YES, I DO!
TONGCIAM PHUHBANG KHOSAK NI
Agelh ~ Khoi Lam Thang
Pasian min tawh a siangtho kittenna i bawl ciangin Pastor (Siampi) in, “… na kiciam hiam” ci-in, mopa le monu in “Kiciam mah ing - Yes, I Do” ci in kidawng hi. Hih kammal in “ka lungkim hi, ka cih takpi hi, ka thuman ding hi” cih nopna ahi hi. Ei mihingte pen ganhingte banga tuahna peuh a kiteng dingin Pasian in hong bawl hi lo hi. Nu le pa hihna thupisak a, ngeina le sianthona tawh nupa suak in Pasian deihna a tangtungsak khawm dingte i hi hi.
Thornton Wilder kici mipa in: Nupa kipna pen itna zong hi masa kei, deih khempeuh a kicin man zong hi tuan kei, khat le khat kikal Pasian le mite mai-ah i kiciam man hi. Kamciamna tawh i kiteng a, tua i kamciamna in hong kipsak hi, ci hi.
Tua ahih manin, Khristian innkuan in, leitung mite kalsuanzia englo ding hi. Ut hunhun-in kiteng, ut hunhun -in kikhen mengmeng cih om lo ding hi. Zulhzau-in khutthak lo ding hi. Ei a lo peuh a hoih zaw dingin ngaihsutna nei lo ding hi. Inn pan kalkhat suan khia peuh leeng, tangval hi lel hang cih ngaihsutna nei lo ding hi.
SIHNA IN HONG KHEN MA TENG cih kammal zang a, kamciam lak pen a thuneu hi lo hi. A cizet huai, a zeksah huai mahmah kammal ahi hi. Sih le nun thu tawh kiciamna ahi hi. Kum 5 kamciam, kum 10 kamciam cihbang hi lo hi. “Kiciam mah ing - Yes, I Do” na cih khit ciang Pastor in “Pasian’ gawmsa: mite in khen kei hen!” ci in hong tangko hi. Kikhen ding thu ah Pasian behikbek thu nei pen hi ta hen cih a kipsak ihi hi.
Nop hun dah hun ah, mittaw in khel a bai zongin ka zi/ka pasal taktak dingin ka kiciam hi, ci in Pasian le mipi mai-ah a kiciamte hi hang. Bangbang a piang zongin a kikhah suah nawn lo dinga “Kha kikhual” khinsa ihi hi.
Lai Siangtho in nupate khat le khat kikal cihtak ding hong hilh hi. Cihtak lohna a om leh thaman in nungzuih lianlian ta hi. A nitawm-in zong tung thei a, khantawn khom ding zong hi thei hi. Vaphual nupate’ len zil ni. Thumanna le cihtakna pen minam ciaptehna ahih ban-ah, leitung le vantung a ding thupha naak ahi hi. Nupa kikal pan a bul pan ni.
Yes, I Do!
TONGCIAM PHUHBANG KHOSAK NI.
--oo—
Source:
SIHNA IN HONG KHEN MA TENG (Laibu)
Laibu Saal / Zomi eLibrary
