TEDIM THU KIH ZAK NA LAI
ZANUAIZI KHA 1926
The Tiddim Chin Hills News
Bu 7 Nambat 1 |
A SUNG A OM THU TE
Tedim thu kih zak 1it hu
Mun tuam kih zakna thu khamtung sivuaizi in buuk phil khua, Mat kha ni 5,6,7 ni ah tung ding hi
Shivuai upa vaihawmte vaihawmna thu
Nipi 1it hu hilhnah ding
TEDIM THU KIH ZAK NA LAI
Ah kih pianna kum 1919
Khalkha khua kha sim in kih bawl hi.
Lai bawl pa ------------------------------Sang Mang Pa
Dang Ka sang te------------------------Dam Khup leh Thuam Hang
Kum khat ah man hamu ah hi hi. Khalkha khua Zanuazi kha 1, 1926.
MUN TUAM KIH ZAKNA THU KHAMTUNG SIVUAIZI IN BUUKPHIL KHUA, MAT KHA NI 5,6,7 NI AH TUNG DING HI.
Buukphil khua Mat kha ni 4 ni sivuazi upa vaihawm te in ah vaihawm ding uh hi. Sente gam ah tukum guah tampi ah zu hi. Gun khaknah ding lei kul kih sia a, lo leh khua tampi tui nuaiah ah om hi. Mihing 25,000 bang ah inn kih sia khin hi.
Zapan gam zong ah guah tampi zu a, khuapi sung ah lampi in gun tawh kih bang piang a, inn tampi ah puuk hi. Vuntanu kih ci kumpinu khut nuai om nuam lote in khamtung ah hong pai uh a, khamtung mihing te kiangah thu ah hilh hi. Phalam uk sung khua 10 tung a, tua khuapihte in amau thu ah zui uh hi. Kah thu zui lo leuh teh kawl taang kah khua ah nah lei zo kei ding hi. Ahih hang in nah ngai leuteh kumpinu phiangsiah nah ut bang in nah pia ding hi. Lam sial ding ah om nawn lo ding hi. Mangte in aak ah ngen leh peek khat nah ngen ding hi, ah ci uh hi. Mangte in tua thu zuau hilhte ah man zo kei hi. Ahih hang in tua khua 10 hausate thong sung ah kha 6 ah khia uh hi. Tu-in tua khuapihte in kumpinu thu bek ah ngai nawn ding uh hi.
Mang Kangte in ah neisa bang in phiangsiah ah lio uh hi. Sum haute in phiangsiah tam ah lio hi, Amelika khua sum hau peen pa in tu kum dangka 18,000,000 phiangsiah in ah pia hi. Tu in van leeng lam 112 ah om hi. Tua ah ci nawpna in ni simin mei leng ah pai ngitnget bang in lam 112 pan in van leng zong ah pai uh hi. Tua van lengte in lai ahih hangin sum ahih hang in mihing ahih hang in ah pua hi. Amelika khua ah van leng nih bek ah om hi. Ah dang teng Izuap gamah ah om hi.
Kawlgam tembaw naseem te in na ah seem nai kei hi. Ah laih te ah cial zo hang in ah kih cing nai kei hi. Monzua khua leh Gun khawm khua kih kal ah pai tembaw khat bek ah om hi. Tua ahih ciang in lai ngah ding ah haksa hi.
Mang Kangte ah kih do khit uh ciang in, India gamah khut siamte ading ah haksa hi. Nasepna tawm bek ah om hi. Bumbai khua ah puan ganna inn tampi om a nasemte tul tampi in puan gan in ah nungta uh hi. Ahih hang in puan man ah ham maninah mi tampi in ah lei kei hi. Tua ahih ciang in tote in: Nah kha sum kah khiam ding hi, ah nasepte kiangah gen hi. ‘Kha sum ah kuam leh kah tawp ding uh hi’ ah ci uh hi. Tua ahih ciang in Bumbai khua sungah puan gan inn khempeuh khak a kuamah in na ah seem kei hi.
Masa ah kawl upa vaihawmte in thu khat ah piang sak uh hi. Gam dang panin kawl khua ah hong lal khempeuhte in peek 5 ah lio ding hi, ah ciamteh uh hi. India kuli te ading hih thu ah haksa hi. Tua te in kawl gamah sum ta law zong ding in hong pai in dangka san peek khat ah nei kei hi. Tua ahih ciang in Indiate ah heh uh hi. Tu kum tua vaihawm te in thu khat ah pia leu leu uh hi. Mi pawl dangte in kawl gam sung ah ah khial leh thong sung kah khia kei kei ding hi. Amau pianna gamah kah ciah sak ding hi, ah ci uh hi. Indiate in: Nong huat manun hih thu na piang sak uh hi, ci in ah heh uh hi.
SIVUAIZI KIH VAIHAWMNA THU
Buukphil khua Mat khat ni 4,5,6,7 ni, kum 1925
Ni 4 ni
Nitak nai 7: La sakna leh thu ngetna ding kih khawpna Thuam Hang, Dam Shuan, Sang Ling leh Nawl Kaling nitak nai 3.
Ni 5 ni
Zing sang nai 7: Thu nget nah ding kih khawpna, Bawka
Sun nai 11: Lai siangtho sim leh thu nget pa sivuaizi vaihawmna
Uk pa, lai gelh pa, sum kem pa kih tel ding hi.
Uk pa in vaihawm nam tuam ah kawih ding hi.
Sivuaizi ukpa vaihawm thum ah tel ding uh hi.
Dangka kem pa kih zaknah ding lai ah sim ding hi.
Sivuaizi upa vaihawmte in kih zakna ding lai ah sim ding uh hi.
Thu hilh pa Sang Phen
Nitak ciang nai 3: Thu huilh pa, Za Huat
Vai hawmna
Pawlpite in kih zaknah ding lai ah sim ding uh hi.
Thu hilh pa Za Huat Meitei gamah Pasian thu bang ci in ah khang hiam?
Ni tak nai 7: Lai siangtho sim leh thu ngenpa
Mi Khempeuhte in ah nawp bang in ah hih ding uh hi.
Ni 6 ni
Zing sang nai 7: Thu ngetna ah ding kih kawpna Za Ngai sum Kawpna, Lai Siangtho sim leh Thu Ngen pa.
Vaihawm na: Mi ah ut bang in vai hawm nah ding ah gen thei ding hi. Vaihawm te in ah vai hawmna thu ah gen ding uh hi.
Thu hilh pa: Sia Aung Duai, kazian gamah Pasian thu bang ci in ah khang hiam.
Lai Siangtho sim leh thu ngen pa
Thu hilh pa: Lusei siapa. Lusei gam ah Pasian thu bang ci ah khang hiam.
Vaihawmna: Vaihawmte in kih zakna ah sim ding uh hi. Mihingte ah ut bang in vaihawm nah ding ah gen thei ding hi.
Lai siangtho sim leh thu Ngen pa
Pawlpi tuam tuam in la ah sa ding uh hi.
Ni 7 ni
Thu nget na ki khopna Pu Ci
Thu hilhte: Lian Zam leh Lian Lut Lo
Tui kiih phum nuamte tui kih phum ding hi.
Thu hilh pa: Steit Mang Pa
Leng Gah tui leh kho mun neek ding uh hi.
Tawpna thu hilh te Lal Bawng leh Van Tual khamtung ah Pasian thu bang ci ah khang thei ding hi. Dam Suan
Mang Kam
Sang Mangpa- vaihawm te.
SIVUAI VAIHAWMTE VAIHAWMNA THU
Sivuaizi Upa vaihawmte in Phalam khua Autoba kha ni 7 ni in ah kih khawm uh hi. Ah suakte in: Sia Aung Duai, Za Khup, Thang Cin, Nai Liang leh Sang Mang Pa, Tedim pawlpi panin kuamah in hong pai lo ahih ciang in Cin Lang kih laih sak hi.
Sumpi keempa in sumpi thu ah gen masa hi. Ah genna ah: Tu kum Tapidaw Pawlpite in sumpi 1,227-7-6 ah pia uh hi. Ahih hang in Nanzali pawlpi in bangmah pia lo hi. Tu in dangka 837-3-6 ah om lai hi. Sivuai ah tung masa siate khasum 1,300 ah hi ding hi. Amelika khua panin dangka 720 kih ngah ding hi. Tua ahih ciang in dangka 257 bang ah om laiding hi. Ahih hang in Kham Lamah tu kum dangka bangmah kah khak nai kei hi, ah ci hi.
Sang Mang pa in kam dang khat ah za sak hi. Ah genna ah: Ni kum sivuai ah HualNgo Tapidaw leh Khuasak Tapidaw in sia Aung Duai kiangah hong pai in: ‘Kah sia pa uh tui phum theih nah ding thu pia le teh kah awi uh hi,’ ah ci uh hi. Tua ahih ciang in Zulai kha Khalkha khua ah sia te in Thuam Hang, Lal Bawng, leh Thang Cin tuiphum sia kawih ding ah kih lawm hiam kih lawm lo hiam ah vaihawm uh hi. Thu dot sak khit ciang in pha ah sa uh hi. Ahih hang in amau khua panin ah Tapidaw te kiangah kih kawih leng ah hawih ah sa uh hi, ah ci hi.
Eite in kawl sivuaizi ah dangka 200 khak le uh ah pha hi. Kawl sivuaizi in sum 3,000 bang aba hi. Dangka ih pia kei leh Pasian thu hilh ah kiam ding hi.
Sum ah om leh Insein khua lai sin siate ah kha sum ah khang ding hi, ih ciamteh zo hi. Tu in sum a om ding hiam ah om lo ding hiam kih thei nai kei hi. Ah om leh dangka keem pa in ah pia ding hi.
Kuli thaman zong ah om kei ding hi. Tua ahih ciang in tu kum ih pia zo kei ding hi.
Za khup Upate lai gelh pa
NIPI NI THU HILHNAH DING
Zanuaizi Kha ni 3
Pawlu Kawlatu Khua ah ah Pai hi
Sawltak Tangthu 18
1Tua thu khit ciang in Pawlu in Aaten khua pan pai khia a, Kawlantu khua ah tung hi. Bang hang hiam ih ci leh Klawdi kumpipa in Zudah mihingte Zawma khua pan pai khiatnah ding thu ah pia hi. Pawlu in tua mihingte ah muh ciang in amaute kiangah ah tung a, 3. Amau nasemte kih bang ahih ciang in amaute tawh ah om kawm leh ah na ah seem uh hi. Bang hang hiam ih ci leh amaute in puan buk kuite ah hi uh hi. 4. Pawlu in nipi ni simin kih kawpna sang inn thu hilh in Zudah mi leh Galik mite ah zol hi.
5 Tila leh Timawte in Makedawni gam panin hong tung uh ciang in Pawlu in na khat bek seem in Zeisu in Khazih hi ci in Zudah mihingte kiangah ah hilh hi. 6. Judah mihing te in thu seel leh ah tai gawp gawp ah om uh ciang in Pawlu in ama puan sing a: Note si in note in tung ah om ta hen. Keima tungah mawhna om lo hi. Tu a kihpan Zentailte kiang ah kah pai ding hi ah ci khit ciang in 7 tua san tak pan in ah pai khia a Topa Pasian ah bia Zute min nei mipa innah ah tung hi. Tua inn kih kawpna sang inn tawh kih peh ah om hi. 8 Sang inn uk pa Kispia in zong ama inn kongpihte tawh Topa thu ah um hi. Kawlantu mihing tampite in zong um a, tui kih phum uh hi. 9 Zan ciang in Topa in Pawlu kiangah mang sungah thu hilh inah: Nang lau kei in, Dam tak in thum loin thu nah hilh in. 10. Bang hang hiam na cih leh keimah in nang tawh kah om kawm hi. Nang hong bawl siatnah ding khuamah in ah kih gual zo sak thei kei ding hi. Bang hang hiam nah ci leh hih khua sungah mihing tampi kah nei hi, ah ci hi. 11 Pawlu in tua khua pih te kiang ah Pasian thu hilh in kum khat leh kha guk ah om hi.
12 Galio in Akhaia Menzipa ah suak ciang in Zudah mihing te in lung sim uh kih bang in Pawlu man a, thu khenna tokhom maiah ah paipih khit uh ciang in: 13 Hih mipa in kumpipa thu ngai lo in Pasian bianah ding mihingte ah zol hi ah ci uh hi. 14 Pawlu in thu genin ah kam ka ning ah ci ciang in Galio in: Zudah mihingte aw khialna thu ahih hang in gi lona thu ahih hang ina ah he leh, note thu kah thuah ding hi. 15 Ahih hang in thu mawk ahih hang in min ahih hang in nomau thu kham ahih hang in ah hi leh note nah hih un. Hih thu te kah khen nuam kei hi, ci in thu khenna pan ah bawl khia hi. 17 Tua ciangin amau te in kih khawpna sang inn ukpa Satani man uh a, thu khennna tokhom maiah ah sat uh hi. Galio in tua thu ah pha maw lo sa hi.
Khiatna thu
Kawlantu khua: Aaten khua tawh kih nai a tuipi gei om ahih ciang in khua lian hi. Khuapihte in sum hau mah mah a, mi gilote ah hi hi.
Klawdi in Zawma kumpipa hi. Zawmate in Zudah mi mudah, a khat vei vei amau khua pan ah hawl khia uh hi. Itali gam: Zawma khua om na gam hi.
Mi hau hi ta leh mi zawng hi ta leh Zudah mi khem peuh te in khut ah siam uh hi. Pawlu ah pa sum hau ahih hang in, ah ta in ah khut taw na an seem thei hi.
Pawlu in Aaten khua ah om lai takin Timawte leh Tilate Tetalawni Tapidaw lung kip sak nah dingin ah sawl hi. Tu in ah tung kik hi.
Pawlu in gukvei mang ah man hi. Hih mang matna in, ama lung kipnah ding ah hi hi.
Menzipa kih laih ciang in Zudahte in Pawlu ah bawl siat uh hi. Tua Menzipa in ngeina thei lo ci in ah um mawk uh hi.
Ahih hang in Galio mi pil ahih maninah Zudah mihingte thu ah ngai nuam kei hi. Pawlu khial lo ah thei hi.
Zudah mihingte ah lel uh ciang in Lawkite in ah ngeina bang in ah bawl siat uh hi.
Zanuaizi kha ni 10 ni
Pawlu Thuma Khual zinna
Sawltak Thangthu 18, 19
22. Pawlu in Antiok khua ah tung hi. 23. Tua khua ah sawtpi ah om khit ciang in pai kik a Galati gam leh Phugi gam khempeuh pai a Tapidaw ah vekpi in ah kip sak hi.
1. Apawlu in Kawlantu khua ah ah om lai tak in Pawlu in sak lam gamte ah pai khit ciang in Eipet khua ah tung hi. Tapidawte ah mu khit ciang in no nah up khit uh ciang in Kha Siangtho ngah nah hi uh ci in ah dot leh Kha Siangtho kih pia zo hi, ko kah thei kei uh hi ah ci uh hi. Pawlu in: Tua bang ah hi leh note in kua min tawh tui sung nah kih phum uh hiam ci in ah dong leh amaute in: Zawhang tui phumna bek kah ngah zo uh hi, ah ci uh hi Pawlu in Zawhang in: Ka nung ah hong pai pa nah um ding uh hi ci in mite kiangah ah gen leh ah khih sikna tui phumna ah pia hi. Tua hong pai pa in Zeisu ah hi hi ci in Pawlu in ah gen hi. Amaute in thu ah zak uh ciang in Topa Zeisu ah min tawh tui kih phumna ah ngah ah hi. Pawlu in amaute tung ah ah khut ah nga leh Kha Siangtho in hong kum sukin tua mite na kam tuam in ah gen uh a thu ah hilh uh hi.
Tua mite in sawm leh nih bang ah pha hi. Pawlu in kih khawpna sang innah tum leh lau loin kha thum tawntung Pasian gam thu agen hi. Mi kim khatte in lung sim khauh uh leh thu ngai loin mihingte kiangah thu ah gen siat uh ciang in Pawlu in amaute kiang pan pai khia a Tapidaw te ah tuam om sak khit ciang in Tilani lai sim sang innah ni simin thu ah hilh hi.
Khiatna Thu
Pawlu in Kawlantu khua panin Antiok khua ah ciah hi. Bang tan vei ah om hiam kih thei kei hi. Ah nung ciang in amah Tapidaw ah suaksate omna khua ah pai kik hi. Tu in ah paina in khual zinna thumana ih ci hi. Talati gam leh Pugi gam sung ah Pawlu leh Banabate in khual zinna mana peen panin ah pai uh hi.
Apawlu: Tua pa in Pasian thu ah siam mah mah hi. Pawlu in Eipet khua ah tung ma in Apawlu om a, Tapidaw ah ngah hi. Tu in Kawlantu khua ah ah pai zo hi. Amah in Hebia Lai Siangtho ah hilh hi.
Eipet Khua: Tua khua ah lian mah mah khua hi a Menzipa om na ah hi hi. Pawlu khang lai tak in Eipet khua in gunpi geiah om a tembaw liante ah tung thei hi. Pawlu in ah musa Tapidawte in Apawlu khut nuai ah tui kih phum uh hi.
2 Kha Siangtho: Mihing khat peuh mah in Zeisu thu ah um leh kha Siangtho ah ngah hi. Apawlu in tui phum pa Zawhang thu bek ah siam hi. Zeisu thu ah za kei hi.
6 Kam Tuam: Sawltak te in kha Siangtho ah ngah cilin kam tuam in ah pau thei hi. Hih sungah leitung kam pau, ah cinawpna hih kei hi. Mihing thei thei lo, Kha Siangtho kam in ah pau hi
9 Masa bang in Zudah ah mihing te in Pawlu thu deih lo uh hi. Tua ahih ciang in amah in Lawki kiangah thu hilh in mun dang ah mi ah kih kawm sak hi. Tua Tilanis in lai hilh sia ah hi, sunah amah in lai ah hilh hi, zanah Pawlu in Pasian thu ah hilh hi.
Zanuaiza kha 17 ni
Pawlu Eipet Khua ah ah Om hi
Sawltak 19
10 Kum nih tawntung ni simin thu hilh ahih ciang in Asia gamah ah om Galik mi leh Zudah mi ah vekpi in Topa thu ah za uh hi. 11. Pasian in Pawlu khut tung ah nah lam dang liante lak a, 12 Pawlu za tak na puan ahih zong in, kawng gak puan ahih zong in, la khia a cinate ah piak ciang in ah ci natna ah dam kik hi. Dawite in zong ah pai khia uh hi. Tua lai tak in ah vak kawi kawi na ah ah sa thei Zudah mihing kim khat te in dawi gi lo vei mite tung ah Topa Zeisu ah min zang in: Pawlu a hilh Zeisu min tawh ka sawl hi, ah ci uh hi. 14 Phui sam pa hi, Zudah mi khat Siva ah tate sagih in tua bang ah hih uh hi. 15Dawi gilo te in: Zeisu kah thei hi, Pawlu zong kah thei hi, Note kua mi nah hi uh hiam ah cih uh hi. 16 Dawi gilo ah vei pa in amaute tung ah deng in zo a, ah nih mah zo ahih ciang in ah su gawp leh amau in inn pan puan nei lo in ah tai khia uh hi. 17 Tua thu te Eipet khua ah ah om Zudah mite leh Galik mihingte khempeuh in ah zak uh ciang in lau mah mah uh a Topa Zeisu min a phat uh hi. 18 Thu um mihing tampi te in hong pai uh a amaute gamtatna uh ah Pulak uh hi. 19. Ai ah san tampite in zong amaute lai bu hong paipih leh mi khempeuh maiah mei tawh ah hal uh hi. Laibu man ah sim ciang in ngun dangka ten thum man ah hi ah thei uh hi. 20. Tua mah bang in Topa thu hong khang leh ah zo zaw hi.
21. Tua nung ciang in Pawlu in Makedawni gam leh Akhaia gam pai khit ciang in Zezusalem khua pai ning ci in ah lung sung ah han ciamin tua khua kah tun khit ciang in Zawma khua kah mu ding hi ah ci hi. 22. Amah ah vak mihing nih Timawte leh Elastu, Makedawni gam ah pai sak khit ciang in amah in Asia gamah tawl khat ah om lai hi.
Khiatna Thu
Pawlu in ah ngeina bang in sawt veipi ah teeng hi. Eipet khua sim loin khua dang tampi ah pai in Pasian thu ah hilh hi.
13. Ai sante: Hih mihing te in Zudah mi hi napi in ai ah san thei hi. Ai san ngeina in Lawki kiang pan ah za uh hi. Pasian thu hi lo hi. Mi ah ci nat ciang in dawi vei hi, ci in ah um uh hi. Ai san pa in ci na pa kiangah min tuam tuam tampi ah gen ciangin dawi ah pai khia hi, ci in ah gen uh hi. Tua mihingte in Pawlu vang letna ah mu uh ciangin Zeisu min zong ah zang hi. Amau sang in Pawlu in mi ah dam sak thei zaw hi.
14. Siva: Tua pa in Pasian phuisam pa ahi hi. Ahih hang in ngun angah nawp maninah Lawki aisan ah suak hi.
16. Dawi taktak te in Pasian thu bek ah ngai ding hi. Amau sang in Pasian ah lian zaw, ci in ah um uh hi. Aisante thu ah ngai kei uh hi.
18. Tapidaw te lakah mi kim khatte in Lawki ngeina ah zui sim lai uh hi. Amaute in zong ai ah san thei hi. Ahih hang in hih thu ah theih ciangun lau a ah khialna pulak uh hi. Mihing pen mah in Tapidaw ah suak khit uh ciang in Lawki ngeina ah zui sim leh pha lo hi.
19. Ni dang lai inah sik tawh laibu ah bawl siam loin in mihingte in ah khut in ah gelh maninah laibu man ah haksa mah mah hi. Tua ahih ciang in hih mihingte hihna ah haksa thei hi.
21. Mekedawni gam leh Akhaia gam sungah Tapidaw tampi ah om hi. Tuia Tapidaw zong Pawlu in ah mu nuam hi. Zawma khua in leitung khua lian peen ahih maninah Pawlu in tua khua ah mu nuam hi.
Zanuaizi kha ni 24 ni
Pawlu in Eipet Khua ah ah Om Lai Hi
Sawltak Tangthu 19
23. Tua lai tak in Topa thu hang ah thu lianpi ah piang hi. 24. Bang hang hiam ih ci leh Dimitazi min nei, ngun seek pa khat in Atima dawi biakna inn neu ngun, tawh bawlin ngun seep pawlte na tampi ah seem sak hi. 25. Tua pa in ngun seekte leh tua bang ah hih thei mite ah kih khawm sak khit ciang in: Lawmte aw hih nasepna in sum ih ngah note nah thei uh hi. 26. Tu in ahih leh Pawlu in mihing khut tawh kih bawlsa Pasian ah om kei ci in Eipet khua bek hi lo, Asia gam khempeuh mihing tampi zolin ah hei sak, na mu thei uh hi. 27. Eite nasepna su gawp tam lo in dawi numei lian Atima biakna inn pha maw loin ah piang leh Asia gam mi khempeuh ah kihpan leitung mi khempeuh ah biak dawi numei ah phatna zong ah kih sia ding hi. 28. Amau in hih thu ah zak uh ciang in hehma tawh dimin: Eipet mi lim Atima a lian hi, ci in ah kih ko uh hi. 29. Khuasung khempeuh gam lumna in kih dim hi. Amaute in Pawlu ah khual zinpih Mededawni mite Gaza leh Azitaku ah mat khit uh ciang in pawi khamna mun in kih bang in thakhatin ah tai uh hi. 30 Pawlu in amau kiang ah pai nuam hang in unaute in ah kham uh hi. 31. Ama lawmte Asia pawi mang kim khat in zong pawi khamna munah pai lo ding in ah thuum uh hi. 32. Ah kih khawm mite gam lumin om uh ahih ciang in ah tuam a tuamin ah kihko uh hi. Mi tam tam zawte in 1mauti bang hang in kih kawm uh ah hi hiam ah thei kei uh hi. 33. Zudah mihing te in Alezandia mi honpi lak pan la a mi maiah ah pai sak hi. Alezandia in ah khut taqwh thu pia leh mawh kih pelna thu ah gen nuam hi. 34. Zudah mi ah hi lam ah thei u ciang in: Eipet mi dawi Atima ah lian in, ci in nai nih dek tak in mi honpite in aw khatin ah kihko uh hi. 35. Khua lai at pa in mite ah dal sak khit ciang in ah pai khia sak hi.
Khiatna Thu
24. Atima: Eipet khua ah lian tham loin ah sungah Atima biakna inn zong ah om hi. Tua inn hawih mah mah gam lapi panin mihingte hong pai a, mi lim ah bia uh hi. Mi lim ah hawih kei hi. Numei tawh kih bang hi. Ahih hang in ke(ki) ah nei kei hi. Ah bia mihing te in ah khua ah ciah uh ciang in phawk kiknah ding in biakna inn neute ah pua uh hi. Tua biakna inn lim nei ah bawlte in tha man tampi ah ngah uh hi. Ahih hang in mi tampite in Tapidaw suak ahih ciang in masa bang in biakna inn lim tampi ah lei kei uh hi.
27. Leitung khempeuh: Amau ah theisa leitung ah hi hi. Tua dawi in hauna ah pia thei ci in ah up maninah mi tampite in Eipet khua panin ah bia uh hi.
29. Pawi khamna mun: Mang Kang khua khempeuh tua kih khawpna mun ah om ciat hi. Ah lamte ah kih demte ah ette 50,000 ah kih khawm thei hi.
28. Pasian thu hanginah tua mihingte ah zum ah bei ciang in ah heh mahmah hi. Khat vei Zeisu in: Leitung ah namsau pai sak ding in kah hong pai hi, ah ci hi.
33. Alezandia: Zudah te ah lung mang uh hi. Mihingte in Pawlu dan tat uh leh Zudah mi khempeuh zong ah dan tat ding ah lau uh hi. Tua ahih ciang in Pawlu thu in Zudah mihingte thu hi lo, ci in Alezandia ah gen nuam hi. 34. Ahih hang in Lawkite in Zudah mi ah gen sia ah hih uh ciang in Alezandia thu ah ngai nuam kei uh hi.
Tua ahih ciangin Pawlu in kum nih leh kum lang Eipet khua ah om lai tak in Tapidaw tampi ah ngah hi. Ah nung ciangin tua Tapidaw pawlpi kiangah Pawlu ah hilh sa lai bu in Lai Siangtho sung ah kih kawih hi. Tu in Eipet khua kih sia zo hi. Ahih hang in Pawlu thu ah kih siah ngei kei ding hi.
Zanuaizi kha ni 31 ni
Pawlu in Eipet Pawlpi Upate Thu ah Hilh Hi
Sawltak Tangthu 20
29. Kah pai khit ciangin gi lo ngiate in nomau lakah lutin tuu honpi ah hehpih kei ding uh hi. 30. Tapidawte ah zolnah ding in thu zuau ah gen thei mite in note lakah ah piang ding kah thei hi. 31. Tua ahih ciang in ngai un la, kei in kum thum tawntung sun leh zan pel loin mite khempeuh khi tui tawh hilhin kah om thu nah ngaihsun un. 32. Tu in note Pasian kiang ahih hang in note nah kip thei leh ah kha siangtho te tawh hong pia thei Pasian hehpihna thu pha kiangah note ka hong pia hi. 33. Kuamah kham ahih hang in ngun ahih hangin, puan ahih hangin, kah deih gawh kei hi. 34. Hih khutte in kei ahih hangin, kei tawh ah om khawmte ahih hang in hong vak in nah thei uh hi.
35. Tua bang in note in zong naseemin tha zangte nah huh dingun, ahih hangin hehpih ah ngah sangin hehpihna ah pia leh thu pha ah om zaw hi, ci in Zeisu in thu pia ka mu ah ngaihsut ding ahih hangin na khempeuhah note kiangah kah hong lak zo hi, ci in Pawlu in ah gen hi.
36. Pawlu in hih thu agen khit ciang in ah khuk ding in tua mite khempeuh tawh thu ah ngen hi. 37. Tua mite khempeuh in nakpi in kap uh a Pawlu ngawng kawi in ah nam uh hi. 38. Ah nung ciang in kah mai tang nah mu nawn kei ding hi, ah cihna thu hanginah ah dah peen uh hi. Amaute in Pawlu, teembaw ah ah kha uh hi.
Khiatna Thu
Pawlu in Eipet khua panin Madekawni gam leh Akhaia gam ah pai hi. Tua gamah om Tapidaw te lung ah kip sak khit ciang in Zezusalen khua pai ning ah ci hang in that ding in pangte ah om ah theih ciang in Makedawni gam lam ah ciah kik hi. Tua lai panin tembaw tungah tuang a tuipi lam Zezusalen khua a pai hi. Tua tembaw in Eipet khua ah tung kei hi. Tua ahih ciang in ah khawlna mun panin Pawlu in Eipet pawlpi upate sam a, a thu tampi ah hilh hi. Hih lai sungah ah hilh na thu tawm bek ah om hi.
29. Ngia: Thu zuau thu hilh te hi. Ah gen khol bang in ah piang hi. Eipet khua bek hi lo khua dang ah: Zeisu in Pasian ta hi lo ci in mi tampi in ah gen kawi kawi uh hi. Tapidawte lai pan in tua bang ah gen in zong ah suak hi.
32. Lauhna: Zeisu in: Lung kih niamte in leitung ah luah ding hi, ah ci hi. Pawlu in mun dang panin Eite in Zeisu tawh ih luah khawm ding uh hi, ah gelh hi. Kha siangtho leh Zeisu thu um a ah mawhna kih maisak zote hi.
34. Pawlu in kha sum ngah nawp manin Pasian thu ah hilh hi, kuamah in ah gen siat zo kei hi. Ah khut in puan buuk bawl na tawh ah kih vak hi. 35. Pawlu in eite ngaihsutnah ding ah hi hi. Eite in Pawlu tawh kih bang in hih leh mi siangtho mah mah in piang ding hi. 38. Zezusalen khua ah tun ciangin Zudahte in ah hong that ding ci in Pawlu in ah um hi. Amah in Eipet khua ah tung kik nawn kei hi.
Tua Tapidaw te aading ah haksa hi. Amau siapa pawlu in ah khua uh ah pai nawn lo ding hi. Ahih hang in ah kih sia lo uh hi. Pasian thu pha takpi ah up manun Tapidaw pawlpi ah khang seem seem hi. Mihingte ah hing ah si thei hi, Ahih hang in Pasian leh Zeisu thu ah kip tawntung hi.
Laibu Saal /Zomi eLibrary
www.zomielibrary.com
