Tuhun Tapidawte’ Nuntakzia A Huampi
Agelh~Kap Za Khai(Photoh)
Tuhun tapidaw nuntak kalsuanzia pen Pasian thugen minthangte leh hunkhen upna neite genna bang hileh ‘Pawlpi Hun leh Hehpihna hun’ hi a, Topa Jesuh hong paikik ding Ni Tawpi ni ngakngak hun zong ahi hi. Hehpihna hun ahih zahin Pasian thugen khempeuh in, a lian mahmah Pasian hehpihna leh gupna thu bekmah kilim gen pen ta a, mihing sep leh thalawh kul loin upna bek tawh hehpihna hangin gupna cih pen a lungdamhuai penpen thu ahi hi. Upna bek mah tapidaw suak nadingin a thupipen zungpi hong suak taleh tua upna koici bang upna hiam cih a kanto mi pawlkhat a omte hangin a tamzaw in kanbeh loin um ziau cih bek tawh khawlcip uh hi. Tua manin Tapidaw hihna ah khantohna, picinna, kha nuntakna, lawhcin cihte kimu mello hi. Adiakdiak in tuhun tapidaw nuntakzia pen Jesuh bek um ziau dingin i gamtat ngeina tengmah semsem lel ding, nusiat nei lo ding, kikhelna nei tuan lo ding, i ut peuhpeuh semsem lel ding cihdan hi. I nuntakna sung pan midangte in tapidaw i hih leh i hihloh hong khentel theih nawn loh hun, gamtatna tawh mi hoih mi pha kitheih zawh loh hun hita a, tapidaw lote’n saseh tawi khat cikal 80 pha sak leh tapidawte’n zong pha sak lel, Pasian um lote’n guihtheih khamtheih a zat uh zong tapidawte’n zong zang ziahziah lel uh hi. Upna leh nuntakna kikhen pen tuhun tapidawte hi a, Jesuh nungzuite leh pawlpi masate’n hih thu tegel na khen lo uh hi.
2. Pianthakna
Piangthak cih thu kigenzia tampi om dinga, a baih penin gen lehang Jesuh hong sepsaksa lungdamna thu umin Jesuh’ nungzuihna ahi hi. A kicianzaw in behlah leng Paul in ‘Tua ahih manin mi khatpeuh, Khrih tawh a kipawl ciangin mi thak suak a, a milui ngeina bei-in a mi thak ngeina a neita ahi hi (2 Kor. 5:17),’ a cih ciangin mi khat in Jesuh umin aihkeh Jesuh tawh a kizop ciangin Pasian vangliatna tawh tua mi sungah kha thu tawh kisai-in thak suahna, kikhelna leh kilamdanna hong piang semsem a, a milui hihna teng a bei pah ahih loh hangin, a nini in a sungpan a pua lamah hong kikhelkhel cihna ahi hi. A limlim pianthakna cih pen ‘to’ kikhelna, thu-up kikhelna, nuntakzia kikhelna hi.
Satan to neihna pan Jesuh To neihna ah, leitung thu-upna pan Pasian thu bek upna ah, milui nuntakna pan a piangthak mi thak nuntakna ah kikhelna ahi hi. Tua manin pianthakna cih limlim in kilamdanna leh kikhelna hong kal kammal hi a, tua kammal sungah kikhel tohtohna leh nuntak gamtangna om hi. Piangthak pah phet in nuntakna sung le pua kikhel pah zangzang, kilamdang pah zangzang cih zong hi tuan loin tua kikhelna pen sunglam panin a pua ah damdam in kikhel semsem ahihna kilang hi. Tua manin Jesuh umin i nuntakna luite Kha Siangtho vangliatna tawh nusiat zawh ding hanciam in Khrih’ picinna dong i tunzawh nadingin sianthona, cihtakna, upna, lametna, itna, Kha Siangtho gahte gahkhiasak in a thu nungta sin tentanna tawh Pasian’ deihna bangin kalsuanna pen pianthakna ahi hi.
A piangthak mi khat pen a piangthak lo tapidawte tawh hong kibang nawnlo limlim hi. A lamdangna tampi lakpan tawm en pak le’ng:
Piangthak mi pen Jesuh Sunga mi thak hita hi: Mi thak cih pen alui nuntak pan nungkik in Jesuh nung a zui, mawhna pan kisikkikin Jesuh um ahih manin Jesuh sisan in a thak suahsak mi ahi hi. Hih mi thakin a mi lui ngeina peuhmah ah nungkik ngei lo dinga, Jesuh sungah bekmah nungta den ding hi (2 Kor. 5:17; Efe. 4:22-24).
Piangthak mi pen Kha Siangtho teenna hita hi: Paul in piangthak mite pen Pasian’ biakinn leh a sungah Kha Siangtho teeng ci hi. Tua manin piangthak sa mi khat pen a pumpi taksa limlim amah tawh kisai nawn loin Pasian’ a hita hi (1 Kor. 3:16; 6:19). Mi khat sungah Kha siangtho a ten’ keileh tua mi pen Pasian’ a ahi kei hi (Rom 8:9).
Pianghtak mi pen mi siangtho hita hi: Jesuh a upna hangin ama sungah Kha Siangtho vangliatna tawh mi siangtho hihna thupha ngah hi (2 Kor. 5:17; Rom. 8:2, 10). Martin Luther in, “Saints are justified sinners…mi siangtho cih pen a kidiktansak mawhnei mite hi,” na ci a, mi siangtho hita ahih manin a siangtho lo gamtatna leh nekna dawnna peuhmah tawh kisawh nuam lo semsem dinga, a nuntakna vang hong nei semsem ding hi.
Piangthak mi pen tatna man a kipiaksa hita hi: Hotkhiatna kingah ma-in mihingte pen mawhna sila ihi khin a, tu-in ahihleh Khrih’ sisan tawh hong kitankhin hi (1Pet. 1:18-19). Mawhna sila hihna panin tatman pia in hong kilei khin a, Pasian’ innkuan sungah hong kitunpihkhin hi.
Piangthak mi pen mawhna khempeuh maisakna a ngahkhin hita hi: Mawhna khempeuh hong kimaisak pen a thupi mahmah thu hi. ‘Eite in, ama hehpihna ii hauhna tawh tawh kizui-in ama sisan tungtawnin tatkhiatna leh mawhmaisak i ngah hi (Efe. 1:7).’ Pasian in i ‘khialhna khempeuh hong maisak’ cihna hi (Kol. 2:13). I mawhnate hong kilakkhiatsak in nisuahna leh nitumna kigamlat tawh kibangin (Late 103:12), tuipi thukna ah kiphumcip hi (Micah 7:19).
Piangthak mi pen diktansakna a ngah hita hi: Rom 5:1 sungah, eite in ‘upna tawh hong kidiksak’ ci-in kigelh a, tang 9 na ah ‘ama sisan tawh hong kidiksak’ hi na ci hi. Diktangsak cih ciangin, ‘a dik hi’ ci-a kipulaak in Pasian tawh kilemna ahi hi. Hotkhiatna ngah mi in pianken mawhna nei lai mimawh mah hi lai a, tua bang pipi mahin Jesuh Khrih dikna ama kipia ahih manin Pasian in midik hi ci-in a pulak ahi hi. Pasian in ama mai-ah tua mi’ dinmun a et ciangin Jesuh Khrih sisan in ama mawhna thaman piaksak khin ahih manin Jesuh Khrih dikna bek mu hi. Tua manin Pasian in a dik leh Jesuh a umte a diksak pa ahi hi (Rom 3:26).
Piangthak mi pen Khrih’ sungah nuntakkikna a ngah hita hi: Jesuh in Nicodenmus kiangah, mi khat in a pianthak keileh vantung gam a mu thei kei ding hi (Jn 3:3) ci hi. Peter in ‘eite in Pasian kammal tawh i piangthak hi’ na ci hi (1 Pet. 1:23). Mi khat a pianthak ciangin Pasian Kha Siangtho pan-a piang hi a, nuntakna thak kipanin khalam nuntakna a kipan hi. Tua pen “nuntak kikna” kici hi. Khrih a um-mi in ama lungtang sungah Pasian’ nasepna khat ngah a, tua in Khrih sunga bawlthakna ahi hi (2 Kor. 5:17).
Piangthak mi pen tawntung nuntakna a ngah mi hita hi: Jesuh a um khempeuh in kisia loin nuntak tawntungna ngah uh hi (Jn. 3:16). Johan in ‘Pasian in eite nuntak tawntungna hong pia a, tua nuntakna pen a Tapa sungah om hi’ ci hi. Mi khat in Jesuh a up ciangin Khrih neih nuntak tawntungna neipa/nu suak hi (1 Jn. 5:11- 12). Tua thupha hangin i pumpi a si zongin i nungta tawntung ta ding ihi hi.
Hih a tunga Piangthak mi khat ii pianziate i et ciangin Piangthak mi khat pen mi mawkmawk ahih nawn lohna, mi maimai ahih nawn lohna, Pasian sungah dinmun thupi mahmah a nei ahihna, siangtak in kimu thei hi. Tua manin a piangthakte in leitung ngeina leh milui ngeina zuizui nawn lo dinga a piangthak dinmun tawh kizui-in nungta ding cih pelmawh ahi hi.
