Esther: A Melhoih Tampi Lakpan A Melhoih Khat
(Esther 2:15-17)
Agelh ~ Kap Za Khai
Judah Siapite (Rabi) in Judah numeite lakah a melhoih pen-te ci-in a ciaptehna ah Sarah, Rachel, Abigail, Vashti leh Esther-te cih bangin mi nga na kihel uh hi. Hih numei melhoih nga teng lakah Esther’ melhoihna kikum ni. Amah a mel a hoih takpi mah ahi hiam? Ama hoihna hang bekmah in Kumpi Ahasueras in Esther kumpinu’ dinmun ah a koih ahi hiam?
Lai Siangtho thuciam lui sungah numei min tawh kigelh bu nih om-a, Ruth leh Esther ahi hi. Esther thubu pen Lai Siangtho sungah banghang in kiguang hiam cih leh Judah mite’ Purim pawipi a piankhiatna thupiang a kihel man ahi hi. A zenzen-in Esther thubu om kei leh Purim pawi pianna tangthu kithei zolo kha ding hi. Thubu a gelhpa kician lo a, ahih hangin pawl khat in Benjamin nam Jew mi khat hi dingin ki-um mawh hi (Est. 2:5). B. C. 483-471 sungin kigelh hi.
Kumpinu Vashti in Kumpipa’ thu a manlohna hangin kumpi Uliante’ ngaihsut piakna tungtawn in Kumpipa Ahasueras in a gam sunga om nungakte kumpi inn sunga om nungak kepna inn ah kikai khawm sak-in, kum khat sung a kipuah sak khit ciangin kumpipa mai-ah paisak uh a, tua mun-ah kumpipa in a zi ding a teel hi. Tua kiteelna ah Persia gam sunga om nungak melhoih khempeuh kihel hi. Benjamin nam, Mordekai’ innlak pate tanu ahi Hadassah kici Esther zong kihel hi. Esther pen a tun a duang etlawm in zong ngaih bang mahmah hi.
Eshter’ hoihna a muh phet-in kumpipa in it pah ahih manin kumpinu lukhu khusak pah hi. Hih sungah ‘it’ pah cih ciangin kumpi in Esther tungah lungsim siangtho tawh it cihna hi masa lo-in numei dangte’ hoihna sangin Esther hoihna in kumpipa’ lungsim zo zaw cihna hi zaw hi. Hih kiteelna khempeuh pen Pasian kiangpan hong pai hi-a Pasian geelna ahi hi. ‘Pasian in tanglai peek-a kipan a geelsate phawk tawntung hi’ (Acts 15:18).
A taktak in Esther pen kiteelna sunga kihel numei dangte sangin a mel a sa hoihzaw khollo ding hi. Amah sangin a hoihzaw tampi om lai ding hi. Ahi zongin Esther thubu pen Judah mi khat peuhpeuh’ gelh ahihna tungtawn in enleng laigelhpa in Judah mi ahi Esther akidawk sak nopna tawh Esther hoihna a uanggen ahi hi. Hih kiteelna ah Pasian nasepzia mangngilh khak loh ding thupi hi.
Tua kiteelna-ah a kihel nungak melhoih tampi sung pan in Esther sese kumpipa in a it theih na dingin kua in kumpipa’ lungsim lencip hiam? A hoih tampi lak panin a hoih khat a muh theih, a ngah theih, a teel theih, a it theih na dingin mihingte’ lungsim leh ngaihsutna in a batzawh loh nung-ah a vanglian Pasian nasepna na om gige hi. ‘Topa’ khut sungah kumpipa om a, lo sunga tuilak bangin a deihna peuhah hei kawikawi thei hi’ (Pro. 21:1). Pasian in ama mite Haman’ thatna pan a suahtak na dingin nasep na-ah Esther na zang hi.
Esther zong Ruth mah bangin Pasian kiangah a kipia mahmah numei hoih khat hi. Ruth in a teeknu kiangah ‘Na paina ah ka pai ding hi,’ a cih bangin Esther in zong a mipihte kiangah ‘Ka sih ding leh zong thuak ning,’ a ci hi (Est. 4:16). Hih numei nih in na lianpi a sep zawh na dingun Pasian kiangah na ki-ap den uh-a, Pasian in zong amaute na zang hi.
Mihing khat nuntakna ah Pasian kihelna omlo in na lianpi bangmah kisem thei lo hi. Bangzah in pianpih mel leh sa hoih in, pil in, siam in, hau in i om hang in Pasian kihel kei leh a mawkna hi lel ding. Pasian a theilo nungak melhoih tampi sangin Pasian a thei Esther pen ithuai zaw, ngaih huai zaw hong suak hi. Esther kumpinu lukhu a ngahna pen ama melhoihna sangin a Pasian upna, itna leh muanna tungah kinga zaw hi. Ama pianpih hoihna tungah Pasian in thupha a piak ciangin Kumpi Ahasueras mit-ah Esther pen a melhoih tampi sung panin a melhoih pen, a it huai tampi sung pan a it huai pen hong suak hi.
4 May, 2014
Reference: Pr. Khin May San, Dai takin om ding hun hi lo hi: Kalay Valley Baptist Women Fellowship Golden Jubilee Magazine (1961-2011). Kalay: KVBWF, 2011. Brian J. Bailey, The Three Houses of Esther (Myanmar Translation by Daw Khin Than Thie). Warren W. Wiersbe, Be Committed. England, Colorado Springs: Chariot Victor Publishing, 1991. Roger L. Omanson and Philip A. Noss, A Handbook on the Book of Esther. New York: United Bible Society, 1997. Libronix Digital Library System (Personal). Lewis Bayles Paton, A Critical and Exegetical Commentary on the Book of Esther. New York: C. Scribner’s Sons, 1908. Libronix Digital Library System (Personal).
