Dinmun Neihna le Kizahtaksiamna
Agelh ~ Khup Lian Thang
Mihing bel i upna ah hangsan tak aa i din ngamna pen a thupipen hi sa ing. Kinuihsan theih thu hi kei. Mikhat’ a upna a sandan pen thuman thutak ahihleh ei khawng in online panin i phatmawkmawk leh ei om muan in i zahpih mawkmawk i hawmthawh mawkmawk kul hetlo hi. Thuman thutak a thei Pasian in na lamsang lua lel ding hi.
Galkap buluhte langdo na ah nuntakna pia ahi zongin, nasep khawl le amau hihtheihna tek a kipia khia ngam te’ dinmun zong i zahtak theih ding kisam sa ing. Amau’ khensatna tawh a khensat a kipiakhia te kiangah “tua ii sawlna amau’ khemna hang”, i va cihcih zong hikei deuh. Mi cih bangbang in a gamta a om phial hangin tampi mah zong amau khensatna tawh a kipiakhia ahih manin a dinmun uh zahtak siam dih ni. A kipia khia taktakte i khualna bek in maw. Dinmun neilo le ngaihsutna neilo bangin tuat hetkei dih ni.
Tua teh innkuan sungah haksatna khat peuhpeuh i tuah ciangin a nai a gamla, Zogam vaigam le tuipi gal kaai aa om i u i nau khempeuh tawh i nawk khawm i kikup khop ding mah himawk lo hiam? Tua mah hiven ei mun ciat pan ihih theih bangbang tawh pangkhawm ni a kicihcih ii a deihna. Sum nei ten sum tawh, pilna neiten a pilna tawh, siamna nei ten a siamna uh tawh, thatang nei ten a tha tang uh tawh a sem khawm a kisem khawm ngeingai ding mah hilo diam?
A thupi ah khat le nih hang ahi zongin pawlkhat hangin ahi zongin ciang saupi tawh mi khempeuh i sat mang na pen kidophuai mahmah dingin ngaihsun ing. A thupi ah ei koi ah dinga koi lam in i lungsim hong zo zaw hiam? Tua i upna i sanna pen ei hihna i tangthu i tu i tate tungah i nusiat ding i gamh thupi pen hi ding ahih manin upna man dinmun a dik ah i om khak ding zong thupi mahmah ding hi. A thupi penpen ah khatle khat kizahtak siam ciat ding thupi penpen hi.
