TEKOA KHUAMI NUMEI
Kampau siamna tawh
Kumpi Pa leh a tapa
kikaal ah kilemna a piangsak Numei
2 Sam 14:1-20
Agelh ~ Rev. Dr. John Thang Hum & Dim Lun Zam
Hih Tekoa khua-a om numei pen numei pil ci-in ki gen hi. (2 Sam 14:2). A tangthu anuai-a bang ahihi.
David in zi nga aneihte sungpan atapa masa pen, Ahinaom tawh aneih Amnon ahi hi. Azi dang khat (zi thumna), Macaah hi a, hih nu tawh Absalom leh Tamar ahi hi. Nikhatni Amnon in Tamar ngailua ahih manin zawhthawhthu tawh tawh khialh pih hi. David in a innsung thupiang atheih hangin nasia takin thu suah lo hi. Ahang pen amahmah in mizi khat sut in, apasal that lailai ahih manin, a mahmah kisuan bawl maw? cih khat om hi. Ahi zongin mi tampi ngaihsutna ah ama’ khialhna siksan in atate thu hoihtak ahilh ding hizaw cih gen uh hi.
Absalom in a sanggamnu ki bawlna phu lakik in Amnon that hi. Tua pan in amah taimang hi. David in a kum hong tam semsem ciangin Absalom hong ngaihsun hi. Hih thu agalkap mangpa Joab in atheih ciangin kumpipa a mai-et-na ding maw, alungsim takpi tawh huhnuam maw khat zawzaw tawh, Absalom leh David ki muhkik theih nading vaihawm hi. Hih a vaihawmna sungah, numei pil khat la in, zohsian mintami (palai) kineih sak hi. Tangthu khat bawltawm in numei nu kiangah agen khit ciangin, tuabanglian in kumpipa tungah agen kik ding sawl hi. Numei nu zong pai in, Joab gen banglian in kumpipa kiangah va gen hi. Kumpipa in hihthu agen pil sa hi. Athu khempeuh anung pan a vaihawmpi pen a galkapmang pa Joab ahi hi.
Joab ngaihsut leh geel bang lianin Absalom a taimangna pan Jerusalem ah hong ciahkik hi. Ahi zongin David mai muh khuan ngah lo hi. A sawtsawt ciangin Absalom in ngian khat tawh Joab vat in kumpipa tawh ki muh teitei theih nading geel hi. Joab in kumpipa leh a tapa Absalom aki muh theih na ding geel sak hi. Absalom in apa David maipha mu kisa in a lung hong nuam hi. Mite maipha zong damdam in hong ngah toto hi. Tua kawmkal teng leh a lungsim ah, kumpi tokhom suankhia dingin hong sawmsim hi. Mite pawl kai in, tam simsim ngah a kisak khitteh pengkul mut sakin amite tawh Jerusalem khua sungah “Absolom kumpi hi” ci-in awng uh hi. hi. Kumpipa in atheih ciangin laulua ahih manin, a kumpi tutna nusia in gamlak ah taai hi. A mah a it teng in nungzuih uh hi. Absalom leh kumpipa galkap te hong ki do uh hi. Tua lai ah gamlak atai na pan, singka kuam khat ah asam awk a, tua pan in mi khatin vatlum hi. David in hihthu azak ciangin, “kei asi hi zaw lengh maw” ci-in kap hi. Tua san ah, bangzahtak a tapa Absalom a itna ki langh hi.
Absalom nuntakna adah huai tawh atawp hangin, David lunggulhna a tangtun nading hih numei in palai banga kizang a, thugen asiam pen pahtak huai mahmah hi. Amah pen Tekoa numei-pil, ci-in min ngah hi.
Thukhupna
Hih Tekoa numeinu tungpan bang etteh theihding om hiam? Lak theih ding pilna pawlkhat om hi. Amasa in, asawlpa deihna bang lianin sem thei hi. A gensak nop kam vaikhak khempeuh khat zong leilak kia sak hetlo in gen thei hi. Tua ban ah, kumpipa’ up theih dingin thugen thei hi. Hih pen thubaihlo khat hi.
Pasian thu ih tangkona ah zong hong sawlpa deihna bangliana i genkik theih leh hong sawlpa lungdam mahmah ding hi. Johan in, “Acil pan-a nazak thu uh ah kip un,” ci hi. “Acil pan” acih pen thupi hi. Paul in “kong gen uh lungdamna thu lo adang lungdamna thu hong gen te in hamsiatna thuak hen,” na ci hi. Paunak in pu-leh-pa te phuhsa gisuang khin loh ding na gen hi. Hihte khempeuh in a kipat cil a banglian, gen ding leh zuih dinga hong kisawl bangliana hihtheih nading kepcing ding leh a kisin huaithu hong gen hi.
Dotna:
Amnon pianzia a bangci mi hiam?
Absalom in bang hangin Amnon that hiam?
David in bang hang Absalom ngai hiam?
Tekoa numei nu in David a ding bang sem hiam?
Kampau siamna bangci ngah ding a bang hang ki sam hiam?
