EITE HONG ZONG DINGIN JESUH HONG PAI
Agelh ~ Kap Za Khai (Photoh)
‘…mite in a pampaih mite a kisik nadingun
a sam dingin a hong pai ka hi hi.’
Luka 5: 32
Mawhnei eite kiang panin Topa a paikhiat nading i sawl ciangin Topa in eite hong en-in “Patau kei in, no bang mite adingin hongpai ka ahi hi,” hong ci hi. I mang bang sakha phial in um ngam kei phialmawk hihang. Ahi zongin Topa in thuman hong gen ahi hi. Mawhnei ngabengpa Simon Peter zong Jesuh in mite a bengpa suaksak hi. Mawhnei eite zong a suakta mi hong suaksak hi. Hallelujah!
I pulaksa a om bangin ei pen mawhneite ihi a, mun khempeuh ah pai kawikawi in Topa kiangpan taikhia in i kibu kawikawi hi. Ahi zongin Topa in awnem tawh hongsam in hong zong den hi. Amahmah vantung pan hong kumsuk in eite hong zong tazen hi.
Buhphaw sungah kibu lengzong Topa in buhphawte hemkhia in hong zong hi. Sawlbawk sungah kibu lengzong Topa in Sawlbawk lemkhia in hong zong hi. Guamthuk sungah tuaksuk lengzong Topa in hong sulzuih a, singkung dawn-ah kahto lengzong Topa in hong mu veve hi. Ei leh ei bangzah in i kimansak hangin Topa in hong muh mateng hong zong den hi. Topa in ama muhna tawh kipelh theih nading lampi a om lohna eite hong lakkhia hi. Kuama peuh Topa’ muh loh dingin kibu theilo ahihna hong theisak hi.
I kibukna pan Topa in hong samkhia hi. I paikhiat ciangin Topa a lungdam in a maitai hi. Kipakna tawh i khut pan hong lenin i liamnate hong bawlsak hi. I gilkialna hong vahsak in i dangtakna hong kaamsak hi. I pumpi leh i lungsim hong silsiangin ama angsungah hong pomcip hi. Tu-in eite khempeuh Topa’ mai-ah kibu nuam nawn lo hihang. I kibuk hangin Topa in hong zong tinten dinga, hong mu veve ding hi.
Tu-in sanggamte aw, eite khempeuh zong Topa’ mai-ah kibu nawn kei ni. I kibukna khempeuh leh i kibuk dante khempeuh Topa in hong theilo ding i sak khak leh i khial mahmah ding hi. Banghang hiam cih leh Topa’ mai-ah kuamah kibu thei lo hi. Kuamah kiselcip thei lo hi. Late gelhpa in hi bangin na gelh hi:
“Topa in vantung panin hong ensuk a, mihing khempeuh a mu hi. A tutna mun panin amah hong dakkhia-in, leitung mite a en hi. Amau’ lungsim a bawlpa in amaute’ gamtatnate en gige hi Late 33: 13-15).”
Topa’ mai-ah kuamah kisimtat theilo hi. Topa in i gamtatna khempeuh hongmu sinsen hi. Ei adingin i gamtat simnate pen Topa’ muhna-ah kilaangtat tawh kibang lel hi. Teelsiam lehang zumhuai mahmah hi. Late gelhpa’ hong hilhna lungngai dih ni. Leitung mi khempeuhte’ nuntakzia, gamtatzia, thu ngaihsutziate khempeuh Pasian in vantung panin hong en gige, hong mu gige ahihna hong theisak hi. Mihing lungsim a bawlpa in mihingte’ lungsimzia zong hong teelsitset in hong encik gige den hi. Biakinn sungah i tut kawmin i lungsim sungah mi’ hoihloh nading i geel simsimte Topa in hong mu gige hi. Apua lam i maitai hangin i sung lam-ah gu bekbek a omna Topa in hong thei gige hi. Sumpi tulnga tulsawm i piak hangin pammaih i sakna lungsim Topa in lozau a saipi pai a kimu bangin hongmu gige mawk hi. Tua ahih manin Topa’ mai-ah bangmah kineih theih ding hi lo hi. Late 139: 7-12 sung sim lai ni.
“Nangmah a pelh dingin koi-ah pai ding a, nangma omna panin koi lai-ah taikhia ding ka hi hiam? Vantung kahto leng tua lai-ah nang na om ding a, leinuai misite’ gamah lupna bawlta leng zong tua lai-ah zong nang na om veve ding hi. Leimong pekah leengin, tuipi mong pekah, omta leng zong, tua lai nangawn ah, nangma khut in kei hong len ding hi. Khuamial in kei hong tuamcip hen la, ka kiima khuavak omte zan khuamial suak hen, cita leng zong, tua nangawn ah, nangma adingin khualmial pen mial lo a, zan khuamial pen sun nitaang tawh kibang hi. Banghang hiam cih leh nang adingin khuamial pen khuavak mah bang lel hi.”
Hi bangdan ahih manin sanggamte aw, Topa kiang panin taikhiat sawm nawn kei ni. I sawm hangin Topa’ muhna pan cikmah hunin i paikhia thei kei ding hi. Late gelhpa’ hong pulakna lungngai den ni. Topa pen van leh lei a bawlpa hi. Eite hong bawlpa zong hi. Tua ahih manin kua in amah tawh kigamlatna ah taikhia thei ding ahi hiam? Mun khempeuh ah Topa’ vangliatna kicingtakin kizeel hi. Hih leitung leh hun khempeuh pen ama sungah a om hi a, ama theih loh, ama muh loh bangmah om lo hi. A nopna mun-ah zong Topa om a, a nop lohna pen mun-ah zong Topa om hi. Asang penna mun-ah zong Topa om a, a niam penna mun-ah zong Topa om hi. Tomcing in genleng hun khempeuh leh mun khempeuh pen Topa sungah om ahih manin Topa pen mun khempeuh leh hun khempeuh ah a om dan hongsuak hi.
Topa in vantung pan hong etsuk ciangin mawhnei mite’ lam khialhna, i manthanna, i kisiatna hongmu hi. Mihingte in tua mawhna sungpan ei leh ei kigumkhia zolo i hihna hong thei a, i mawhna tawh a hehna sangin hong itna lianzaw ahihna tawh ama Tapa khat bek a neihsun eite’ adingin hong piakhia hi. Tua pen Jesuh in hi bangin hong pulakkhia hi:
“Pasian in leitung mite hong it mahmah ahih manin ama Tapa a um khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi (Johan 3: 16).”
Topa’ hong itna pen i mawhna sangin tehzawh lohin lianzaw den hi. I mawhna in Topa’ hong itna zozo lo hi. Bangzah in mawhnei mi i hih hangin Topa in eite hong nusia zo lo, hong mangngilh zo lo, hong paai khia zo loin lawm leh ta dinmun-ah hong koihkik zah dongin hong it mahmah hi. Ama bawlsa eite tawntung nuntakna i ngah kim ding hong deih hi. Tua adingin a Tapa neihsun nangawn hong it siit het loin hong piakhia hi. Hih leitungah kuama neih zawh loh piakkhiatna lianbel Topa in eite tungah hong piakhia hi. Hih in leitung leh vantung-ah a om ngei nawn lo ding a lamdang pen itna, a lamdang pen piakkhiatna, a lamdang pen deihsakna, a lamdang pen nasep khiatna ahi hi. Tu-in eite in hih thu don loin om ding kilawm i hiam? Kilawm lo hi. Sanloh phamawh thu-in ngaihsun in sang thei leng hoih pen hi.
Tawntung nuntakna ngah dingte kiciangtanna omlo hi. Mihaute in zong Pasian Tapa um leh nuntakna ngah ding uh hi. Mizawngte in zong a up uh leh nuntakna ngah ding hi. Pasian sungah minam kideidanna omlo hi. Mun leh za kizui-in mun kipiakna om lo hi. A umte bek-in ngah ding cih thu bek om hi. Daipaam mite ahi zongin, mi ginalote ahi zongin, mi gilote ahi zongin, mi zawngkhalte ahi zongin, nenniamna a thuakte ahi zongin Pasian Tapa Jesuh Khrih a um peuh tawntung nuntakna ngah ding hi. Tua pen amanpha mahmah Pasian hehpihna ahi hi. Eite in zong tua hehpihna ngahsawm ding hihang. Jesuh Khrih pen tua hehpihna hi. Jesuh Khrih mahmah in eite kiangah hongpai ngiat in tua hehpihna hong hawmkhia hi. Eite in hih thu kimuh loh bawlin kibu nawn kei ni. Thusim loin om nawn kei ni. Ei leh ei kiniamseek kei ni. Ei leh ei kipampaih kei ni. Ei bang mite adingin Jesuh hong pai hizaw hi ci-in Jesuh mahmah in a kam ngiat tawh pulakkhin hi.
“… Midangte’ na a sem ding leh mi tampi a tatkhiat na ding ama nuntakna a pia dingin a hong pai ahi zaw hi (Mk. 10: 45).” “Kei ka hih leh tuute a nungta maimai bek hilo in nuntakna cingtaak a neih theih nadingun a hong pai ka hi hi (Jn. 10:10).”
A Pa’ sawlna a Tapa Jesuh in mangin mawhnei eite hong tankhia dingin hong pai hi. Jesuh leitungah hong pai mawkmawk, hong hawh mawkmawk hi lo hi. Eite nuntakna cingtaak hong pia dingin a hong pai hizaw hi. Hih mun-ah Jesuh ‘a hong pai hi’ cih kammal pen thupi mahmah hi. Banghang cih leh hih kammal in Jesuh leitungah mission a sepna hong lak kammal ahih man hi. B. B. Warfied genna bang hi leh Jesuh kammalte ahi ‘a hong pai,’ ‘hong kisawl’ cih kammalte in ama Pasian mission nasepna hong lak bek tham loin ama vantung hihna bulpi (heavenly origin) hong lakna zong hi na ci hi. A. Seeberg genna bang hi leh ‘Jesuh hong pai’ cihna-ah amah pen hih leitungah hong kilang mawkmawk hi loin hih leitungah eite hong gum dingin honglut ngiatna ahi hi, na ci hi.[6]
Hi mah hi. Jesuh Khrih hih leitungah hong hawh mawkmawk, hong kilang mawkmawk hi loin mawhnei eite ading na a sem dingin hih leitung sungah si le sa leh lim leh mel tawh honglut ngiat ahi hi.
Tuni tuhun laitak in zong eite tawh hong om khawm hi. Jesuh vantung panin ‘hong pai khia’ in leitung sungah ‘hong lut’ hi. Ama ‘hong pai khiat’ na-ah Pasian Ta ahihna nusia tuanlo a, zong bei tuanlo hi (Kol. 1: 15; Heb. 4: 14; 1 Jn. 2: 23; Jn. 6: 38-40; 3: 13). Amah leitungah mi bangin hong piangkhia in a nuntak lai-in zong a Pasian hihna mang tuan lo-a, Judah mite’ ngeina bangin Judah mite lak-ah hong khangkhia in ama nasep hong semkhia hi. Ama sihna hangin a um mi khempeuh in tatkhiatna, gupna ngah nading ahi hi (Mk. 10: 45; Matt. 20: 28).
Jesuh in eite a mangthang dingin hong deih lo hi. I omna panin ama sapna aw za-in ama kiangah i zuatkik ding hong deih hi. Peter leh Andru bangin Jesuh’ sapna dawng pahin zuihpah ding kisam hi. Siahdongpa Matthai mah bangin Jesuh sapna aw za-in ama nung i zuihpah ding thupi hi. Jesuh in hong zonzon laitak in ama kiangah ciahkik ni. Ama hong sap laitak dawngpah ni. Hihte i thusim kei leh i kha nuntakna bek tham lo-in i leitung nuntakna adingin zong pahtauh huai mahmah ding hi.
Jesuh in ‘Ka sap mi a tam hangin ka teel mi a tawm hi (Matt. 20: 16)’ ci hi. Ama teel mite lak-ah i kihel zo diam? Jesuh in eite ama teel mite lak-ah hong kihelsak nuam ding hi. Thu-um mawkmawk sangin a cingtaak thu-ummi hong hisak nuam hi. Khristian mawkmawk hi loin Khristian taktak i hih ding hong deih hi.
Tu-in eite in zong i nuntakna sungah, i nasepna ah, i gamtat luhekna ah, i thungaihsutna ah, a mangthang den i hi kha hiam? Midangte in hong mangthangsak hiam? ahih kei leh ei leh ei a kimangthangsak i hizaw hiam? Bangbang in leh banghang in i mangthang zongin Jesuh in eite hong zong den hi cih i phawkden ding kisam hi. Ama mai-ah kuamah kibu thei, kisel thei, kineih thei lo hi. Ei leh ei kineihtawm nawn kei ni. Ama kiangah ciahta ni. I pianziate hangin kuamah kisuang kei ni. Banghang hiam cih leh eite ading ngiat in Jesuh vantung pan ‘hong pai suk’ in eite sungah ‘hong lut’ ahi hi. Sum mansuah numeinu in a sumtang a muh mateng a zon bangin Jesuh in zong hong zon laitak in, tuumang bangin mang sawm den kei inla, tapa mangthang bangin i mangthangna mun pan i Pa kiangah ciahkik ta ni.
“Pasian mai-ah seelcip theih ding bangmah omlo hi. Eite khempeuh i dinna ding Pa’ mai-ah a kipiangsak na khempeuh a kiliah a ki-im thei omlo in kimu sinsen hi (Heb. 4: 13).”
Hebru laigelhpa’ hong hilh bangin Pasian mai-ah kisel theihna bangmah omlo hi. I pianzia khempeuh, i hihna khempeuh, i lungsim i ngaihsutna puakzia khempeuh leh i zia khempeuh Topa in hong tel sitset hi. Tua bang pi mahin eite hongsang nuamzaw ahi hi. Tua ahih manin ama mai-ah bangmah i kineih theihloh veve ama kiangah kiniamkhiat takin ciahin belh ding hoihzaw lo ding ahiam? Pasian in eite ama kiangah i pai ding hong deih mahmah hi. Amah in eite:
~ Hong sam ngiat hi: Tua ahih manin ama sap mite a sehsa hi a, a sap mite amah tawh a kipawlin bawl a, amah tawh a kipawlin a bawl mite ama minthanna zong a hawm hi (Rom 8:30).
~ Mi thak hong hi sak hi: Tua ahih manin mi khat peuh, Khrih tawh a kipawl ciangin mi thak suak a, a mi lui ngeina bei-in a mi thak ngeina a neita ahi hi (2 Kor. 5:17).
~ Khrih sungah hong kai hi: Kei hong sawl Pa in a kaih loh mite ka kiangah hong pai thei lo ding a, ka kiangah hong pai mite nitawp ni ciangin ka hingsak ding hi (Johan 6:44).
~ A Tapa hong pia hi: Ka Pa in kei tungah a hong piak mi peuhmah ka kiangah hong pai ding a, ka kiangah a hong pai mi peuhmah ka hawlkhia kei ding hi (Johan 6:37).
~ I lungsim hong honsak hi: Tua nu pen Pasian a bia numei khat hi a, Paul thugente a sang thei dingin Pasian in a lungsim a honsak hi (Sawl. 16:14).
~ I lungsim hong vaksak hi: Khuamial sung panin khuavak taang hen, a ci Pasian mah in Jesuh maitang a taangsak Pasian vangliatna thu theih nading khuavak ka ngah theih nadingun kote lungsim sungah khuavak hong taangsak hi (2 Kor. 4:6).
~ I lungtang hong puahphasak hi: Note sungah lungtang thak leh lungsim thak kong guan ding a, na suang lungtang uh hong lakkhiatsakin mihing lungtang kong guan ding hi (Eze. 36:26).
~ Nuntakna hong pia hi: I mawhna hangin kha thu tawh kisai-in misi ihih laitakin Khrih tawh eite hong nungtasak hi (Efe. 2:5).
~ Ama innkuan hong suaksak hi: Note tungah Pasian in a hong piak a Kha Siangtho in note na lau nadingun sila-in a hong bawl hi lo a, Kha Siangtho in Pasian tate a hong suaksak ahi zaw hi. Tua Kha Siangtho mah in Pasian pen, Pa aw, Pa aw, hong ci theisak hi (Rom 8:15).
Eite hong zong dingin Jesuh hong paina leh Pasian in eite amah sungah i lut nadingin hong kaihnate teelsiam in ama kiangah ki-ap ding ahi hi. A mangthang eite adingin Jesuh hih leitung sungah a beisa kum tampi lai-in hong paikhin hi. Jesuh hong paina a hang leh ama hong sepsak nate ensuak lai ding hihang.
Ei leh ei kipampaih nawn kei ni. Ei leh ei kineuseek nawn kei ni. I mawhna bekbek suang nawn kei ni. Ei leh ei kimangthangsak nawn kei ni. I hihna khempeuh Jesuh in hong thei sitset hi. Eite nuntakna hongpia dingin Jesuh hong pai hi ci hi. Hallelujah!
