JEPTHAH TANU
(Apa deihna anial sawmlo tanu)
Thukhente 11
Agelh ~ Rev. Dr John Thang Hum leh
Dim Lun Zam
Israel makai pipa, Moses kamciamna gam tunglo in lamkal ah si-a, tuahun pan in Joshua in makai sem hi. Joshua in Israel minamte amau beh nam ciat in mun leh leitang hawm sak hi. Joshua a sihkhit ciangin makai ding Pasian in Thukhente 13 pia hi. Tuate lak ah akua na makai ahi Jephthah in kumguk sung uk hi.
Jepthah pa, Gilead hi a, zipi leh zino nei hi. A zipi tawh tapate nei a, a zino tawh Jepthah nei hi. Jepthah nu pen mi namdang sungpan ahih manin, a sanggam ten amah deihlo a, “Ko tawh gamh na luahkhawm theikei ding hi” ci-in hawlkhia hi. Jepthah zong mundang (Tob gam) ah tai in, mi gina lo honkhat in amah pawm a, mite neihsa zawhthawh thu tawh sut in, tua bang in nungta hi.
Tua bang teng laitak, Israel mite, a kiim a teeng, Ammon mite’n nawngkai sak hi. Tua hun teh a sanggamte in Jepthah kiang va pai in thuum a, “Ko kiang hong pai kik in la, gal hong do sak in”, ci-in cial uh hi. Jepthah in nong hawlkhiatsa uh hilo hiam? Bang hang hong kankik na hi uh hiam? cih san hi. Ahi zongin a nungngat san tatak ding a lungnuam tuanlo-a, kamciam khat bawl sak in, gal azawh leh amaute makai a suah ding gen hi. Jepthah galsim ding ki pan a, Topa Kha Siangtho in zong ompih pah hi.
Pasian tungah kamciam bawl
Jepthah in anungta Pasian a lungsim sungah phawk hi. Pasian tungah kamciam piakna tawh huhna zong ki ngenthei cih thei hi. “Gamkuan a, gal nong zawh sak leh, ka ciah ciangin ka inn pan hong dawn masa penpen tawh nang kong bia ding hi,” (11:31) ci-in kam ciam hi.
Gal hong zo takpi a, hong ciah leh, Israel mipite in lungdam in na dawn hi. Tuate lak ah, a tanu khat bek aneih pen khuang tumsa in a pa gualzawhna pahtawi dingin amasa pen in hongsuak hi. Tua amuh ciangin, Jepthah in “aw! ka tanu, Pasian tungah ka kamciamsa dok kik thei nawnlo ding hi veng maw,” ci-in nak dah mahmah hi. A tanu in zong apa’ kamciam piak tel pah lian a, ‘pa aw, Pasian tungah na ciamsa bangin hih in,’ ci-in gen hi.
Hih kamciam piakna pen sandan atuamtuam om hi. Pawlkhatte in, a tanu meihal biakpiakna in ahing tangin that hi, cih a-um pawl om hi. Hih bang a-umte in, hih hunlaitak in mite’n Pasian awzakna kician neilo a, a-utut in gamta uh a, a kiim a paam dawibia te biak piakzia, mihing tawh biakna zang uh hi, cihdan in um uh hi.
A langkhat lamte in, tua dan upna manlo hi, meihal biakna kipia hilo in Pasian biakna Biakbuuk sungah siampite nasep pen a khantawn a, huh a, pasal nei theilo dinga kipiakna gen hi, ci uh hi. Pai 38:8 ah, numei ten biakbuuk sungah siampi nasep huh theih na dingin kigen hi.
Hih anihna pawlte ngaihsutna aman ahi hi. A hangpen, mihing tawh biakpiakna thukham laibu sungah kikham hi. Hih thu Jepthah in atheilo hilo hi. Tua banah a tanu mahmah in a genna ah, “Kei, pasal nei ngei nawnlo ding (nungak suak ding) kahih manin ka lawmte tawh mual tungah vak kawikawi in, kha nih sung ka kithuah theih nang khuan hong pia in,” ci-in gen hi (neu 37).
Pasal neih dinga, nu hoih suah ding pen Israel numei khatin a lunggulh mahmah ahi hi. Tua ahih manin hih lunggulhna te kipelh ta hi. Israel te thukham sungah, “innluah ding tapa a neihkei leh, a tanu in apa’ suan leh khak a kizop suak theih nading sem ding hi,” ki ci hi (Gam 27:8; Thuhilhkikna 25:5-10). Jepthah in tapa neilo ahih manin a tanu tungtawn in a khang kizom ding a geel sateng kipelh ta hi.
Gamlak mual tung ah hun zangh
A tanu ngetna apa in pia a, mual tungah pai in, a lawmte tawh dah hunzatna nei khawm uh hi. “Banghanghiam cih leh amah nungak paisuak dinga, pasal nei ngeilo ding hi,” ci hi. Amah pen nungak pai suak hi (neu 39). Hih pen biakbuuk sungah nasem dinga kipia numeite’ nuntakzia ahi hi.
Jepthah tanu in apa’ kamciam piakna tel a, phun ding leh nial dingin ngaihsunlo hi. Khantawn pasal nei ngeilo a, nungak suak ding cih pen thu haksa mahmah khat ahihhang Pasian tungah kamciamna ki phiat kik theilo ahihna tel uh hi.
Thukhupna
Jepthah in amai ah bang piang thei ding cih mu hetlo ahihna hih tangthu pan kithei hi. Solomon in biakna pia ding na pai ciangin na kampau ki dawm in, Pasian kiangah kamciam na piak leh, na piak bang na taangtun sak kul hi, ci hi (Thuhilhsia 5:6). Pasian tungah ih hih zawh loh ding kamciam I piak khak loh ding leh, I piak leh zong tangtun sak ding hong theisak hi. Mi pawlkhat in, Pasian aw, nong tuacih leh, thupha nong piak leh, kenzong kong tua cih ding hi, ka sumpi tuazah, tuazah kong pia ding hi, cih bangin kamciam pia thei hi. Jepthah pen Thu tam ngaihsun lo galhang pa a ci zong om hi.
Jepthah tanu ahih leh Pasian’ thukhamte a tel khat, apa lungkim sak numei pil khat ahihna ki mu hi. Bangbang hita leh, Pasian tungah kam manlang a kamciam na pen hoihlo a, ih piak leh zong tangtun sak teeiteei ding ahihna hih tangthu pan ih mukhia hi.
Dotna
Jepthah tanu innkuan omzia gen in
Ama din mun ah nang kibulh le cin bang cih na sawm hiam?
Tuhun in Pasian tungah kamciam ki pia thei mah ahiam?
Hih tangthu ah, meihal biakpiakna bang a cih nopna hiam?
