KANAAN NUMEI
(Ki niamkhiat a, thupha ngen teitei numei)
Matt 15:21-27; Mk 7:24:30
Agelh ~ Rev. Dr John Thang Hum leh
Dim Lun Zam
Topa Jesu khualzin kawikawi a, a nasepna pan hong ciah kik ciangin lampi ah Kaanan numei khat in na dawntuah a, dawi bawlsiat a tanu a damsak nading huhna ngen hi. Hih nupi nu pen namdang (Gentel mi) ahih hangin Pasian maan na thei hi. Israel mite zong Pasian teeltuam minam ahihna zong tel hi. Amah leh Pasian kisai lo ahihna, minam dang ahihna zong tel hi. Tua ahih manin kiniam khiatna kamte zangh hi. “Topa, David tapa aw, hong hehpih in,” cih kammal te zangh hi (neu 23).
Topa Jesu in numei nu ngetna dawng pah lo hi. Adawn kikna ah, “Kei, Israel mi ta ding bek-a hong pai kahi hi,” ci hi. (neu 24). Hih pen numei nu ngetna anial hilo a, Israel mite teltuam ahihna agen nuam ahi hi.
A nihveina ah, “Tate nek ding an la-a, uite piak ding ki lawm lo hi,” ci leuleu hi (neu 26). Hih lai ah zong piakloh ding cihna hilo in, Israel minam te masak phot (u-sa-pia phot) ding agen na hi. Sia khatin a genna ah, ‘hih pen nialna hilo in, hih numei nu in bangzahciang lunggulhna nei hiam? cih a theihnopna hi,’ ci hi. Lai Siangtho khiat siam mikhat in, ‘Kanan mite pen bum leh aisanna tawh dawi hawlkhia te hi a, Jesu amuhna pen tua bang ziau lel ciang ahih khak ding kal khia nuam ahih manin a nial phot ahi hi,’ ci hi.
Nungzui te in hih numei kiko daldal pen nawngkai sa hi. Mundang ah zong nawngkai a sak simsim uh tam hi. Nuapang note zong Jesu kiang hong pai ciangin nawngkai sa uh hi. Amau Jesu lungsim puak tel nailo uh hi. Jesu in atung-apat pan kipan minam khempeuh (Gential leh Jewte) a lungsim ah koih khin sa a, hong pai hi. Nungzuite in Pentekot ni a, Kha Siangtho ki buak khit ciang bek in, Jesu lungsim a thak in thei pan uh hi.
Nu mei nu’n, “Hi mah hi, Topa! uite in a topa sabuai pan a kia anneng te ne kha hi,” acih ciangin, Topa in, ‘hizahtak kiniam khiat lungsim pen piakloh theih loh upna hi,’ cita hi. “Numei aw, na upna lian hi, Na tanu dam zo hi,” ci hiau hi.
Thukhupna
Upna ih cih pen lungkiat lohna hi, ci-in Luke 18 ah, nupi lungkia lo a, thukhen mangpa kiangah pai teitei a, thukhen sak ding a ngen numei nu tawh hong genteh hi. Hih Kaanan numei in upna bangci zat ding hong thei sak hi. Mite muhna ah hih numei tatzia ki lawmlo kisa phial hita leh Pasian in a thupha ngah ding kilawm lo asak khat beek omlo hi. Amah a muang mi khempeuh pia nuam hi. Pasian in misia leh mipha tungah a ki bangin ni taang sakin, guah zong zu sak khawm hi.
Tua ban ah, ki niamkhiatna in thupha kong honna ahi hi. Biakinnpi sungah mi nih paikhawm a, khatpa in a hoihna teng kisial in, midang te bang a, mawhnei ahih loh na teng gen hi. Khatpa in, a-awm bengin mimawh ahihna gen hi. Kisial kawmsa a thungen pa in amah leh amah a thungetna kipia a, ki niamkhiat a thungen pa Pasian in athungetna dawng hi. Hih Kaanan numei nu in bangci nam thungetna ki ngah cih hong hilh hi.
Kanan numei nu in, ama’ pianzia ki thei (Jew mi hilo ahihlam) ki thei na pi Topa kiangah pai a, thupha ava nget teitei na pen, alamdang upna, a-etteh huai, tha ngah huai mahmah khat ahi hi. Pasian mai ah, i pianpih I minam leh I hoihna I suan ding khat zong omlo hi. Ahi zongin ki niamkhiat a, ngetna in thupha hong ngah sak ahihna hong musak hi.
Dotna
Kaanan numei nu in Pasian maan khat omhi cih upna aneihna bangci ki theih hiam?
Nungzui te lungsim puakzia bangci om hiam?
Topa Jesu in bangci dawn kik a, bang deihna nei hiam?
Hih numei “Upna lian nei” cihna bang hang hiam?
