MIRIAM
(A sanggam pa Moses kem in
A suahtakna ding a sem numei; minam it numei)
Paikhiatna 2&15;Gamlakvakna 12 &20
Agelh ~ Rev. Dr. John Thang Hum &
Dim Lun Zam
Miriam, Aaron leh Moses, hih unau 3 te, Amram leh Jochebed sung pan piang hi. Amram pen Levi suan ahi hi. Miriam pen Hebia min hi a, mikang pau in Mary ci-in ki zangh hi. Israel mite kum 430 sung Izipt te’ sila hihna pan Moses tungtawnin a hotkhiatna ding Pasian in gel khin a, hih geelna a tangtun theih na ding a-u-nu Miriam leh a nu Jochebed te mapan na kisam ahihna kimu hi.
Nu leh pa thumang
Izipt ah sila a, a om hun sunguh Israel minam te pung semsem hi. Pharoah in hih thu amuh ciangin patau ahih manin Hebia mi pasalno khempeuh thah ding thu pia hi. A lamdanna khat pen, Hebia numeite asuah ciangin Izipt numeite bang lo-in, nausuaksak siamate theih khiat ma-in na suak khin pahpah hi. Tua ahih manin atheih khakloh uh Israel naupang tampi suakta hi. Moses zong tua bangmah a suakta te khat ahi hi. Asuah ciangin anu leh apa in upna tawh kha 3 sung seel hi. (Sawl 7:20; Heb 11:23).
Naungek a sawt ciangin inn ah ki kem thei nawnlo ahih manin gamlak ah sel ding ngaihsun uh hi. Ahoih thei pen a ngaihsut ciangin, tuilut theilo ding pumping leh taalkul tawh luai bawl in, Nal gun piau, phaikung lak ah sel ding ngaihsutna ngah khia uh hi. Naungek luai sungah koih in, Nal gun phaikung lak ah sel in, Miriam in en cik hi.
Hi ci ngaihsut pak leeng, bang tanvei sel zo ding cih ngaihsut hak mahmah hi. Nawi hong duh dinga, a-zun, a-ek siak kul den ding pen nisim a sepding baih hetlo ding hi. Tua ban ah, Nal gundung-a om Awle gilkial te lauhuai lai hi. Pasian lo ngal, kuamah in naungek suahtakna ding bawl theilo ding hi. Tua bangin kha thum sung vilvel, a-u-nu Miriam in encik in, kem hi.
Lungsim manlang, Hangsan, Mai phungam
Naungek Moses akoih ni mah asawtlo in hih thu teng piang hi leh kilawm hi. Miriam in a gal pan naungek encik gige hi. Nitak lam pawl Pharoah tanu a kisil hun hong tun teh Nal gun ah pai-in va kisil hi. Tua laiah a nasemte khat tua kiim teng pai kawikawi a, a khuadak leh, nauluai khat mu hi. A va et leh, asung a om naungek hong kap khia hi. Nasem nun amuh ciangin thakhat thu in Faro tanu kiang ah gen hi. Faro tanu in amuhteh ithuai leh hehpih huai sa a, ka kem ding ci pah hi. Tua amuh ciangin Miriam in thakhat thu in delh pah a, naukem ding Hebia numei kong zon sak ding hiam? cih dong pah hi. Thakhatthu in anu kiang tai pah a, a thu teng gen in, Naungek anu’ kep dingin la khia hi. Tun! sim hih khuankhuan leh launa om nawnlo a, kumpi phalna tawh kikem ahih manin naungek a ding launa them zong om nawnlo hi. Miriam in anau cin tavuan zo mahmah hi. Ahangsanna, alungsim manlang zia leh itna aneihnate ki langh khia hi.
Pasian bawl nalamdang te mu
Moses, amite hon ding hong pai kik ciangin nalamdang nam 10 te abawlna khempeuh Miriam in mu hi. Pasian nungta tak pi ahihna tel semsem hi.
Miriam in kamsang
Israel mite Izipt gam pan hong pai khiat a, San tuipi a kantan khit ciangin, Miriam leh Moses makai in mi honpite tawh Pasian phatna late sa hi. Hih Pasian phat a, mipi lasakna pen Izipt gam sungah nei ngeilo a, hih pen akhatveina ahih manin mite ki henna khempeuh pan suah takna ngah hi. Tulai a, I biakpiakna te ah Kha Siangtho hong om ciangin i lungsim kihencip teng tuisuak in, suahtakna i ngah bang dan hi ding hi.
Miriam in phatna leh biakna ah a makaih bek thamlo in, kamsanna zong nei hi (Paikhiatna 15:20). Jewte laibu dang khat ah, Moses a pian nading leh Pasian zat ahihna ding khempeuh zong Miriam in kamsanna nei hi cih gen hi.
Kamsanna i cih ciangin, hansuahna cihna zong ahi hi. Mihingte nisim i nuntakna haksatna in hong khihcip den ahih manin hansuahna, thapiakna i kisam den hi. Kamsangte nasep zong tua hi.
Khualzin na-ah, Moses a makai pi ahih zah khat in, mipite lungsim Moses tungah omzaw ahih manin Miriam thupi lo tawh ki bang hi. Tulai pawlpite sungah zong pampaih theihloh makai leh kamsangza a nei om hi. Ahi zongin amau sang a madawkzaw khat om leh tua bangte kua man thupi sim lo thei hi. A thupitna miten mulo thei hi. Miriam zong tua bang mah ahi hi.
Lungkimlo numei
Moses in Cushite numei khat a tenpihna hangin Miriam leh Aaron lungkim lo uh hi (Gamlakvakna 12:1). Tua hangin Miriam tungah phaknatna hong tung hi. A taktak in hih lungkim lohna pen Moses in minam dang zi aneih na hang hih tuaklo zaw hi. Athu nung i-et teh, Moses, Aaron leh Miriamte pangkhawm in makai ahi hi. Ahi zongin Pasian in Moses amungpi dinga ateel ahih mah bangin mipi lungsim zong Moses tungah a tamzaw hong om hi. Tua ciangin hazatna piang hi zaw hi. Miriam gen na ah, “Pasian in Moses bek hopih hiam? Ei zong hong hopih hilo hiam?” ci se hi. Pawlkhatte’ upna ah Miriam sungah hazatna hong omna pen Moses tawh unau, innkuan hihna om thei nawnlo a, azi in aituam neih ahih man aci zong om hi. Aaron ahih leh makai siamlo-a, nungzuih siam in, Miriam cih bangbang azui ahi hi.
Pasian in atel tuam Moses, thu dangdang tawh tawh ki langpan ding deihlo hi. Tua ahih manin Biakbuk sungpan sam khia in Moses a tuam vilvel a thupha pia ahihna lak in Miriam tungah phak natna tung sak hi. Tua pan Moses in Pasian tungah a thumsakna hangin dam kik hi.
Sehnel gamlak Kadesh Bernear mun atun uh ciangin Miriam hong si hi. Ama’ sihna hangah mipi dah cih ki genlo hi. Hih pen alamdang khat hi. Miriam in hazatna tawh Moses alangpan khak hangin asep ding tavuan teng zo mahmah hi. Israel te tangthu ah Miriam makaihna ki thupi sak mahmah hi.
Thukhupna
Miriam in nu leh pa thu amanna leh Pasian a itna hangin Israel mite a honkhia ding Moses hong khan na ding mi kitangsam khat hong suak hi. A itna, aveina leh lungduaina te etteh huai mahmah hi.
Ze-etna pen mikim tungah hong tung thei hi a, Miriam in Moses lang pan nopna hong neih ciangin phak natna hong ngah kha hi. Moses, Pasian in makai dinga akoih, avangliatna a kilah khiat sakna ahih manin, Moses a teeltuam ahihna kilah nading leh mipi te kidop theih na dingin a tungah natna atun sak ahi hi. Hih in ih nuntakna ah, Pasian teel mite tawh kisai in ih muh zia, ih bawl zia te kidop ding thu hong gen hi.
Dotna
Miriam i khan khiatzia gen in.
Moses ading asep te gen in
Aneih kivakna thugil te gen in.
Miriam in bang kamsanna te gen hiam?
