Huih in a lehlam pan a mut hi.
(Matthew 14:24)
Agelh ~ Zam Khat Kham
"Contrary winds." Huih in a lehlam panin mut. Huih a deih lohna lam vuah nung. A deihna lam vuah huih nung lo. Huih leh nun. Huih in leh mut.
Puankhai gunkuang tawh khual a kizin lai-in huih nunna koilam hiam cih thupi lua mahmah hi. A pai nopna lam uh manawhin huih nung leh "set" kithuah bangin "zang" mahmah uh hi. Tawldam mahmah uh hi. A pai nopna mun uh tung ziau uh hi. Lungnop huai mahmah hi. Tua huih mah a lehlam ah a nun mawk ciangin bel buai mahmah uh hi. A cih a lawh nading uh om tuan lo hi. Huih in a lehlam pan "thal mut" ahih manin ma kisot thei peuhmah lo hi.
Hih lai-a nungzuite huih in tua banga a lehlam pan a mut laitakin a gunkuang uh tui mong pan a gamla simsim tui laizang ah om, ci sawnsawn hi. Khuamial bikbek, ci lailai hi. Tuihual in a gunkuang uh sat keii hi, ci lai hi. Tuihual liat tuak san tuak mahmah hi. Greek ah "basanizo" cih kammal kizanga a khiatna "bawlsia, gimsak, buaisak" (to torture, to torment, to harass) cihna ahi hi. Tuihual in tua bangin bawlsia hi. I Topa gunkuang sungah amau tawh tuang khawm lo hi. Mun dang ah thungenin om hi. Nungzuite cimawh uh hi. "Vil lina" (fourth watch) hun hi, ci-a tua pen zinglam lam nai 3:00 am pan 6:00 am ahi hi. Khuavak kuan a mial bikbek laitak ahi hi. Huih in a lehlam pan mut, tuihual in a gunkuang uh sat, khuamial bikbek, a Topa uh om lo, a cih nading uh thei lo uh hi.
Tua laitak i Topa tui tungah hong pai mu uh hi. Nuam le uh kilawm napi nuam lo uh hi. A muh uh ciangin "Sikha, sikha" ci mawk uh hi. Lau zawsop uh hi. I Topa in amau' cihmawhna mu-in a honkhia dinga hong pai kimlai "sikha" sa uh hi. A sak pongmawk bek mah uh hi a, kuamah in i Topa pen sikha hi, ci-a amaute a gen zong hi beek lo hi. A lungsim ngaihsutna uh hi bek hi. I lau luat, i patauh luat teh i lungsim a ngeina bang lo, cihna hi. I Topa bang "sikha" bangin mu pongmawk uh hi.
Hih thupiang tomno pan i sin theih ding tam mahmah ding hi. I nuntakna a pai ngei-a a pai ciangin bangmah i phawk loh hangin huih nunna hong kikhel thei takpi hi. A lehlam pan hong mut thei hi. Pai ngei-in kipai thei nawnlo hi. I cih nading kithei lo hi. Baih lo hi. Haksa hi. Khuamial bikbek hun hi mawka bangmah kingaihsun thei lo hi. Buipi suangzawl tuak kibang thei hi.
Tua bang hun ciangin, mangngilh kei ni: i Topa'n hong mu gige a, eite hong hon dingin hong pai hi. Sikha peuh sa zanzan kei ni (Sikha cih bang om lo hi, dawi' nasepna hi). Huih in hong leh mut a, gimna i thuak laitak lian mah in i Topa ei' kiangah hong pai hi. Hong nusia ngei lo hi. Nidanga i theih sangin amah i theih zawk nading, nidanga i muan sangin amah i muan theih zawk nading hun pha hong suak thei lua hi.
