MIKHAL
(A Pasal Pasian Phat-a Laam lungkimlo numei)
1 Sam 14:49;18:20-28;19:11-17;25:44
2 Sam 3:13,14;6:16-23;16-23;21:8 1 Khang 15:29
Agelh ~ Rev. Dr. John Thang Hum &
Dim Lun Zam
Makhal pen Saul kumpi pa tanu neu pen ahi hi. Amin pen Maike,Mii-khai-a, Mi-sa-el, cih dan tuamtuam in zong ki sam hi. Anu min Ahinaom hi.
David in Philistine galkapmang Goliah that a, Philistine te a zawhna hangin in Saul in a tanu Mirab (a-taak- pen) tawh kiten sak ding kamciam hi. Hi napi midang khat napia thopthop zel hi. Tua kawmkal tengah a tanu neuzaw in David hong ngai a, tua amuh ciangin lungkim mahmah hi. Ahang pen, David a makpa dinga adeih hilo zaw in, a tanu thang antah bang nei dinga David a thah nop man hizaw hi. A thah nopna hang bulpi pen hazatna hang ahi hi. David in Goliah that in galzo-a hong ciah ciangin, mihonpi in, “Saul in a tultul in that, David in atul sawm in that,” ci-in tangko na nei ahih manin, tua thu in lungkim lohna hong piangsak hi.
David Zi suak
Saul in a tanu Makhal leh David ki ngai cih a theih ciangin, David kiangah, “ka tanu na deih leh Philitine mite vundawn zakhat tawh hong lei in,” ci se hi. Tua pen a moman ding ahi hi. Saul ngaihsutna ah, kei khutlum a thah kullo a, Philistine te khutlum a si sak ding acihna ahi hi. David zong pai in Philistine te vundawn zakhat Saul tungah pia hi. Saul deihna tangtun ahih manin Makhal David zi dingin ki pia hi.
Makhal in David sihna ding pan huu
Saul in David galte khut sungah si ngeilo ding cih atheih ciangin lampi dang khat tawh athah zawh nang sawmsim hi. Hih thu Makhal in thei hi. Saul galkap te David man dingin hong pai a, a inn kiim-uum ta hi. Makhal in David a cina, ci in khem hi. David lupna ah milim khat puan tawh tunn in, alum dan in bawl hi. Tua ciangin David padenpauh pan khiain taikhia sak hi. Saul in hihthu atheih ciangin a tanu tungah nak heh mahmah hi. Makhal in apa hehna atheih a kipan David tawh ki gamlat theihtheih nading hanciam hi.
Makhal leh David kikhen
David in Saul kiangpan a tai khiat ciangin gamlak bekbek ah om ahih manin azi tawh kizopna nei nawnlo hi. Saul in hih thu atheih ciangin ama’ mimuante khat ahi Phaltiel tungah Makhal pia hi. Makhal in zong David mah ci teta lo in, pasal dang nanei ziau hi.
Makhal, David tungah ki pia kik
David kumpi hong suah ciangin Makhal kan kik hi. Tua ciangin Makhal a pasal kiang pan zawhtawhthu tawh lakik in David kiangah ki pia kik hi. A kilak kik in a pasal Pathiel in kapkawm in zui hi. Patheil in zong kumpi pa thu nial zolo in a man kul ta hi. Makhal ahih leh David a pasal masa hi a, vang zong deih mahmah lel ahih manin Patheil zong nunghei nawnlo, zong hehnem tuanlo hi. David in Makhal thuman zawhlohna te maisak in azi taktak mah in koih hi.
Makhal in David neu et
David in, Jerusalem, kumpipa’ khuapi in hong bawl tak ciangin, thuciam-singkuang zong hong tuah hi. Tua ni-in David lungdamlua a, mihon pi mai ah lam ziahziah hi. Hih lamna amuh ciangin Makhal na zumlua in David na phunsan hi. “Nang, kumpi pa takpi, na tangguak a na lam, maizum huai,” ci hih tuak hi. David in, “Banghang lam lo ding ka hiam? Kum tampi sung amang khin sa, Thuciam singkuang hong tung kik banghang lungdam lo in omzo ding ka hiam,”? Ci-in gen hi. Tua ni a ki pan David in azi Makhal luppih nawnlo hi.
Hih tangguak- a laam cih pen hi bang dan hi. Kumpite in puan thuap thum silh den hi. Athuap tungnung pen kumpi puan hi a, tua lo a sungah thuap nih om hi. Tangguak a laam cih ciangin hih a thuap tungnung, kumpi puan pen kiakhia cihna hi. Kumpi puan kiakhia lianga laam pen vang adeih mahmah Makhal a ding haksa mahmah hi. Kumpi puan nangawn kiakhia sak zawzen cihna dan hi. Hih kitotna pen khauhpai lua ahih manin kumpi pa in, Makhal anungsang lam bel ciahsak samlo ahih hang, tua mah tawh ki bangin luppih nawn lo hi. Tua ahih manin Makhal tawh ta neilo uh hi. Makhal in ka pasal ka tua cih kisik mahmah ingh a cih na zong kiza tuanlo hi. Tu lai numei kimkhat te-in Makhal dan nuamsa in etteh in la thei uh hi. Tua pen lauhuai ahihna ih mu hi.
Thukhupna
Makhal nuntakna pan pilna pawl khat i sin hi. Amah pen vaang deih mahmah khat ahihna ki mu hi. David minthanna amuh ciangin pakta a, tenpih hi. A pa in midang khat zi ding a piak ciangin zong, David mah ci teta ngam lo hi. David in azi dinga a alak kik ciangin, a pasal lui leh a tate zong bye zong ci tuan selo in, David nung mah zuikik hi. Tulai pau in genleeng, maitang gol lam ah, a sa tata pai, mual-a dialpak khim khempeuh pakta, cih te pawl hi.
Ahi zongin David sihna ding pan in honkhia hi. A pa in David thah nading a sawmsim lai tak, tawlet pan tai sak in, alupna ah milim khat koih hi. Hih pen a pa in atheih teh nak heh mahmah hi.
A dang khat ah, a pasal ukthawh nuam ahihna zong om hi. David in Topa thuciam singkuang angahkik ni-in, nuamlua in Pasian phat in, laam in, diangin, a om ciangin, Makhal in zumpih hi.
David in Makhal tungah a khasiat luatna hangin luppih lo a, ta zong neihpih lo hi. Hi thupiang teng tung pan pilna I ngah hi.
Dotna:
Makhal tangthu a tomin gen in
Banghang a lungsim khelkhel hi ding hiam?
David ciah kik ding lamen dingin na ngaihsun hiam? Na ngaihsutna gen in
Banghang a pasal Pathiel tungah mangpha kamkhat beek ci lo hiam?
Makhal pen Pasian zia tel cih sangin ama’ mailam khuat siam numei kici thei zaw ding hi. Nang ngaihsutna gen in.
