EITE ZONG SIMON PETER MAH BANG HI
Agelh~Kap Za Khai (Photoh)
‘Topa aw, kei mawhnei mi ka hih manin
ka kiang panin paikhia in.’
Luka 5: 8
Eiteng khempeuh zong Simon Peter mah bangin mawhnei mi vive ihi hi. Topa tawh i kitheih khak ding bang kilawm kisa loin a kibubu-te ihi hi. Tua ahih manin Simon Peter mah bangin eite in zong Topa kiangah, ‘Topa aw, kei mawhnei mi ka hih manin ka kiang panin paikhia in,’ kici kha zel hi. Ahi zongin Topa hoih mahmah hi. Tua bangin Topa i hawlkhiat den hangin amah in ei hong hawlkhia ngeilo bek tham lo-in a khe phung-ah tawldamna a nei dingin hongsam behlai tazen hi. Mawhnei eite lellel in a siangtho Topa kiangah i pai ngam ding hiam? I kilawm mah ding hiam?
Late gelhpa in hih bangin na tau ngei hi. ‘A khialsa mahin kei ka suak a, ka nu in a gil sungah hong paii tunga kipan a mawhsa ka hi hi (Late 51: 5).’ Late gelhpa in amah leh amah mawhnei kisa lua ahihna a phawkna tawh a gelhkhiat ahih hangin tuni eite adingin zong aman mahmah kammal ahi hi. Eite zong i nu’ gil sung panin mawhnei sa-in a suakte ihi hi. I bawltawm ahi het lo, i nu’ sung pan i luahsuk mawhna hangin eite in zong mawhnei mi tampi lakah mawhnei mi ihi a, tua hangin Pasian mai-ah i kipholak ding kisuang mahmah hi. I mawhna hangin i thanem den a, i lungkia in lamet bei in i om den hi. Banghang hiam cih leh Lai Siangtho in “Mawhna thaman in sihna hi (Rom. 6: 23),” a cih man hi.
I pumpi, i taksa bek a si ding hi leh phamawh sa lo hi hang. Phamaih zong sa lo hi hang. Ahi zongin i kha a sih ding lauhuai kisa zaw in zong kipatau zaw mahmah hi. Pasian kammal ahi “Mi khat peuh in hih leitung khempeuh a ngah hangin a nuntakna bulpi[1] suplawh 1 Zolai Siangtho sungah “nuntakna bulpi” ci-in kilet a, Rev. A. Judson’ let-khiat Kawllai Siangtho in “kha nuntakna” ci-in gelh hi. Greek in psuché̄s ci-in kigelh a, mihing leitung nuntakna (Matt. 6.25; Sawl. 20.24; Rom. 11.3, Sawl. 20.10; Mang.8.9) le a kimu thei lo mihing kha nuntakna (Lk. 12:20; Sawl. 20:10; Septuagint: Pian..35:18; 1 Kum. 17:21) genna in kizang kawikawi ahi hi. 2leh bang phattuamna om ahi hiam? A nuntakna bang tawh leikik thei nawn ding ahi hiam? (Matt. 16: 26),” cih in bangzah in lauhuai ahi hiam? Hi bang i hih khak ding lauhuai mahmah hi. I neihsa khempeuh leh i pumpi khempeuh i tanlawh sangin i kha nuntakna i tanlawh khak ding lauhuai zaw hi. Hih leitungah Khrih hong piaksa kha nuntakna sangin a manpha bel bang om lai ding ahi hiam?
Eite leh i Topa hong kigamlasak pen bang ahi hiam? Lai Siangtho in tua pen mihingte’ mawhna hi ci hi. Pasian leh mihing kikal-ah kikhenna guam hong piangsak pen tua mawhna hi. Tawntung nuntakna hong tansak thei pen i mawhna hi. I Topa’ maipha hong musak lo pen tua mawhna hi. I nuntakna i lungngaih kik ciangin bangmah hi i kisa thei kei hi. Mi mawkmawk hi lel hang. Leitung pilna leh siamna, hauhna leh minthanna, pahtawina leh vangneihnate i neih zihziah hangin tuate in i pumpi nopsak nading ciangbek hong huam bek a, i sih khit nung ading bangmah lungmuanna hong pia zo lo hi. Tua i neihnate in i mit hong tawsak zawsop uh hi. Kha thu tawh kisai in thuman thutak hong musak thei lo uh hi. Leitung hauhna leh nopsaknate in mihingte’ lungsim leh khamit hong mialsak, hong tawsak thei mawk hi. Tua ahih manin i neih leh lamte in i sih nading leh Hell sung i tun nading ahih khak ding patauh huai mahmah zaw hi. Lampi I tel khialhna, a thupizaw i theihkhialhna hangin eite a kisia gawp dingi hita hi. Tua bang theih khialhna, muh khialhna leh neihkhialhna a bulpi pen i sunga om mawhna hang ahi hi.
Eite khempeuh mawhnei mi vive ihi hi. Topa in nisim I nuntakna-ah thupha hong pia den in, lam hong lak den napi-in eite in amah i langbawl den lai hi. Amah tawh kigamlatna ah i taiden lai a, ama liim nuai sangin Satan liimnuai-ah nuam i sa den zawsop hi. Tua bang i hih ciangin Topa bangzah in dah in khasia ding ahiam cih zong i lungngai ngei kei hi. Topa’ lungduaina pen a sia lamin i zang den a, ama thuphate zong a min dai nadingin i zang den hi. Ahi zongin Topa in i mawhnate maitai takin hong maisak niloh tazen hi. Eite khempeuh mawhnei mi vive ihi hi. Miteng i haza niloh hi. Mi khat peuh mu in amah i haza pongmawk thei hi. Khat veivei a thu om ta leh omta kei leh miteng peuh i tanghuat thei lailai hi. I lungsim pen a poi mahmah na hi zen hi. Ahi zongin ei leh ei zong kiteel zolo hi hang. A hun simin ei’ ngah ding bekbek, ei ading bekbek i ngaihsun niloh hi. Midang khat peuh ii hamphatna a ngah dingte i khaktansak zel a, tua hamphatna pen eite in i ngah thei kei zongin i beh i phungte in a ngah nadingin i geelsak hi.
Leitungah ‘kei’ ading’ cih bekbek I thupisak den hi. Biakinn ah i kikhop ding sangin kikhop hun laitak sum thalawh ding i ut zaw hi. Kikhawm mah lezong Pasian thu sungah lunglut loin ‘i ngah ding’ bekbek i lungsim sungah i geelgeel hi. I nuntakna sungah Jesuh sangin leitung van leh nate mun i piazaw a, thupi i sa zaw hi. Pawlpi sungah hunzang ding hong kiseh ciang zong i gualzawhnate pen Topa thupha hang hi ci-in mipite’n zaknop a sak dingin i kamin a cihcih hang, i lungsim in bel ka gualzawhna pen ‘kei hanciamna hang hizaw hi’ kici den hi. Eite a bangci mi ihi hiam? Pasian in ei hong piangsak na pi-in eite in Amah i thudon ngei kei hi. Hih a nuai-a Isaiah tangkona lungngai dih ni.
“Ahih hangin note’ mawhnate in note le na Pasian uh kikhenna hong piangsak a, amah in note’ aw hong zak theih loh nadingin na khialhnate un ama maitang liah hi. Bang hang hiam cih leh na khutte uh mi thahna sisan tawh nin a, na khutmete uh mawhna tawh a nin hi. Na mukte un zuauthu gen a, na leiite un gitlohna thu a gen hi. Kuamah in thutang tawh thu na nei kei uh a, thuman tak tawh thukhen zumah na pai kei uh hi. Note in bangmah lopi suanin nei-in zuauthu na gen uh a, siatna ding thu ngaihsunin buaina na piangsak uh hi. Na ngaihsutnate uh gul gunei tui bangin gu a nei hi a, na vaihawmnate uh maimom khau puan tawh kibang lel hi. Gul gunei tui khat sukham lehang adang khat hong tui zel hi. Na maimom khau puante uh kizang theilo ding a, kuamah in silhlo ding uh hi. Na vaihawmnate uh tua maimom khau puan bangin a mawkna suak lel ding hi. Siatna bekbek na geelgeel uh a, na sepkhiat ding uh na ngak lah mahmah uh hi. Mawhnei lo mite thah ding haksa na sa kei uh hi. Na paina khempeuh uhah siatna vive om kawikawi hi. Note’ omna peuhah kuamah lungmuang theilo a, note’ sepna peuhah thuman khat beek omlo hi. Na lungsim uh kawi mahmah a, hong zuikha mite in thunuam mu ngei lo uh hi
