SYRIA GALKAPMANG- NAAMAN’ NASEM NU
A topa cidam na ding
Lei adawh sak hebia numeino
2 Kum 5:11-19
Agelh ~ Rev. Dr. John Thang Hum &Dim Lun Zam
Israel mite in Pasian thu amanloh uh ciangin, minam dangte khut sungah piakna thuak uh hi. Galmat a thuak kha peuhmah sila in- galkap ding, lokho ding, insung nasem ding, anhuan ding, uliante sawltak leh mi muanhuai cih bang in om uh hi. Gal a kimat ciangin sila kizuakna ah zong kizuak in adeih ten zong ki lei thei hi. Hih numeino nu, Naaman galkapmang pa in amat hi thei ding a, ahih kei leh mi zuak kiksawn khat alei zong hi thei dingin ki um hi. Bangbang hi ta leh galkap manglian pen pa innsung ah nasem dingin hong tun theih pen, ama’ kum tawh kizui in maunhuaina sunglam mugil nei mahmah khat hi ding ki ngaihsun thei hi.
Galkap mangpa in phaknatna nei
Phak natna pen a dam theilo natna a, ki ngaihsun ahi hi. Tua bang natna ngahte a innkuan pihte kiangpan ki la khia in, khua pualam ah ki tuam koih hi. Hih galkapmang Naaman zong a natna a dam kei leh ki tua cih ding ahih manin nak dah mahmah a, nisim in anne, tuidawn zolo in om hi. A sum neih teng tawh a kibawl hangin dam zolo hi ding hi.
A topa tungah hangsan takin teci pang
Hih Israel galmat numeino pen a up Jehovah Pasian tel in, nuntakpih mikhat ahi hi. A tonu kiangah, “ka topa in banghang lungkham hiam? Judah gamah Pasian kamsangpa om hi, tua pa kiangah pai in thu kingen sak leh dam ding hi”, ci-in gen hi.
Hih numei no in tuazah cianga Pasian a nuntak lam a gen ngam nading in amah bang ciang hi ding hiam? Amah hilo in a sunga a up Pasian lian ahihna tel hi. Sawltak Paul in, “ka up pa ka thei a, amah muanhuai hi,” ci-in a gen bangin a-up pa tel mahmah a, nuntakpih ngam hi. Hih bang upna koi ci ngah hiam cih leh, Jew mi khat ahih nak leh aneu pan ki pan Pasian thugil, TORAH tawh a ki pattah ahi hi. A kisap hun ciangin hangsantak a Pasian thu gen ngam na ding khensatna a nei ahi hi.
Naaman in Elisha a va muhna
Naaman in a nasem pa tawh kamsang Elisha mu dingin va pai hi. Elisha in, Naaman kiangah Jordan gun ah vapai a, sagih vei a kidiah ding gen hi. Naaman in hih thupiakna azak ciangin heh mahmah hi. Jodan guntui sangin tui hoih zaw ka gam ah om hi, ci in hih nuamlo hi. Ahi zongin a nasem pa in, kamsangpa cih bangin hih ding a gen ciangin a vahih leh dam siang vivel hi.
Gammial nasep (Missionary) sem
Sila numei no in a tote kiangah a nasepna a haksatna, anoplohna gen ngeilo hi. Sep ding om bang semin, nek ding om bang ne in, a tote lungkim sak mahmah hi. Midang khat inn ah nasem a om pen thubaih hilo ahih hangin, kei Pasian in deihna nei-a, hi teng hong puak hi cih thei leh haksatna nangawn kizo thei hi. Joseph in zong haksatna tampi a thuak hangin Pasian ngimna tel ahih manin phunlo puamlo in thuak teta a, a tawpna ah gualzawhna kham lukhu ngah hi. Israel mite Pasian in a telna pen mi namdangte tungah ama’ (Jehovah Pasian) khuavak puaksawn dingin a teel ahi hi. Hih thu Pasian in mimal tungtawn ahi a, mi nih leh thum tung tawn ahi a, mi nambup tungtawn in ahi zongin lak zelzel hi. Hih sila numei nu zong Pasian in a khuavak a taan na dingin azat khat ahi hi.
Thukhupna
Hih numei no in a biak Pasian anunta taktak ahihna tel in, Pasian’ ompih minam ahihna zong tel taktak a, hangsan takin nuntakpih ngam hi. A topa it mahmah a, a dam ding zong deihsak mahmah hi. Hih pen a etteh huai leh a thangah huai mahmah khat ahi hi.
Tungsiah leh I nasepna tote’n hong muan nading thu baih zong hilo a, hun tampi tak, gamtatna tawh lahna ki sam hi. Pasian in a minamte thu aman loh ciangin mi namdangte khut sungah hamsatna thuaksak a, ahi zongin tua sung mah ah ama’ minthan nading in nazang kik zel hi.
Dotna
Hih numei no nu a innkuan omzia leh Pasian a theihzia gen in.
Bang ci bang dan in Galkapmangpa innsung hong tung thei hiam?
Bangci bangin a topa phaknatna pan adam na ding huh hiam?
