Zudawnte’ Lai Siangtho Zatte
Agelh ~ Kap Za Khai (Photoh)
A lamdang takin zudawnte in Lai Siangtho na sim bilbel uh hi. Ka lawm zudawn thei khat in ‘Zu zong a kimawk dawn hi loin Lai Siangtho banga kidawn hi e’..hong ci ngei hi. zudawnte’n tua bangin a zudawnna uh kiphelh nadingin Lai Siangtho sungah kidal zong thei uh hi. Hih anuai a teng pen amau’ zat leh a thalakna uh Lai Siangtho munte ahi hi.
An ne-in lungdam inla, zu ne-in lungnuam in. Na gamtatna peuhpeuh Pasian in hoih a sa hi (Thuhilhna 9:7).
A si dekdekte, khamtheihzu pia inla, a lungkham mahmahte, lenggahzu pia in (Pau.31:6).
Na gilsung natna le nat mun zelzelna hangin tui bek zang nawn loin lenggahzu tawmtawm na zang in (1 Tim. 5:23).
Hih Lai Siangtho mun tengpen a laigual le a laimal bang lianin sim lehang zu nek ding leh khamtheih zu tuamtuam dawn ding a phalna tawh kibang hi. Thuhilhna Lai Siangtho pen Solomon’ nuntakna thu hoihtak theihna tawh a khiatna piak ding hi. Amah pen amasa in Pasian bia ahih hangin a zi neute hangin a upna pialin milim bia khat na suak a, tua pan kikhelkik in Pasian’ hoihna a phawkna pan hih thubu agelh ahih manin ama thugelhte tangkhat bek simziauh tawh a khiatna piak pen a thu taktak pialthei hi.
Thuhilhna 9:7 lungngai leng hih-in ‘nuntakna hunpha’ ngah sungin Pasian hong piak hunphate hoihtak zat ding hong hilhna hi. Sih khit ciangin leitung tawh kisai hamphatna kingah nawn lo ding hi. Khuahun zui-a kibawl pawite, innkuan tawh kisai nopnate leh nasepte pen Pasian in mihingte ading hong piak ahih bangin mihing in nopsa takin kihel ding Pasian in hong deihsak hi. Hih pen mi khempeuh ading Pasian in ahuampi a deihsakna pulakna hi a, a langkhat ah Pasian in mihing hong kipiansakna a thubulpi pen in: Pasian zahtakna le a thupiakte manna ahi hi (Thuhilh 12:13), hong ci hi. A cihnopna bulpi in i nuntakna pen i deih bangin kinungta thei lel a, Topa in zong hong phal lel hi. Ahi zongin ei tung panin Topa’ deihna taktak ahihleh ama’ thupiakte mangin ama’ sungah na om ding hi cih hi.
A nihna ahi Pau.31:6 ciangin aneu 4-7 dong sim ding kisam hi: Pasian tawh nungta lo in leitung vai bekbek tawh buai-in sidek in a lungkhamte in zu tawh a nuntakna uh kinuhthualgawp ahihna genna hi.
A thumna ahi 1 Tim. 5:23 pen Paul in Timothy kiangah ama’ gilpi natna hangin lenggahzu pen zatui in a zangsak hizaw hi. Zatui vai tanglai Greek’ mite laigelhna ah gilpi adingin a zat uh zu kikham lo ci hi. Athanaeus in ‘gilpi adingin zukhum hoih ahih manin, tui tawh helin ahih kei leh a lumin, adiakdiak in protropos (a kicil ma-a lenggah pana a lungkhia lenggahtui) a kici namte amah dawnsak un, banghanghiam cih leh zukhum in lung-am sak lo hi,’ ci hi.
Hih atung a zudawn zunek phalna tawh a kibang Lai Siangtho munte a nungthu leh kha thupaizia (Biblical background and theological concept) tawh diktak in i khiat ciangin Pasian in mihingte ahuampi-in noptat ding hong phal lel a, ahi zongin amah umin amah tawh a nungtate in zu leh lenggahzu peuhmah cidamna dingin kidawmtak in zat ding simloh pumpi nopsak nadingin zat ding phallo ahihna kimuthei hi. Zatui a zat ding cih zong tuhun ciangin natna tuamtuam adingin zu ahilo zatui zaha tampi omta ahih manin zu nek ding peuhmah kiphal lo hi
