EITE ZONG SIMON PETER MAH BANG HI - III
Agelh~Kap Za Khai (Photoh)
Eite in Khrih kiangah i painuam kei a, amah i pomnuam kei hi (Johan 6:44, 65; 1 Kor. 12:3). Paul in 1 Kor. 12:3 sungah “Kha Siangtho in lam a lakte bek in Jesuh pen Topa hi,” ci thei ding na ci hi. Eite pen mawhneite kihi in Kha Siangtho deihlote kihi sawnsawn lai ihih manin Jesuh tawh kigamla semsem hi. Kha Siangtho tawh a suakte bekmah Pasian mu ding uh hi. Johan 6 sungah “Pa in a kaih mite bek amah kiangah tung ding hi,” ci hi. Hih Pasian “kaihna” in mite Jesuh tawh kizom sak a, tua pen nuntakna thak kici hi. Tua pen eite in pianthakna bek tawh kingah thei hi. I pianthak masiah nuntakna thak kingah thei lo dinga, Jesuh tawh kigamla semsem in siatna sungah i pukcip ding hi.
Eite pen mawhna salte ihi hi (Rom 6:17). Paul in “Ni dangin silate bangin mawhna thu a mang hi napi-in,” ci ahih manin eite pen ni dangin mawhna salte ihihna hong phawksak hi. Topa in hong tatkhiat khit hangin amah i up nai kei leh mawhna sal mah ihi veve ding hi. Topa’ deihna i nial laiteng, Topa i langbawl lai teng, mawhna sungah nuam i sak laiteng eite pen mawhna sal ihi hi. Ahi zongin lungdamna thu a umte ahih leh mawhna sungpan suakta ding ahih manin lungdam ding ahi hi.
Eite pen Satan’ salte ih hi (Efe. 2:1-2; 2 Tim. 2:24-26). Efesa 2:1-2 sungah, “Huihlak ukte thu mang,” hong ci hi. Huih lak ukte cih pen Satan leh kha niinte ahih manin amaute’ thu mang cih ciangin zong eite pen amau sal ihihna hi pah hi. 2 Tim. 2:24 sungah, “Topa na a sem mite, kitot a hatte hi lo ding a, mi khempeuh tungah lungsim nemin, thugen siamin, thuakzawhna nei-in, thunem tawh a langte hoih lohna a puah theite hi ding hi,” ci ahih manin hih tawh a kileh bulhte pen Satan’ nasemte cihna hi pah hi.
Eite sungah na hoih om thei lo hi (Rom 7:18). Matthai 22:37 sungah Jesuh in eite kiangah “Pasian pen i lungsim leh i nuntakna khempeuh tawh it ding,” thu hong hilh hi. Ahi zongin eite in Pasian it loin na dangdangte i itzaw den hi. Hih in i sungah nahoih a omlohna kilatkhiatna ahi hi. Tua bek tham loin gamtat luhekna khempeuh ah ettehtaak nading leh Pasian minthan nadingin nuntak nading thute zong hong kihilhhilh napi-in i zuizo kei hi. Tua pen banghang hiam cih leh Paul amah leh amah a kigen bangin eite sungah zong nahoih khat beek a om theih lohman ahi hi. I sunga om mawhna hangin i sungah na hoih na pha om thei lo hi.
Tua bang vive ihih manin, Topa aw…ko mihingte pen nang adingin kilawm ka hi uh hiam? Nong it tham dingin ko bangmah hi kei ung. A it huailo ka zia ka tong uh na theihsa ahi hi. Late gelhpa’ cih mah bangin, ‘Na ngaihsut tham dingin mihing bang hi lel a, na phawk tham dingin mihing’ ta bang hi lel ahi hiam? (Late 8:4).’ Topa aw…kote pen nong bawlsa mah ka hi uh a, nang hong langpang-te zong ka hisawn lai uh a, banghangin kote hong it veve lai na hi hiam? Ko bang mi mawkmawk te hong vatmai nuam peuh lecin a mangthang ziau ding hi napi-in tuni dong na angsungah nong pomcipna banghang hiam, Topa aw?
Topa’ zia leh tong i theizo kei hi. I mawhna lian hi. Mawhna tampi i nei hi. Simon Peter bangin Pasian mai-ah a kun dingin zong i kilawm kei hi. Peter bangin i kiang panin Topa a paikhiat ding i thum hi. A siangtho Topa, Nangmah in a siangtho lo mawhnei kote tawh kilawm ding ahi hiam? Tua ahih manin ‘ka kiang panun paikhia in Topa aw.’
“Tua ahih ciangin ei a hong gimsakte kiang panin Pasian in a hong hotkhiat lohna a hang i thei hi. Eite in a nuam ding i lamen a, ahi zongin lungzinna bekbek i tuak hi. Mittaw bangin kawm i zawt a, mit nei lote bangin i mai hi. Suntang laipi mahin khuamial lak bangin i tuk a, a hat mite lakah misi tawh i kibang hi. Eite khempeuh vompi bangin i humham a, vakhu bangin i thumthum hi. Eite in thutang i zong a, ahi zongin khat zong i mu kei hi. Hong hotkhiat ding i ngen a, ahi zongin bangmah hong piang lo hi. Bang hang hiam cih leh nangma tungah kote’ thupalsatna tampi tak pha a, ka mawhnate un kote’ langah teci hong pang hi. Kote’ thupalsatnate, ka mawhnate uh ka thei uh hi. Nangmah hong lehdo-in nang kong nial uh a, na thu kong zui kei uh hi. Midangte nengniamin nang kong lehdo uh hi. Ka ngaihsutnate uh khial a, ka thugente uh zuauthu vive ahi hi. Thutang ki hawlkhia a, thuman in hong naih thei lo hi. Mihonpite’ kikhopna munah thuman kizang lo a, thutang tum thei lo hi. Thuman om lo lua ahih manin siatna a pelh mipa pen mihai-in kingaihsun zawsop hi (Isa. 59:9-15).”
Mawhnei mi vive ihih leh hih munah mawhna thu tawh kisai in tawm ensuak lai ding hi hang. Mawhna i cih in bang ahiam? Mawhna tawh kisai in Lai Siangtho sungah tampi kimu thei hi. Pawlkhatte en leng;
Mawhna cih pen Pasian’ Thukham palsatna: Mawhna i cih pen thukham palsatna ahih manin a mawh mi khempeuh thukham palsat ahi uh hi (1 Jn. 3:4). Pasian in ‘sem kei in, hih kei in,’ cih hong kham thute man lohna, palsatna pen mawhna ahi hi. Eden huan sungah Pasian in Adam le Eve tungah singgah ne kei in, ci-in kham a, ahi zongin Adam le Eve in Pasian’ thu mang loin singgah ne uh hi. Pasian’ thukham le khamna kammal thei gige pi-in palsatna hangin mawhna hong piangkhia ahi hi. Tua ahih manin Pasian’ thukham le a kammalte man lohna, palsatna khempeuh pen mawhsakna panin mawhna hong piangkhia ahi hi.
Thuman’ lohna: Pasian in ‘ne kei in’ ci-in a kham thu khat Adam le Eve in mang loin Pasian’ khamsa singgah a nekna uh hangin leitungah mawhna hong lut hi, ci-in Piancil (3) sungah hong hilh hi. Pasian’ thu manlohna pen mawhna hi. Lungdamna thu zaknop lohna, theihnop lohna, lungdamna thu nialna, Kha Siangtho nialna cihte zong mawhna hong suak ahi hi. Tua bek tham loin Lai Siangtho nialna, Lai Siangtho hilhna man lohnate zong mawhna mah hong suak lailai hi.
Pasian’ zia tawh a kilehbulh khempeuh mawhna: 1 Johan 5:17a sungah, ‘A dik lohna khempeuh/ Gamtat khialhna khempeuh mawhna ahi hi,’ na ci ahih manin a dik lo-a gamtatna khempeuh pen a siangtho Pasian’ zia tawh kilehbulh ahih manin tua zong mawhna mah ahi hi (Rom. 1:8).
A sephuaite seplohna: Jame 4:17 sungah, ‘Gamtatna hoih thei napi-in a gamta lo mi tungah mawhna a om hi*,’ ci ahih manin thuhoih thupha thei pipi-in seplohna peuhpeuh pen mawhna hi a cihna hi. Adam le Eve in singgah nekloh ding cih thuhoih thei pipi-in ne uh a, thei napi-in a seplohna hangin mawhna a ngah ahi hi. Tuhun ah zong thu-ummite in Pasian’ deihna bangin nuntakna ding, gamtat ding, lungdamna thu teci pang ding, khat le khat kihuh ding, cih bangin thuhoih thupha tampi thei napi-in i sep kei leh Pasian’ mawhsakna a ngah ding ihi hi.
Pasian uplohna: Johan 16:9 sungah Jesuh in Kha Siangtho nasepna tawh kisai a genna ah, ‘Amau in kei hong um lo uh ahih ciangin, a mawhna uh a pulak ding hi,’ a ci hi. Jesuh Khrih in a nuntakna ngiat tawh Pasian’ zia le tong khempeuh, ama itna le hehpihna khempeuh hong pulakkhin bek tham loin Kha Siangtho in zong mihingte sungah na hong sem den napi-in Pasian’ thu i up theih tuan kei leh Kha Siangtho in i mawhna hong pulak dinga, Pasian mai-ah mawhnei mi ihi ding hi. Hong sawlpa Pa Pasian, hong tankhia pa Jesuh Khrih le tuni dongin hong ompih tawntung Kha Siangtho-te i up theih kei leh tua zong mawhna ahihna kimu thei hi (Rom. 3:3; Heb. 3:12).
Kha Siangtho langpangna: Matt. 12:31-32 sungah, ‘Mihingte’ kampau khialhna le gamtat khialhnate kimaisak thei ding a, ahi zongin Kha Siangtho langpangin a gensiate kimaisak lo ding hi. Mihing Tapa langpangin a gensiate a mawhna uh kimaisak thei ding a, ahi zongin Kha Siangtho langpangin a gensiate pen tuhun a kipan a tawntungin a mawhna uh kimaisak lo ding hi,’ ci-in Jesuh mahmah in leitung le vantungah a kimaisak zo lo ding mawhna khat a omna hong pulakkhia hi. Hih pen ei adingin a lauhuai mahmah mawhna ahihna phawk huai hi. Thu-ummite sungah Pasian in Kha Siangtho hong pia hi a, ei mahmah Kha Siangtho teenna mun ihi a, i sunga om Pasian Kha Siangtho langpan loh ding, ama deihloh sep loh ding, ama sawlna le deihna bangin nuntak ding pen a thupi penpen ahi hi. A diakdiak in gupna ngahsa mite peuhmah in ‘gupna ngah khin ka hih manin ka ut bangbangin ka gamta zongin ka gupna kitan thei kei,’ cih tawh i nuntakna mawktat ding hi lo a, tua bangin i gamtat leh i sunga Pasian Kha Siangtho a langpang i hi kha dinga, tua mawhna pen tuhun bek tham loin vantung dongah a kimaisak thei lo mawhna hong suak ding hi. Tua ahih manin Kha Siangtho langpanna le amah gensiatna pen leitung le vantungah a lianpen mawhna ahihna phawk ciat ni.
Angsung bek khualna: Angsung bek theihna ahi kei leh huaihamna zong mawhna mah ahi hi. Hih thu in Pasian’ thupiakna tawh a kilehbulh ahi midangte khual ding awlmawh lohna, ama lunggulhna le ama nopsak nading bek ngaihsutna ahi hi. Tua in Pasian le ama thukhamte nialin mite tungah siatna piangsak hi. Mawhna in Pasian le ama kammal zuih ding nialna (Rom. 1:18-25; 8:7) ahi hi. Pasian nial in ama ading bek ngaihsutna, ama nopsak nading, nuntakna ding bek khualna khempeuh pen mawhna ahi hi.
Thusim lohna: Pasian’ thukham le ama kammalte Adam le Eve in thei, za, tel napi-in thusim lo uh ahih manin Pasian’ thu sangin Satan’ thu na manzawkna tawh kizui-in mawhna hong piangkhia ahi hi. Pasian thusim lohna, Jesuh Khrih’ tatkhiatna le a thu thusim lohna, Kha Siangtho thusim lohna cihte pen a lauhaui mahmah tuhun mawhna vive ahi hi. Hihte i thusim kei leh i nuntakna Hell sungah tung ding hi. A thusimte ahih leh tawntung nuntakna ngah ding hi.
Kiphatsakna: Kipatsakna hangin vantungmi makaipi Lucifer a dinmun pan kilawnkhia in Satan hong suak ahi hi (Isa. 14, Ezekiel 28). Kipatsakna lungsim pen Pasian’ muhdah penpen mawhna ahihna Lai Siangtho sungah siangtakin kimu thei hi (Thuhilh. 8:14; 2 Kum. 14:10; 2 Khang. 25:19; 26:16; 32:25; Late 40:4; 94:2; 123:4; Pau. 15:25; 16:5; 12 16:19; 21:4; 21:24; Isa. 2:11; 2:12; 5:15; Jer. 48:29; Den. 5:20; Hosea 13:6; Hab. 2:4; Zeph. 3:11; Luka 1:51; Jam. 4:6; 1 Pet. 5:5).
