PASAL HOIH
Agelh ~ Khoi Lam Thang
“Pasal hoih zi ading, Pa hoih gam ading” kici hi. Pasal hoih khat in a zi a ta lungkimsak a, pawl le gual huai in, Pasian it in, zahtak hi.
Numeite pen thanem-in, nehno hi. Patau baih, lungdam baih-in, khasia baih hi. Pasal hoih in hih thute thei ahih manin thuhilhzia, thu kuppihzia siam hi. Tua ahih manin a zi in a lungsim tawng panin muang semsem hi.
Pasal hoih in zite’ muan le suan dingin panmun la siam hi. Zite tungah thu neihcip sawm ngei lo a, a zi thupi sim hi. Phat-in lungkimsak hi. Zite sangin sin-uk masa zaw ngei lo hi. Khasum ahi a, ngahna dang khatpeuh ahi zongin a zite theisak kim hi. Thusia thupha kuppih hi.
Inn sung nasepte numeite’ nasep hi, cih lungsim nei loin, ahih theih bangbangin huh den hi. Thu le vai tampi tak ah a zi le a tate lamlak a, makaih hi. Tha nuam ahih manin a zi lungkim theihtheih na ding hanciam hi. A neu no khat ahi zong, a zi lungkim nading ahih leh lungsiit loin sem hi. A tate mai-ah a zi phat hi. Itna kilangsak hi. Thupi sim hi.
W.G. Mather, Jr. kici innkuan thu a kankan pa in nungak 443 te a dotna pan a muhkhiat nungakte’ pasal deihzia 10 a nuaia bang hi.
1. Lungpil ding
2. Pumpi siangtho sitset ding
3. Cidam ding
4. Lungsim muanhuai ding
5. Thudik hithiat ding
6. Numei lam-ah paubaang lo ding
7. Midangte’ thugen sanzia siam ding
8. Nu le pa’ deihsak hi ding
9. Thanuam-in bel ding
10. Thu kikup nuam ding
Tu hun, Zomi nungakte in a deih uh Pasal koi ci bangte hi dingin na um hiam? Nang ee, a koici bang pasal pawl na hi hiam? Tu hun ciangin nungak thu ngaihsun theite in puatham hoihna, hauhnate ultungsak nawn lo uh hi. A pasal ding pen a sungtawng, a mugil mah thupi ngaihsut uh hi.
Nungak tampite in Pasal HOIH koi ah a om tam ci in, khuadak in zongzong uh hi. Tua a zonzon uh Pasal pen NANG na hi hi.
--00—
Laibu Saal / Zomi eLibrary
