RAHAB
Upna tawh thukante seel a,
aki suksiat nading pan, a innkuan pihte hon khia.
Joshua 2:1-7; 6:17-25;Mtt 1:5; Heb 11:31
Israel mite Izipt gam pan a paikhiat in Cannaan gam dong ni-li lam paina pen kum 40 sawt hi. A hang pen, Izipt mite nasepna in a hun bei a, Pasian biak hun ding, galkapzia cih bang kisin hun nei thei ngei lo uh hi. Tua ahih man in Pasian in thuzuih ding kiciante pia nuam a, gal do zia sinsak nuam hi. Tua banah mihing te an bek tawh nungta hilo, Pasian hong thupiak tawh aki nungta ahihna sin sak nuam hi (Pasian in na lamdang bawlpa ahihnalak nuam hi). Kuama kumpi in aneih ngei nailoh, a kip leh a kho thukham apia nuam ahi hi. Tua banah upna kician neilo te (a phunphun, a ciakciak te) zong khaih khia nuam hi. Tua ahih manin kum 40 sung gamlakah hi teng sin dingin ki vialvial uh hi. Hih pen Pasian geelna ahi hi.
Makaipi Moses a sih ciangin Joshua in laih hi. Tu in, gamlak aa kawi paipai hunteng bei ta a, Canaan gam sung lut peetpeet ding hita hi. Ahi zongin Cannan gam a khutsungah a humcip tawhtangpi ahi Jericho khuapi a mai ah nading gemgam hi. Jericho khuapi alak zawh leh bek khuaneu dang teng haksa nawnlo ding ahi hi. Jericho khua pen a kumpi khua uh hi a, kulh tawh bit tak a, kuama suksiat zawh loh ding a ki uum bit ahi hi.
Israel te lam ah pang
Joshua in a gamleh amite omzia thei nuam ahih manin thukan ding mi nih sawl hi (Joshua 2:1-10) Thukante zong vapai in Jericho khua a teeng, Rahab inn ah va tung hi. Hih thu, Jericho kumpi pa in azak ciangin Rahab kiangah azinte a piak ding gen hi. Ahi zongin Rahab in tua mite na sel khinkhian hi. Kumpi pa tungah zuau phuakin, amaute paikhia khin hi, delh le uh cin lam kal ah na laplai kha ding uh hi, na ci hi.
Kam ciamna bawl
Azinte kiangah, (amau) Israel mite Pasian in ompih takpi a, a tuntunna uh ah gal azawhna thu, mite amau hangin patau in linglawng ahihna thu gen hi. Nikhat ni ciangin Jericho khuapi zong amau khut sung tung ding ahihna gen a, tuani ciangin amah (Rahab) leh a innkuan pih te’ nuntakna a suksiat loh ding zong thuum hi. Thukan ten zong tua teng thukim khawm a, Rahab in a kam a kep ding, ahihna khempeuh uh kua mah a theihsak loh ding gen hi. Rahab in hih thukante tungah, Pasian in Israel mite a ompih na, a gualzawhna uh azakna thu te hangun mite a lauthawng khin ahihna zong gen hi. Israel miten Jericho khuapi la in, Canaan gam sung lut ding ahihna zong tel hi. Tua ahih manin kamciam ki pia sak hi. “Note na Pasian un hih gam leh leitang hong pia khin ahih manin, hih mun nong lak uh teh kei leh ka innkuan te nong suksiat loh na ding uh hong kiciam un,” ci hi. Tua bangin Israel miten Jericho khuapi alak ciangin, Rahab leh a innkuan pihte suak ta uh hi.
Hih Rahab gamtatna pen LST in gamtat hoih leh upna tawh gamtatna in na gen hi. Pasian pahtakna ngah mite lakah hih Rahab zong khatin hong kihel hi. (Hebia 11:31; James 2:25).
Khausan khai ding gen na
Thukan te in, Jericho kilak ni ciangin, Rahab in a innkuan pih teng a ma innah a koih ding leh, a omna uh a kitheih na dingin a inn pan kulh tungah khausan a khaisuk ding gen hi. Tua in Israel mite a dingin lim hi ding a, khausan a omna mun pen suksiat loh ding cih thu ahi hi.
Hih khausan khaikhiat sese adeihna pen Jesu sisan in mawhna dan pan hong hotkhiatna ding genkholhna lim ahi hi.
Mualtungah nithum ki seel phot ding
Rahab in palikte kiangah, a zinte pai khiakhin a, tu mahmah in delh leh apha lai ding in gen hi. Ahi zongin azin te kiangah mual tungah kahto in nithum sung abuk cip ding gen hi. Ni thum khit ciangin Jordan gun kantan in a paipat nading uh gen hi. Thukante in Rahab cih bang linlian in nithum sung mual tungah ngak in adelh galkapte ciah khit ciangin Jordan kantan in pai hi. Hih in Jesu Khris in nithum sung han sungah kivui dinga, tua khit ciangin gaulzawhna tawh nithum khit ciangin hong thokik ding cih lim lah kholh na ahi hi.
Thukante in atun kik uh ciangin, Joshua tungah a gamtatna uh leh amuh thu teng uh avek in gen hi. Pasian in amau a ompihna, mite amaute hangah linglawng ahihna leh Rahap in amau te a bawlna leh kamciam apiak na khempeuh uh gen hi.
Thu manna hangin suakta
Jericho khuapi alak uh ciangin, Rahab in thukante gen bang lianin a inn pan khauhual san a khaikhia hi. Joshua in tua inn a ki suksiat loh nading na gen khin ahih manin tua ni in midang khempeuh a ki thahlup hangin Rahab leh a innkuan khempeuh suakta uh hi.
Upna matai te khat in ciaptehna ngah
Hebia laikhak alian 11 sungah, upna lamah lamphuang khia, Pasian in a pahtak taanglai mi siangtho pawlkhat ki ciamteh a, tuate lakah hih Rahab zong khat in kihel hi. Hih Rahab gamtatna pen upna tawh nasepna in ciamteh hi (Heb 11:31; Jm 2:25). Rahab in numei hoihlo khat ahih hangin a upna in amah leh a innkuan pih te gum khia hi. Noah mah bangin Rahab zong a innkuan pih te a gumkhia zo numei hangsan khat ahihna hong lak hi.
Jesu Khang simna ah kihel
Matte 1:5 sung aa, Topa Jesu khangsimna ah, Rahab pen Ruth i’ pianna pi in kigen hi. Banghangin numei ginalo, pahtakna ngahlo khat Jesu Khris khangsimna ah hong omthei ahi hiam? cih, dotna om thei hi. Ahang pen upna khatbek hang liuleu ahi hi. Lai Siangtho in upna hangin, diktansakna i ngah zo, ci-in gen hi (Rom 4:5). Upna hangin Abraham in Pasian lawmpa cihna ngah hi (Rom 4:3). Upna hangin Pasian gal eite in amah tawh kilemna i ngah hi (Rm 5:1). Upna hang bek vive ahi hi.
Thukhupna
Rahab in anungta Pasian ama’ mitawh a muhtheihloh hangin, a kiim leh a paam thupiangte tungtawn in Pasian omtakpi ahihna, Pasian in thupha apiak, a teeltuam mite vapawl le hang thupha hamphatna kingah thei, azenzen in vapawlpih khalo hi leh ama’ tungah siatna bangci tun ding cihte khempeuh natel mahmah hi. Tua ahih manin upna tawh hangsantak in Pasian mite na pawlpih hi. Hih upna pen Pasian in gamtatna hoih asem in ciamteh hi. Hih nasepna in amah bek hilo, a innkuanpih te zong honkhia hi.
Rahab in Khris honpa’ khangsimna ah a min kidawk ding zong theikha lo ding hi. Ahi zongin upna tawh gamtatna in mi tampi tak hotkhiat na ding lampi honna ahi hi.
Dotna:
Rahab in banghangin thukan te selsim ngam zah dongin hansanna nei hiam?
Thukan te tungah bang ngen hiam?
Khau san in bang khiatna nei hiam?
Thukan te mualtungah ni thum sung buk ding cih in bang khiatna nei hiam?
Jericho khuapi alak in bang ci sep uh hiam?
Joshua in Rahab tungah akam ciamte bangci tangtun sak hiam?
