Khristian Biakpiakna (Christian Worship)
Agelh ~ Kap Za Khai
Khristiante nuntakna-ah a thupipen ngaihsut ding thu khatin Pasian biakpiakna ahi hi. Hih thului tomno sungah biakpiakna thu laigil tawm kikum nuam ing. Tanglai Manglai ahi Anglo-Saxon kammal deihna bang hi leh biakpiakna (worship) cih kammal pen Worth-Ship cih kammal panin worship ah a kizang to hi-a, a khiatna in phatna leh pahtawina a ngahhuai Pasian tungah phatna leh pahtawina piakna leh amah pen ‘To (Lord)’ dinmun-ah koih cihna ahi hi. Hih kammal deihna bang hi leh biakpiakna cih pen biakpiakna a pia mi khat’ nuntakna khempeuh huamkim cih ding hi.
Tua bek tham lo-in biakpiakna cih kammal pen Hebrew leh Greek Lai Siangtho genna bang hi leh kiniamkhiatna tawh ki-apna cih hi. Ei sangin a vanglian zaw khat mai-ah lukun in kiniamkhiatna tawh zahtak piakna dan hi (Pian 18:2; 33:3; 42:6; 49:8; 2 Sam 24:20; Matt 8:2; 9:18; 18:26). Pasian kiangah kiniamkhiatna tawh i hihna khempeuh tawh ki-apna pen biakpiakna thu laigil hi. Mihingte in ei hong bawl Pasian mai-ah a kiniamkhiat mi, Pasian min a phat mi, Amah zahtakna, launa leh itna tawh bel in a nungta mi i hih ding thupi hi (Late 2:11; Matt 2:2). Pasian vangliatna leh itna a thei/teel mite in Pasian bia uh hi (Pian 24:26-27; Pai 4:31; 12:27; Late 95:6; Matt 2:2; Mang 4:10; 5:14; 11:16). Biakpiakna cih pen Pasian sungah lungdam kohna lahna leh, kipaakna, suahtakna, thathak lakna leh lungnopna ahi hi (Late 89:15-16; 98:4-6; I Kor 1:46-47; I Pet 1:8).
Biakpiakna cih pen mihing khat i nuntakzia leh ama gamtat luhek kha nuntakna thunih kigawm thu hi (Pai 33:10; Rom 12:1). Tua pen Kha nasepna bek tham lo-in lungsim nasepna zong hi (1Kor 14:15; Jn 4:24). Khatkia bek tham lo-in mihonpi tawh zong biakpiakna bawl ding ahi hi (Pian 22:5; 24:52; I Khang 29:20; Sawl 20:7; I Kor 14:26). Tua bangin Pasian biakpiak ciangin kha lamlahna leh thuman taktak tawh biak ding thupipen hi (Jn 4:24). Banghang hiam cih leh a nungta biakpiakna sungah langnih na sepna om a, Pasian tungpan mite kiangah ahi zongin, mite tungpan Pasian tungah ahi zongin khat leh khat kizopna om hi. Tua pen Pasian leh mihing kilawmtat bawl khopna leh hunpha neih khopna hi (1Jn 1:1-3).
Banghun cih omlo-in Pasian biakpiakna i piak ding ahi hi. Nisim i nuntak luhek gamtat nate khempeuh zong Pasian biakpiakna mah ahihna phawkkim ciat ni. I nuntakna ah Pasian longal i biakpiak ding kuamah dang neilo hihang (Sawl 10:25- 26; 14:11-15; Mang 22:8-9). Biakpiakna sungah Pasian bekmah a thupipen ahi bangin amahmah biakna neipa hipah hi. Tua biakna neipa tawh lungsim leh pumpi taktak tawh kikholh khopna pen ei adingin hamphatna lian mahmah leh Topa thupha taktak ahi hi. Tua ahih manin i To ahi Pasian kiangah kiniamkhiatna tawh khukdin in i hihna khempeuh ki-ap in, amah tawh kikhawlkhopna bawl in, lungsim, pumpi, kha leh thuman taktak tawh biakpiak pahtawina i zat ding pen Khristiante in seploh a phamawh thu leh i hamphatna pi ahi hi.
Pasian vangliatna leh itnate i teel/theih semsem ciangin Pasian biak ding zong kilawp semsem in, zong kihanciam hi. Biakinn pai in kikhop ding thanem in thadah laiteng ei leh Pasian kikal ah a kician kizopna leh kitheihcianna nei nailo cihna hi a hong piangsak Pasian phat nuam lo, pahtawi nuam lo, ama vangliatna, hehpihna leh itna teel lo, ama mai-ah kiniamkhiat nuam lo-in a kiphasak cihna hi lel a, tua bang Khristiante kanin a dahhuai leh a hamsia mi leitungah om nawnlo hi. Tuabang mite Pasian in ni khat ni ciangin hemkhia ding hi (Mang 3:15- 16). I biakpiakzia in ei leh Pasian kikal kizopna leh i lungsim tawng taktak hong pholak den ahih manin i Pasian biakpiaknate kician sak, siangtho sak, limci sak, zahtak huai sak, leh thupi ngaihsut ciat ni (I Sam. 12:20; 24).
Zollai Zunna, 2014, Pyidawtha Tuiphum Pawlpi’ Zaang Tongdam, 2014.
