SUM TANG AMANSUAH NUMEI
A lungdam na midang a kothei numei
Luke 15:8,9,20
Agelh ~ Rev. Dr. John Thang Hum &
Dim Lun Zam
Topa Jesu in vantung gam thuthuk te mi ten a tel theih na dingin thugentehna zangh in gen hi. Tua thugentehna te zong miten nisim a nuntakna a, thupiangte vive ahi hi. Hih Luke 15 sungah, mihingte manthanzia dawl thum in na gen hi. A khat na-ah, tuu mang tawh na genteh a; nihna ah sum mang tawh na genteh in; athumna ah tapa taimang tawh na gen teh hi.
Numei khat in sum pek (tang) sawm nei hi. Hih sum te ngun ahih kei leh sumngo tawh kibawl hi a, tang khat pen tulai $ 100 bang man ding hi. Tua pen numei van hi phadeuh in, a ngawng ah a ok uh ahi hi. Pawlkhat in a lu tungah zong vial uh hi. Numei te aa dingin van manpha mahmah, neih lianbel-a, aki ngaihsun ahi hi. Hih sum pek tang 10 sungpan tang khat mang leh bukim nawnlo a, mite in numei ginalo in zong ngaihsun thei uh hi. Tua ahih manin a mansuah khak leh a muh dongin zong kik a, amun ah koih kik ding ahi hi.
Hih numei nu in, nikhat a sumtang te tang khat mansuah ahih manin nak dah mahmah hi. Midang te kiangah zong thei sak a, khatpeuh in amuh khak leh a piak kik ding zong gen hi. Ahi zongin a innsung mah hi dingin um ahih manin inn sungteng nak zon mahmah hi. A zon dan pen mei vak in kawmlak khempeuh phen in, vanteng nawlkhin in, sual tungah puan phah teng lem khia in, munphiah tawh innsung khempeuh phiat dikdek hi.
Matte 7:7 ah, Ngen un, na nget uh leh hong kipia ding hi. Zong un na zon uh leh na mu ding uh hi. Kiu un, na kiuh uh leh kong hong ki hon ding hi, cih Topa’n gen hi. Hih lai-ah a kammal zat nam pen, upmawhna teng va en zual hilo in, mun citeng phen dikdek a zon nam agen ahi hi. Hih numei nu van zon dan zong tua bang nam ahi hi. Pasian citak a azong mite in muding uh hi (Heb 11:6) ah gen hi. Hih Lai Siangtho in agen namte dan cihtak a zonna ahi hi.
Meivak tawh zonna
Mei vak tawh azon se na pen, a ki muthei lo na teng zong khuavak in kap a, a muh theihna ding ahi hi. Mawhnei te Kha Siangtho meivak in hong kap ciang bek in, ih mawhna hong kipholak in, Pasian I mu thei bek hi. Tua ahih manin Kha Siangtho’ hong kap ding ih lunggulh ding kisam hi.
Midangte zong a lungdamna thei sak
Numei nu in tua asum mang amuh ciangin, iim cip lo in, a vengte, midang te zong sam in, lungdam koh pawibawlna nei hi.
Thukhupna
Hih tangthu in, cihtakna, lungkiatloh nading leh, midangte zong tawh lungdam khop theihna hong gen hi. Mihing ten I lungdam ni leh ih dah ni in, midangte tawh lungdam khawm, dah khawm ding Topa deihna ahi hi.
Hih tangthu in hong gen nop bulpi pen, mihing hong nei Pasian in hong zongzong ahihna hong lahnopna hi.
