MOPAWI DEIHSAK THUGENNA
Agelh ~ Khoi Lam Thang
Thupatna: Tu ni kiteng nupa kopte in damsung na phawk den ding uh thu thum kong gen nuam hi:
1. Look back and Thank God:
Nung leh hei-in, lungdam siam un.
A beisa huna, na nuntaknate uh lungngai-in, Pasian hoihnate sim kik un. Zi nei thei, pasal nei thei ding dongin hong kem Pasian le nu le pate hangin Pasian tungah lungdam siam un. Mopa a dingin leitungah nungak tampi om ta leh Pasian in tu ni in zi hong pia taktak ta hi. Tua mah bangin Monu zong na hi hi. Pasian tungah ka lungdam hi, ci tangtang un. Tua in na ki-itna uh hong nosuaksak dinga, hong kho-in, hong nuamsak semsem ding hi. Kiten kum tam semsem, ngaihmel lah hoih semsem ding hi. Nung leh hei-in, lungdam siam un.
2. Look around and Praise the Lord:
Kimkot en-in, Pasian phat un
Saipi a mah bek-in lian lo hi. Suangpi suang neu in thek hi. Leitung ah ei kia kinungta lo hi. Nu le pa, u le nau, beh le phung, khua le tui, lawm le gual, sung le pu, nung le ma, pawlpite in na kimkot uh ah, hong um cih diimdiam hi. A hoih mahmah pakhuan laizang a pakpalh bangin kingaihsun un. Na kiim na kiang uh en-in tuate hangin Pasian phat un. “Topa hoih hi, ei nupa adingin” cici mai un. Na innkuan uh ni khat khit ni khat hong nuam semsem ding hi. I kiimkot teng kilawmna, innkuan ki-it leeng na thei ding uh hi. Kiimkot enin, Pasian phat un.
3. Look up and Trust God:
Tunglam en-in, Pasian muang un.
A tunga thunihte ban-ah a thupi mahmah khat in Pasian muan ngiat ding ahi hi. Leitunga i suan i muan theih na khempeuh muan theih loh a suah hun hong tung lai ding hi. Tua khempeuh om pipi mah-in, mual tunglam et toh hun om ding hi. Topa a muang mite a ling het lo Zion mual tawh kibang ding cih phawk gige un. Mite le kumpite sang nangawn in a muanhuai zaw Pasian na muan nak leh amah muan huai hi. A sep theih loh khat zong om lo hi. Hong khahsuah ngei lo dinga, lam tawp dong hong kha ding hi. Ngaih le Jesuh tawh kikhahsuah loin, na ton khawm un. Tunglam enin, Pasian muang un.
Thukhupna: Lei pianma pek a kipan no lawmta nupa dingin a vaihawm Pasian in thupha tampi hong kholsak hi. Tuate a banban-in hong pia ta ding hi. Khua khat in a zawh loh nupa lungtuak ahi ding, vangam malep innkuan nuam a pankhia ding le a tultul a thenthente pisawn pusawn ahi dingin Pasian in thupha hong pia ta hen.
(June 20, 2013 ni a kiteeng Sia Pau Khan Kap le Lia Ning Hau Lun te Deihsak Thugenna kong lepkik hi.)
Source:
Sihna in hong khen mateng
Laibu Saal / Zomi eLibrary
