LEI BEBEK KA HIH KHAK DEN KEEI
Agelh ~ Khoi Lam Thang
Nupa cih pen a niamzaw kituh ding, a khialzaw kituh ding a, a maisak masa kituh ding ahi hi. Tuate itna i gah ahi hi. A it zawzaw in zang masa zaw ding hi.
Itna pen khat lambek pan hi loin ki-it thuk ding kisam hi. Ki-itna munnih pan a kipaikhek ciatciat ding kisam hi. Na lawm in hong it mahmah ding na lunggulh leh nang it mahmah masa phot in. ‘Hong kimaisak den pa/nu’ na hih sangin, ‘a maisak den pa/nu’ hih sawm zaw in. Hong kingekbawl ding na ut leh, nang ngekbawl masa in. Na deihna hong kizuih ding na ut leh, na lawm’ deihna zui masa phot in. Tua hi leh hong lem lel ding hi.
Khat vei lai-in a zi a tate vuaden pasal khat om hi. A veng a pam in zong ngeina seh phial ta uh hi. A zi zong nungsang zuanzel, kisam kikzel cih bang peuhin buai den hi. Ni khat a zi in thuak zo lo lua ahih manin veng hausate kiangah a va koh leh, hausa upate’n:
“Khangluite in ‘Lei le ha zong kipet’ ci buang hi lo maw, thuak keikai in kimaisak zel buang ve uh teh” a cih leh nupi nu in,
“Tua i Zo paunak bel thei mah veng aw, ahih hang ‘khatvei beek ha hi kha ngei lo-a, lei bebek ka hih den keei mahmah hi veh na ka sak’” ci in dawng hi.
Lei le ha zong kipet i ci teita zongin, a kipetkha pakte phamawh lo hi. A pehkhak den keei leh bel, a ha sawipo hi ding ahih manin bawhkhiat ding kisam kha ding hi.
Lai Siangtho sungah (1 Kor 13) “Itna in a thuak keeikaai hi” kici hi. Ahih hangin khat lam bek pan thuak keeikaai ding haksa mahmah hi. A langkhat te utut-in om in, a dang khat lam pan thuak keeikaai leh a sawtvei ciangin sauveipi khau kikang bangin kitat thei hi. Puakkham thei hi. Ahi zongin khat le khet ki-it tuahna ah tua bangte piang ngei lo hi.
--oo—
Source:
Sihna in hong khen mateng
Laibu Saal / Zomi eLibrary
