Khangnote’ Ma Hong Honsak Un!
Agelh ~ Kap Za Khai (Photoh)
Tuhun ciangin Gam le Khualetui makaite in khangnote pen Mailam-ah gam makai dingte, gam ii lam-ette, le gam ii thahatnate hi ci-in hong phatphat na pi-in khangnote adingin bangmah sepsak lo uh hi. Kam tawh hong pahtawi na pi-un gamtatna tawh hong nawlkhin uh hi. Dahhuai sa mahmah ing.
Sengam pan Kawlgam ah hong hawh pak Sengam makai khat a thugenna ah “Tuhun ciangin Sen kumpi in khangnote kumpi lam le mun tuamtuam ah za hoih za lian pia in pantah ta hi. Khangnote khantoh nading a kisam tintan tuamtuamte le nasepna tuamtuamte zong bawlsak, phuatsak hi. Tua bangin khangnote ading ma honsak kei le ung. Sengam pen khantohna tatsat gawp kha ding hi” ci hi. Khangham makaite in a nasep uah khangnote thun in pattah khop theih ding kisam hi. 2014 kum in Leipi Tuiphum Pawlpi in a minister dingin khangno Lai Siangtho sang man mi 5 bang la-in a picingsa Pastor-te tawh kithuah khawmsak in pantah uh hi. Khangham makaite hong beibei dinga, ahi zongin khangnote hong phung semsem ding ahihna phawk den huai hi. U liante in Khangnote’ thahatna le manphatna uh theih bek tawh kicing lo a, amau thahatna le manphatnate a zatkhiat/a lakkhiat theih nadingin ma/lampi honsak ding/bawlsak ding kisam hi.
I gam le minam na it takpi le Khangham makaite in Khangnote ading ma honsak kul hamtang hi. Sente bangin Khangnote dinmun sang mahmah le a kician piakngam huai hi. Khangnote muang ngam ding kisam hi. Tu laitak-a na dinmun le na za sangin khangnote’ dinmun ngaihsutsak zawk ding ahi hi. Banghang hiam cih leh tua dinmun le za-te pen nang a (private) hilo a, khangnote kiangpan na kawm (borrow) le Khangnote’n nang hong kop (lend) ahih man hi. Na khangnote mailam thudon loin om kei in. Tua sangin a lampi ding uh phahsak zaw hi. Na upmawhna sangin Khangnote in na lianpi hong sem zo zaw ding uh hi. General Aung San in Kawlgam suahtakna a lak lai-in amah pen a lawmte lak-ah a kum moi/tawm pen hi. Hi in U ham le Ulian-te sangin khangnote in sep ngamna le sep zawhna nei zaw ahihna hong mu sak hi. Tua ahimanin Makai-te aw..na khangnote’ paina khaktan kei in la, ma honsak zaw un!
Laibu Saal / Zomi eLibrary
