HUN
Agelh ~ T. Sawm Lian
Bank khat om a, tua bank in zingsang simin Rs. 86,400 hong piaden hi. Tua sum pen na deih leh zangbei thei in, na deih kei leh zatbei loh theih a, zang vet loin zong na ihmut san thei hi. Ahih hangin ngeina kician leh hoih tak om a, tua sum pen nangah ni-in na zanga na zang kei zongin bei veve hi. Zat val na neih hangin banghang mah in a zing a thai adingin na koihkholh ding kiphal lo hi. A beisa ni a na zatsiam leh siamloh ngaihsun het loin a zingsang ciang a thak sinsen Rs. 86,400 mah hong kipia kik hi.
Tua bang dinmun ah om taktak lecin bangci bangin na om diam? Mi pil ngeina na hih leh ni khata na sum ngah pen siam taka zat ding dan na ngaihsun khia pah ding hi. Na kisap diak na lei masa phot dinga, tulsawmgiat nuai lam man na khat peuhpeuh baih takin na lei pahpah thei ding hi. Ahih hangin car, innmun leh inn hoih na deih a, tuate ni khata lei zawh lah hi lo, sum lah kikhol thei lo lai, bangcih ding?
Bank pen ‘hun’ hi lel a, nisimin second 86,400 hong piaden hi. Na deih bangbangin na zang thei a, zang siamin siam kei leteh bei veve hi.
Mi lawhcingte in theician mahmah uh hi. Inventor Thomas Edison kiangah, “Leitungah bang thumal poimawh pen hiam?” ci-in dong uh a, a dawnna pen, “Hun” cih ahi hi. Benjamin Flanklin in zong, “Na nuntakna na it takpi mah hiam? Na it takpi leh hun mawk beisak kei in. Nuntakna a piangsak ahih manin” ci hi.
Pasian bawlsa bel kihi mah hi. Ahih hangin hun loin i nungta thei kei a, tua hun zong Pasian in a bawl ahi hi. Mihing nuntakna pen manpha i sa tek a, thupi ngaihsutin, sihding zong i lau a, i sihloh nading leh i bit nadinga leitung ah sum i limzat dan na ngaihsun ngei hiam? Tua bang kawmkalah, i hun zat dan i ngaihsut ciangin thupi het lo hi.
Nuntak Manphazaw Tawh Lawhcinna (Laibu)
