MARY TUAMTUAM TE THU
Lai Siangtho thak sungah Mary min nei numei 6 ki mu thei hi.
Jesu gumpa hong pianna Mary (Matt 2:11; Sawl 1:14)
Magdelene khua mi Mary (Luke 8:13)
Bethany khua mi Mary (Martha leh Lazarus sanggam nu) (John 11:20,31)
Klopas zi Mary (Johan 19:25)
Jerusalem khuami, John Mark’ nu Mary (Kolose 4:10)
Rom khua pawlpi ah om Mary (Rom 16:6)
Hih 6 teng lak ah numei 4 teng khia in i en ding hi. A dangte thupi lo cihna hilo in, hih 4 te thu ki tam theihzaw cih na ahi hi.
MARRY, JOHN MARK’ NU
(A inn-alo, aneihsa te
Topa ading phaltaka apia khia numei)
Kolose 4:10; Sawl 4:37;12:12
Agelh ~ Rev. Dr. John Thang Hum &
Dim Lun Zam
Hih Mary pen lungdamna Marka laibu gelh pa John Mark’ nu ahi hi. A innkuan thu kicingtak in kigenna omlo a, ahi zongin a pasal in nusia baih a, meigong hi dingin kithei hi. Jerusalem ah inn golpi nei a, tua innpen thu-um te kikhopna inn a kizangh ahi hi. Pentecost ni a, nungzui 120 te thunget khopna zongh hih inn mah ahi hi. Mi 120 om theihna innpen gol mawhlo kha ding hi. Jerusalem pawlpi kipat khiatna zong hih inn mah hiding hi. A tapa John Mark pen Pawl te tawh mission nasep na ah zinkhawm cih kithei hi. Amin pen John in kigelh zel a (Sawl 13:5,13), Mark in zong ki gelh zel hi (Sawl 15:39). Hih Mark i nu Mary pen sawltak Barnabas i’ sanggam nu ci-in zong ki gen hi (Kolose 4:10).
Jesu nungzui kician mahmah
Numei pawl khat in amau leh amau kivak tawmin Jesu’ nungzui hi, acihte lakah amah zong kihel hi (Luke 8:1-3). Topa a sihni dongin singlamteh kiang dongin zui hi. A thawhkik ni zingsang zong va om hi.
Aneihsa teng Topa a ding pia khia
Sawltak te in aneihsa teng zuakin angah sum te uh gawmkhawmin zangh khawm uh hi (Sawl 4:37) A inn zong thu-um te ki khop na ding phal tak in pia hi (Sawl 12:12).
A tapa Pasian nasem dingin pia khia
Marka in sawltak Peter leh Paul te nung zui in lungdam na thugen nate ah zui kawikawi hi. Peter in Marka pen kha lamah ka tapa ci-in gen hi (1Peter 5:13). Marka in a gelh lungdamna thubu Marka Lai siangtho pen Peter in agen na tungtawn in azak leh amuh thute gawm a, gelh hi ding ki ngaihsun hi. Tangval khat in Pasian nasepna ah hong kipiak theih nading utna pen nute tung pan kingah tamzaw hi. Nute phalna om kei leh ahaksa mahmah thu khat ahi hi. Mary in atapa John Mark Pasian nasem asuah theih na ding thungen in tawsawn cih ki ngaihsun thei hi.
Thukhupna
Pasal in hong nusiat ciangin meigong ki suak a, lungneuna, haksatna tampi hong om in, thu kikup pih ding mi kisam mahmah hi. Ahi zongin hih Mary in a lunggimna teng angak theih nading mun, akip akho Jesu va bel kha hi. Hih pen hamphatnate lak ah hamphatna lian pen ahi hi.
A pasal zong pasal gina khat ahih manin, azi Mary leh a tapa John Mark, gamh hoih mahmah na guan hi. Innpi khat leh a ki gen lo a dang zong tampi om kha ding hi. Mary in tuate zuak ning ci hetlo in, Pasian ading pia khia hi. Jerusalem ah pawlpi ki patna dingin a innpi na zangh hi. Peter in agun kuang tung pan Jesu in mipi tungah thugen na ding pulpit in azat sak man in, Topa’n zong ngasa tampi tawh na loh kik cih I mu hi. Hih Mary zong tua bang mah ahi hi. Ama’ kipiakna ki ciamteh tawntung ding hi.
Dotna
Mary (Jerusalem khua mi) innkuan thu gen in.
Jesu Khris tawh bang ci kimuh hi dingin na um hiam?
Pasian a ding a ki piakkhiat nate gen in.
A tapa John Mark tungah bang thuzawhna nei hiam?
