lung mang hi. Pasian kiangah thu a nget hangin Pasian in a ngai kei hi. Tua ciangin aisan numei khat sam a thu a pia hi. Aisan numei in ‘Bang deih na hiam’ ci in a dot ciangin Sawlu in ‘Samuela hongsam in,’ a ci hi. Tua ciangin Samuela a suak ciangin ‘Bang hang hongsam na hi hiam,’ ah ci hi. Sawlu in zong: ‘Kah kihta hi. Pasian kiang ah thu ka nget ciangin ka thu a ngai kei hi,’ a ci hi. Samuela in: ‘Pasian thu ngai lo na hi maninah Pasian in nang hong pai khia zo hi. Na gam Davuih a pia zo hi. Zing ciangin Piliti mihingte in no hong zo zaw ding hi. Zing nitak ciangin nang leh natate in kei tawh nah om khawm ding hi’, a ci hi. Hih thu a zak ciang in Sawlu a si dektak in a lau hi.
Zing sang ciangin tua pawl nih a ki do uh hi. Itazilate lau a ah tai uh hi. Sawlu in zong a tai a Pilitite in ah mat dektak ciangin Sawlu in; ‘Hong that in,’ ci in ah lum puate kiangah a ngen hangin a that ngam kei hi. Tua ciangin Sawlu in ah nam sau tungah puk a ah kih that hi. Zawnathan zong in ah kih that hi. Zing sang ciangin Pilitite in Zawnathan leh Sawlu luang mu uh a amau khua mualah kawih uh hi. Itazila mihingte in zanah ah la khit uh ciangin mei tawh ah hal uh hi.
NIPI NI THU SINNAH DING
Pibuazi kha ni 7 ni
Pawlu Ketazi khua ah ah Tung Hi
Sawltak Tangthu 21
Tua mite tawh kah kih khen khit uh ciangin teembaw tungah tuanga Kos khua tang takin kah tung uh a zing ciangin Zawda khuaah kah tung uh hi. Tua khua pan in Pataza khua kah tung uh hi.
Ponesia khua ah kah ding teembaw kah mu uh ciangin tuang in kah pai uh hi.
Kupazu gam kah kih mu uh ciangin ah tak lam nusia in Suzi gam galka in Tazaw khua ah lei tungah kah pai khia uh hi. Bang hang hiam cih leh tua khua ah sum ah kawih hi.
Tapidawte kah mu uh ciangin ni sagih kah tam uh hi. Pawlu in Zezusalem khua pai lo ding in a maute in kha siangtho tawh ah gen uh hi. Ni sagih a cin khit ciangin, dingin kah pai uh hi. Tapidawte kheempeuh in ah zite ah tate tawh khua nawl ah kote hong kha uh leh tuipi geiah khukdingin thu kah ngen khit uh ciangin khat leh khat kah kih hoh uh hi.
Kote in teembaw tungah kah tuang uh laitak in amaute ah ciah uh hi.
Tazaw khua pan in paina ah bei ciangin Talamei khua ah kah tung uh hi. Tua khua Tapidaw te kah ho pih leh ni khat kah om uh hi.
Ah zing ciangin pai kik in Ketazi khua ah kah tun uh ciangin sagih te khat Piliti innah tungin kah om uh hi.
Tua pa in thu hilh thei tanu li ah nei hi.
Tua inah sawtpi kah om laitak in Agabu min nei thu hilh pa khat in Zudah gam pan in hong pai suk hi.
Tua pa in kote kiangah hong tunga Pawlu kawng gak la in ah khe ah khut ah hen khit ciangin: hih kawng gak nei pa in Zezusalem khua ah om Zudah mihingte in henin Zentailte khua ah om Zudah mihingte in hen in Zentailte khut tungah ah pia ding uh hi, ci in Kha siangtho in ah ci hi.
Tua thu kah zak uh ciangin kote leh tua khua ah om mihingte in Zezusalem khua pai kei in, ci in Pawlu kah thum uh hi.
Pawlu in zong bang ding in kah lung sim kih nat nah ding hih uh hiam. Topa zeisu min hangin Zezusalem khua ah kih hen tham loin sih na nangawn thuak dingin kah om khol hi ah ci hi.
Ah zol na hong mang lo ciangin kote in ‘Topa deih na bangin hi ta hen, ci in zol lo in kah om uh hi.
Tua nite khit ciangin kah sum te la in Zezusalem khuaah kah pai to uh hi.
Khiat na thu
1.A maute in Eipet khua pan ah din khit uh ciangin Zezusalem khua ah pai uh hi. Mihing leh sum ngahnah ding, kawih nah ding teembaw in khua tampi ah bang hi. Zawda khua: Zeisu ah pian ma inah tua khua ah pi 150 ah sau mi lim khat ah bawl uh hi. Tua milim khe kihkalah teembaw in Zawda khua ah tung hi. khat vei zin ling in ah siat sak hi.
4.Tazaw khua ah lian mah mah ahih ciangin sum tampi kawihnah ding ah hi hi. Ni sagih sungah Pawlu in Tapidawte innah tung hi.
8. Ketazi khua: Zudah khua Menzi pa om na khua ah hi hi. Ah nung ciangin Pawlu in tua khua ah kum nih thong sungah kih kia hi. Philipu ah cil lai tak in sawltakte in meigong leh mihing zawngte an ah hawm man lo ahih ciangin an hawm na upa sagih a kawih hi. Tatepan leh Philipu te in tua upa ah lian peen hi. Tetapan ah si zo hi. Philipu in thu hilh siam ahih manin ah thu hilh sia a suak hi. Amah in dangka uk pa khat, khat vei Tapidaw a suak sak hi. Ama tanu zong thu hilh ah siam hi.
10. Agabu: Tua pa in tu ma in Antiok khua tung a: ‘zudah gam kheempeuh ah kial hong tung ding hi, ah gen khawl ahih ciang in mihing te in ama thu ah um tak tak hi.
15. Ketazi khua pan in lei lam ah ding uh hi. Zan khat lampi ah ah giak khit uh ciangin Zezusalem khua ah tung uh hi. Pasian in: ‘Zezusalem khua pai in, ci in ah sawl, ci in Pawlu a up maninah ah lawmte in ah nial uh hangin ah zo zo kei uh hi. Pasian thu leh ih bete thu kih khat lo leh Pasian thu uh zui ding hi.
Pibuazi kha in 14 ni
Zudah mihingte in Pawlu ah man uh hi.
Sawtak Tang thu 21
23. Tua ahih ciangin kah ci uh bangin nah hih tan. Thu kih ciamna ah nei mihing li kah nei tan. Thu kih ciamna ah nei mihing li kah nei uh hi. 24. Tua mite la in la amaute tawh nah kih siangtho in la amaute in ah sam met dingin amau aading man nah lio ding hi. Tua bangin nah hih le mi khempeuh in nangmah thu ah za ah hi takpi ah hi lopi in thu kham tangin khial loin nah om ah thei ding uh hi. 25. Thu um Zentailte ah hi leh milim biakna tawh si tawh, ngawng meek tawh, numei kilana tawh ah tangnah ding in thu khen in kah gelh zo uh hi, ci in amaute in ah gen uh hi. 26. Tua ciang in Pawlu in tua mite la in ah zing sang ciangin amaute tawh kih siangtho sak khit uh ciangin biakna innpi sungah pai in ah vekpi aading biakna ah pia khin dongin kih siangthona ni ah cin sak hi.
27. Tua ni sagih ah cin dek tak ciangin Asia gam Zadah mihingte in biakna innah Pawlu ah mu uh ciangin mi honpite hansuah in. 28. Itazila mihingte aw, hong huh un hih pa in ei pawlte leh thu khamna leh hih inn, mun khempeuh mihing vekpi kiangah ah kosia hi. Tua tham loin Galik mihingte biakna inn sungah lut sakin hih mun siangtho ah nin sak hi, ci in ah man uh hi. 29. Bang hang in hih bang in ah hih uh hiam ih ci leh ni dangah Pawlu tawh Eipet mi khat Taawpinu, khua sungah ah mu zo uh hi. Pawlu in tua mipa biakna inn sungah ah guangin ah um uh hi. 30. Khua zang in kih gam lum a mi tampi tai in kih khawm uh a Pawlu ah mat khit uh ciang in biakna inn sungah pai khia khit uh ciangin ah kong ah kih khak sak hi. 31. Amaute in Pawlu ah that nuam laitak un Zezusalen khua zang gam lumin ah om gal gap Mangpa kiangah kam ah tun ciangin 32. Gal kap leh bu pate samin tua mite kiangah ah tak suk uh hi. Tua mite in gal kap mangpa leh galkapte ah mu uh ciang in Pawlu satin ah tawp uh hi. 33. Tua ciangin gal kap Mangpa in va nai a, Pawlu ah mat khit ciangin sik khau tawh kih hen ding in thu ah pia khit ciangin: Hih mi kua ahi hiam. Bang ahih hiam ci in ah dong hi. 34. Mi honpi lakah mi kim khat in kam khat ah ko uh hi, kim khat in kam dang ah ko uh hi. Mangpa in gam lumna hangah tel takpi thei zo lo ahih ciang in Pawlu gal kap innah paipih dingin thu ah pia hi. 35. Khe lei ah ah tun ciangin mihingte ah nah mah mah uh ahih ciangin gal kapte in Pawlu ah pua uh hi. 38. Bang hang hiam ih ci leh mi honpite in nung zui uh a: Amah lakhia un, ah kihko uh hi.
Khiatna Thu
Pawlu Zezusalen khua ah tun ciangin ama khut tungah Pasian bawlna thu khempeuh Tapidaw te kiangah ah gen ciangin ah lung dam mah mah uh hi. Ahih hangin amah in Zudah mite ah pute ah pate ngeina siat sak dingin ah hansuah hi. ci in mi kim khat in a um hi. Tapidaw lak ah Zudah mi tampi ah om hi. Tua mite in Pawlu Zudah mi taktak ah hi thei dingin upate in Pawlu hih hihna ah hansuah uh hi.
23,24 Zudah mi khat in Pasian tawh kih ciam ciang in ah kih ciamna hun ah cin khit ciang in sam met kik a, Pasian biakna innah tum a, tuuno, tuu tal leh keel tal ah go hi. Mi zawng te ah hi leh mi dangte in tua sa ah hehpih a, min phatna ah ngah uh hi. Pawlu in tua mi zawngte li ading sa ah pia hi.
27. Asia gam, Eipet khua Asia gam sungah ah om hi. Eipitte in pawlu ah thei ding hi. Zentail in biakna inn sungah tum leh Zudahte in thahkhat in ah that ding uh hi. Biakna inn ah siat sak hi, ah um mawk uh hi.
29. Tawpinu Galik mi ah hi hi. Ahih hang in biakna inn sungah ah tum kei hi.
31. Gal kap mangpa Zawma mi hi, Pawlik mangpa tawh kih bang hi.
36. Tu ma in tua Zudah mihingte in Pawlu ah Topa Zeisu thu ngai nuam lo ahih ciangin ah that lum hi. Tu in Zeisu nung zui ah pha peen zong that ni, ah ci uh hi. Pawlu in amau pute pate ngeina ah siat sak ci in ah up man inah ah si sak nuam uh hi. Ei Tapidawte in ih pute ih pate ngeina ih zui lo manun Lawkite ah nuam kei uh hi.
Pibuaizi kha ni 21 ni
Pawlu Thong Sungah kih khum Hi
Sawltak Tangthu 21,22
37. Pawlu in in gal kap inn sungah ah tum lai tak in thu khat kah gen thei ding hiam ci in gal kap mangpa kiangah ah gen ciang in galkap mangpa in: Nang in Galik kam siam nah hi hiam 38. Nang in ni dang lai inah suam ding ah hansuah in mi tul li gam palakah pai pih Izip mi hi lo nah hi hiam, ci in ah dong hi. 39. Pawlu in zong: Khua neu mi hi lo, Kiliki gam Tasu khua, Zudah mi kah hi hi. Hih mite kiangah kei thu gen dingin thu hong pia in, kah thum hi, ah ci hi.
40. Gal kap Mangpa in thu ah piak ciangin Pawlu in khe lei tungah ding in ah khut in mihingte ah zo khit ciang in amaute ah dai uh ciangin Hebia kam in thu ah gen hi.
22. Hih thu dong in amaute ah ngai uh hi. Tua ciang in: Hih bang mipa leitung ah paikhia pih un. Amah hing ding an kih lawm kei hi, ah ci in ah aw kai in ah ko uh hi. 23. Amaute kih ko uh a amau puan sutin lei vui huih lak ah ah vawk uh ciangin gal kap Mangpa in 24. Bang ding in kih ko ah hi uh hiam ci in thei ding in Pawlu satnatawh kih dong in gal kap inn sungah tungpih dingin thu ah pia hi. 25. Amaute in Pawlu savun khau tawh ah hen ciangun Pawlu in ah kiangah ah ding bu pa kiangah: Thu khen thuak loin Zawmah mi sat ding ah kih tuak hiam ci in ah dong hi. 26. Gal kap bu pa in tua thu ah zak ciang in gal kap Mangpa kiangah pai a: Bang ci nah hih dinghiam hih pa in Zawma mi ah hi hi, ah ci hi. 27.Gal kap Mangpa in Pawlu kiangah pai a: Nang Zawma mi nah hi takpi hiam ah cih ciang in: kah hi hi, ah ci hi. 28. Gal kap Mangpa in: Dangka tampi pia in hih pianna panin Zawma mi kah hi hi, ah ci hi. 29 Tua ciangin ah dot sak ding mite in Pawlu kianga pan ah pai khia pah uh hi. 30. Amah Zawma mi hi galkap Mangpa in ah theih ciangin ah lau mah mah hi. Bang hang hiam ih ci leh khau tawh ah hen hi.
Khiatna Thu
37. Mi siamte bek Galik kam siam ahih maninah galkap mangpa ah lung mang hi.
38. Ni dang lai inah Izip mi khat hong piang a nung zuite 30,000 ah ngah khit ciangin Zezusalen khua sim ning ci in ah lung ngai hi. Anung zui te tawh Zezusalen khua ah tung dek tak cianginah Menzi pa leh gal kapte in paikhia a Izip pa ah tai hi.
40. Hebia kam: Itazila, Hebia leh Zudah min thum ah om hang in mi pawl khat bek ah hi hi. Zeisu ah pian ma in Itazila ah kih ci hi. Zeisu ah pian khit ciang in Zudah mi kih ci hi. Mi pawl dangte in Hebia mi min ah phuak uh hi.
Pawlu in ama Tapidaw suahna thu ah za sak hi. Ah cil in ah ngai uh hi. Ahih hang in in Pawlu in: Pasian in kei Zentailte om na ah hongsawl hi, ah cih ciang in heh uh a ah thu ngai nawn lo uh hi. Zudah mihingte in Zentailte ah zawng sa mah mah ahih ciang in amau kiangah Pasian thu hilh pa thu zong ah deih kei uh hi.
24. Pawlu khan lai takin Mangte in mawh nei pa ah mawh na thei lo ah hi leh nakp in ah sat hi. Ah sat leh mawh nei pa ah gim ahih ciangin thu tel takpi ah gen in ah um mawk hi.
25. Zawma mi: Khat vei Philipi khua ah Mangte in Pawlu ah sai khit uh ciang in Zawma mi hi, ah thei ciangin ah lau mah mah hi. Kuamah in thu khen loin Zawma mi pawl ah sat thei kei hi. 28. Mi pawl dangte in sum pia in Zawma mi ah suak thei hi. Ahih hang in Pawl ah pa Zawma mi ahih maninah Pawlu zong Zawma mi ah hi hi.
Khat vei vei Tapidawte in Kumpite tungah ah dah thei hi. Ahih hangin kumpite om lo ah hi leh cite in Pasian ih biak thei kei hi. Kumpite in Pawlu ah keem kei leh Zudahte in ah that zo ding hi. Tua ahih ciang in Pawlu in khat vei: Kumpite leh gam ukte ading Pasian kiangah nah nget sak ding uh hi, ci in ah gelh hi.
Pibuaizi kha ni 28 ni `
Pawlu in Zudah Mi Upate kiangah Thu Kih Khen HI
Sawltak Tangthu 22, 23
30. Ah zing ciang in bang hangin Zudah mite in Pawlu ah mawh sak uh hiam ci in gal kap mangpa in ah tel takpi ah thei nuamin Pawlu kha a siampi ukte leh upate ah kih khawm sak khit ciangin amaute kiangah paipih suk a, amaute maiah ah kawih hi.
1. Pawlu in upate tel takpi en a: Ute naute aw tu ni dongin Pasian maiah lung sim in kei tungah mawh sakna thu om loin kah om hi, ah cih ciangin 2 siampi mangpa Ananih in: Ama muk bet sak in, ci in ah kiangah ah ding te thu ah pia hi. 3. Tua ciangin Pawlu in: Ah kang tawh kih zut suang ciang aw, Pasian in nang hong sat ding hi. Nang in thu khamna tawh kei tung ah thu khen ding in nah to na pi in thu kham tawh kih tuak lo in hong satnah ding in thu hong pia nah hi hiam ah ci hi. 4. Ah kiang ah ah ding mite in zong: Nang in Pasian siampi mangpa gen sia nah hi hiam, ah ci uh ciang in 5. Pawlu in: Ute, naute aw amah in Pasian siampi Mangpa ah hi lam kah thei kei hi. Nah mi pawlte ah uk mangpa nah ko sia kei ding hi, ci in lai Siangtho sungah ah at zo hi, ah ci hi. 6. Upa kim khat Pazisete hi kim khat Zadukete hi uh Pawlu in ah thei ciang in Ute naute aw Pazise kah hi hi. Pazise mi ta zong kah hi hi. Mi si sate hong tho kik ding hi, ci in lametna hangin thu dotna kah thuak hi ah ci hi. 7. Pawlu in tua thu ah gen ciangin Pazisete leh Zadukete khat leh khat ki seelin kih tawng uh ahih ciangin kih khawmte ah kih khen uh hi. 8. Bang hang hiam ih cih leh Zadukete in: Hing kikna ahih hangin, vantung mi leh kha ahih hangin ah om kei hi, ah ci uh hi, Pazisete ah hi uh leh ah nih gel ah um uh hi. 9. Tua ciang in gam lum ah piang hi, Pazisete ah lai theite kim khat ding in nakpi in nial uh a: Hih pa tungah bangmah mawhna kah mu kei uh hi Kha ahih hang in, vantung mi ahih hangin amah ah gen leh bang pha mawh ah hi hiam, ah ci uh hi. 10. Kih seelna ah tam ciangin amaute in Pawlu ah kai gawp ding gal kap mangpa in ah lung himawh ciangin gal kapte in tumi Pawlu amaute sung panin zawhthawh in la a gal kap innah paipih ding uh ah sawl hi.
Khiatna Thu
30. Tupa upate in Zeisu tawh, Pitazu leh Zawhang tawh, Tatepan tawh thu ah khen zo hi. Pawlu in Tapidaw ah suah ma in nah tua upa khat ah hi hi. Amau in Pasian biakna ngeina tungah ah khialte bek ah mawhsak thei hi, Mawh nei dangte kumpite in ah khen sak uh hi.
2. Ananih: Zeisu ah si lai takin tua Ananih in siampi mangpa ah hi hi. Amah in Zeisu ah that khit ciangin Zeisu nung zui ah lian peen zong ah that nuam hi.
3. Za tawh kih zut suang ciang: Zeisu in khat vei tua upate ah mawh sak ciangin: Note in za tawh kih zut mi si han nah hi uh hi, ah ci hi. Ah khiatna in, amau gamtatna ah pha hi. Ahih hangin ah sin sungah khialna vive ah om thei hi.
5. Pawlu in Tapidaw ah hi hi. Ahih hangin ah pute ah pate ngeina ah zui lai hi.
6,7,8, Pazisete leh Zadukete in thu hilh pawl nih ahih hangin ah thu kim kei hi. Pawlu in hih thu ah thei maninah upate ah kih hau sak hi. Amau thu kih kim lo ahih leh Pawlu dan ah tat thei kei hi. Tua ahih ciangin: Kei Pazise kah hi hi, ah ci ciangin thakhat mah in ama mi Pawlte in Pawlu ah huh nuam uh hi.
9. Pazisete in Pawlu khialna ah ngaihsun kei hi. Amau mi pawl khat ah khen sak nuam kei hi. Khamtung mi kim khat in tua mah bang in ah lungngai hi, amau te ah khial uh hangin ah huh nuam uh hi.
10. Gal kap te om lo ah hi leh, Pawlu ah that zo ding uh hi. Amauin thu khen loin Tatepan ah that uh hi. Zeisu thu khen lo in ah that uh hi. Ahih hangin galkapte ah om ahih ciangin Pawlu tungah tua mah bang in ah khial thei kei hi.
Pawlu in: Mawh sakna om lo in in kah om hi, ah ci hi. Eite in hih bangin ih ci zo hiam, ih ci thei leh ah pha hi.
Laibu Saal /Zomi eLibrary
www.zomielibrary.com
