TAMAR 2
Ama sanggam tektek ii
Zawhthawhna athuak Numei
11 Sam 13; 1 Khang 3:9
Agelh ~ Rev. Dr. John Thang Hum & Dim Lun Zam
David in zi sagih nei a, tuate lak pan azi Maacah tawh tapa Absalom leh tanu Tamar nei uh hi. Adang zi-Ahinoam tawh zong Amnon kici tapa dang zong nei hi. Hih pa (Amnon) in a sanggam-kaang (half-sister) Tamar’ hoihna iplah lua in om khoppih ding ngaihsun den hi. Hih lunggulhna pen kha nin kiangpan ahihlam theilo in, ado kik ziading zong theilo hi.
A sanggampa’ siat bawlna thuak
Amnon in David tapa dang khat mah ahi (nu kibanglo), Jonadab thu kuppih hi. Jonadab in ngaihsutna pia a tua bang lian in Amnon gamta hi. A cina kineih in apa David kiangah a sanggamnu Tamar a inn ah apaisak nading ngen hi. David in zong phalna pia hi.
Tamar in Amnon inn ah an bawl sak dingin vapai hi. An zong bawlsak in va pia hi. Amnon in a-ut bang aseptheih nading a innsung ah om nasem dangte a paikhiat ding sawl hi. Tua khit ciangin Tamar thatang hat thu tawh mawhpih hi. A omkhoppih khit ciangin ngai nawnlo in muhdah hi. Tuabang teng khit ciangin Tamar hawlkhia a, kongkhak asunglam pan kalh sak hi.
Tamar akapsa in inn ah ciaha, tuani-a kipan nungak siangtho hi nawnlo ahihlam lahna puan silh hi. Hih thu a sanggam pa’n atheih ciangin hehnem a, ahi zongin nak heh mahmah in nikhat ni ciangin phu lakkik ding ngaihsun hi. A pa David in zong thei napi Amnon tungah khalna leh taaina zong bawl lo hi. Hih pen David nuntakna ah thanemna lian mahmah khat ahi hi. Atate, sabuai kiim ah kaikhawm a, Pasian’ thu leh thuhilhna gen pih ngeilo hi. A nungsang ciangin David inn sungah phu kilakna, kithahna, buaina lianpipi hong piang hi. Hih te khempeuh David in a innsung a makaih lohna, thu-umlo zi tuamtuam aneih na hang ahi hi. Tamar ahih leh anung sangah bangci suak, pasal nei maw, bangci om cih ki gen nawnlo hi. “Thusia in mual kua khum” acih bangin, kumpi huang sunga thupiang khempeuh a pualam tung pah ding theihsa ahi hi.
Paul in Timothy kiangah, “Khangno ci-leh-sa lunggulhna na tangin” ci in gen hi (2Tim 2:22). Lunggulhna akhuan pia kha leng siatna I tun ding baih mahmah hi. David in siatna tampi a tuah khit ciangin anuntakna a siangtho sak thei ding Pasian kammal bek ahihna tel in, “Khangno khatin ama’ lampi bangci siantho sak thei ding hiam? Na kammal banga nuntakna tawh siangthosak thei bek ding hi. Topa aw, nang tungah kong khialh loh nading nathu ka sungah ka khol hi,” ci ngeungau hi (Late 119:9,11).
Thukhupna
Hih Amnon nuntakna ah kha-niin nasepna kimu thei hi. Mikhat in a ci-leh-sa lunggulhna akhuan apiak leh kha-niin in tua lunggulhna a tangtun nading nungzuih pah hi. Amnon in a sanggamnu tungah siatna abawl khit ciangin nakpi takin mudah lai hi. Hih pen kha-niin linlian bek hang ahi hi.
Absalom in a sanggampa mawhna amai sak zawhloh na hangin, innsung, u-nau ki thahna om a, David na ngawn gim thuaklawh hi. David in a zi, a tate Pasian kammal tawh a makaih loh manin a innkuan sungah buaina lianpi, a ki phelhmit zolo meikang bangin hong tung hi. Hih thupiang khempeuh tungtawn in, tuni Khris nungzui te in pilna lak theih dingin hoih mahmah hi.
Dotna
Nang Tamar dinmun ah om le cin siatna hong tun loh na ding bangci kidal theih dingin na um hiam?
David dinmun ah om hi le cin hih siatna te bangcih ding cih nangaihsun hiam?
Maisak lohna in bang ciang siatna tun hiam?
Amnon in a ngaihsutna hoihlo a tangtun theih na ding bang hih hiam?
Pasian kih takna neilo mite ngaihsutna la kha leng bang siatna om thei hiam?
Lai Siangtho sungah om thu dang te tawh zong etkak in la gen in.
