HERODIAS
(Kamsang Tuiphum Johan thah nading
Lamzong leh mawhpua numei)
Matte 14:3-12; Mk 6:14-24; luka 3:19-20
Agelh ~ Rev. Dr John Thang Hum leh
Dim Lun Zam
Herod in tapa 4 nei hi. (Herod Aristobulus, Herod Hyrcanus, Herod Philip leh Herod Antipas). Herodias pen Aristobulus tanu hi a, a pano Phillip tawh kiteng hi. Herod Antipas leh azi (Arabian mi) Rom khua ah ahawh lai tak in, Philip leh azi Herodias in na zindo a, tua lai pan Antipas in a sanggam pa zi kimlai na sut ziau in, a tanu Salome tawh la khawm in, kumpi inn sungah thunei mahmah in koih hi. Ama zipi Arabian nu zong ma (ciah sak) hi.
Kamsang pa’ nialna ngah
Hih hun sungin kamsang Johan (tuiphum pa) nasep kipan ta a, mipi lungsim ngah mahmah hi. Kamsangte pen Pasian kiang pan thuman, thutak gente ahih mah bangin Herod in a sanggampa’ zi a suh khiat, aman lohna gen hi. Herod zong heh mahmah napi mipite kihta ahih manin tuiphumpa bangmah cih ngamlo hi. A zi Herodias ahih leh nak heh mahmah a, Johan tungah bang lampi tawh phula ding cih ngaih sunsun hi.
Mi pawlkhat in kamsang tuiphum Johan in banghang Herod nuntakna lung himawh zenzen ai tam ci uh hi. Khat na ah Herod i’ pianna pu pen Idomea minam hi a, Jew biakna ah kikhel ahi hi. Tua pan in a ma tate in zong Jew biakna paidan thei uh hi. Jew mite lungdam theihna dingin a sem thei khat (nainganyee siam) ahi hi. Ahi zongin Pasian thukham a lungtang ah om khollo in, ama’ minthan na ding leh aza kip theihna ding in mihoih tampi that hi.
A tanu zangh
Herod in a suahni pawikham a, a tanu Salome mite maiah laam sak hi. Herod lungdamlua a, adeih bangbang a piak ding kamciam hi. A tanu in zong a nget ding thei vat lo a, anu kiangah pai in a vagen leh, anu in Kamsangpa Johan lutang ngen in, ci-in sawl hi.
Herod in ahih noploh hangin a kamciamsa ahih manin asep loh phamawh hi. Tua bangin Kamsangpa Johan in sihna thuak hi. Hih Herod kumpi namte pen mithah ding cizia lo nam hi a, Satan sisan luah suk hi, ki ci hi.
(Hih Herodias gitlohna Salome tangthu sung pan a tangzai zaw in sin lai ni).
Thukhupna
Herodias pen Pasian kihtakna neilo, leitung hauhna leh minthanna, ci leh sa noptatna anak zat mahmah numei khat hi. A pasal nusia in, a pasal sanggampa a va tenpih pen Herod innkuan susia leh khenthang ahi zaw hi.
Kamsangpa tungah hehna phul a, athah manin, ama’ tungah bang gimna tung kik ding cih theilo hi. Herod kumpi pen Jews minam dan hi napi in Jews kineih khem, Pasian kihtakna neilo ahi hi. Leitungah aci leh asa lunggulhna khat a tangtun hangin anung sangah athuak ding haksatna lianzaw lai hi.
Dotna
Herodias innkuan omzia gen in.
Bang ci bang in a pasal nusia in pasal dang nei hiam?
Tuiphum Johan sih na ding bangci dan lampi zong hiam?
Thu-um mite a ding bangdan thu hong gen hiam?
