Sihna: Gungal Kahna Ding Lei
Agelh ~ Kap Za Khai
Mihingte adingin a kihtak huai pen leh a deihhuai lo pen kammal in sihna cih kammal hi. Si leng kiciah kik thei nawn lo-a, na dangte tawh tawntung kikhenna zong ahi hi. I nuntak sungin pello in i tuak ding thu in sihna hi. Tua ahih leh sihna cih in bang ahiam?
Zato siavuante in sihna pen dawl nih in na khen uh hi. Dawl khatna pen Clinical death kici huihdiik khawl, lungtang khawlna leh sisan luang khawlna leh a dawl nihna pen Brain death kici khuak nasep nawn lohna cihte hi. Dawl khatna ciangah zong mi si khin ci uh hi. Tua ahih manin sihna cih pen bangmah tawh kham theih hi lo ahihna kimu thei hi. Tuhun ciangin zato vanzatte hoih mahmah in zatui-te a khantoh mahmah hangin mi khat a nuntakna minit khat nangawn khangto sak thei lo hi. Tua in sihna tungah kuamah in ‘To’ a hih theihlohna kilang hi.
Max Lucado in sihna pen guta buluh tawh tawh kibang hi ci hi. Kigin loh kal leh kitheih loh kal-in hong paivat thei a, phal loh pipi in zong nuntakna teng lakhia mang thei hi. Hong guksak mang hi. Kuamah’ khamzawh leh khakzawh zong hi lo hi. Tua bang hun i tuak ciangin kikap ciat, kidah ciat hi. Kahna cih pen a site mangpha khakna ahi hi. Jesuh Khrih zong mipi lakah kap hi. Kumpi David zong kap hi. Itna leh pammaih sakna tawh mangpha khakna hi-a, mawhna thaman in sihna hi cih thuman thutak kuama pelh theihlohna kipsakna zong ahi hi.
Lai Siangtho in sihna pen gal nunung hi ci hi (I Cor.15:26). Tua gal zo khia leng eite in nuntakna munah kitung thei ta hi. Ahi zongin tua gal i zawh theihna dingin i leitungah kigin den kul hi. Mi khempeuh si veve ding ahih manin mi khempeuh in sihna ading a tawntungin kigin den ding kisam hi. Banghang in kigin den kul hiam cih leh sihna nung sangah nuntakna om lai-a, tua munah i tun theih na dingin sihna pen ‘galkahna lei’ ahi hi. Mi khempeuh tua lei tawnin leitung pan kipai khia mang ding hi. Ahi zongin koi munah tung ding i hiam?
Khristian-te a dingin sihna lei tawnin Jesuh Khrih kiangah pai ding thu sangin a lungdam huaizaw thu om nawn lo hi. Jesuh Khrih in sihna tungah na gualzo khin hi. Sihna pen Jesuh Khrih khenuai-ah pukkhin zo hi. Tua ahih manin eite in banghangin sihna lau lai ding i hi hiam? Sihna aw, na gualzawhna koi-ah om a, midangte na suksiat zawh nading na thahatna koi-ah omta ahi hiam? (I Cor.15:55) ci-in lungdamna tawh tangko den lo ding i hi hiam?
Jesuh Khrih in leitung leh Vangam kikal i galkah nading lei a phapen hong dawh kiksak khinzo hi. Sihna lei kantan in nang koi lamah pai ding na hi hiam? Tawntung sihna hell ah maw? A hih kei leh tawntung nuntakna vangam ah maw? Tu laitak a na khentatna leh na teelna in na sih khit nungah na nuntakzia ding thu hong khen lel ding hi. Sihna cih pen nuntakna nih kikal-a kidawh lei hi-a, kuamah in tawn nuam lo hi. Kuamah in lunggulh lo hi. Kuamah in teelnuam masa lo hi. Ahi zongin mi khempeuh in kitawn kha veve ding hi. Tua hun ciangin linglawng lo tak-a na pai ngam nading in tu mahmah in a sephuai teng na sep ding hilo ahi hiam? Banghang hiam cih leh tua sihna lei in nisim naisim in i maiah hong kidawh den a, ama tungah I pai ding hun hong ngak gige mai hi.
Reference: Doctor Phay Myat Win, The Songs and Flowers of the Wilderness.
